GünAzTv: Ekspertlər uzaq məsafədən hava hədəflərini məhv edə bilən raketlərin Abxaziyada yerləşdirilməsinin mənasız olduğunu deyirlər.

Xəbər verildiyi kimi, Rusiyanın Hərbi Hava Qüvvələrinin komandanı Aleksandr Zelin Gürcüstanın separatçı Abxaziya bölgəsində S-300 zenit-raket komplekslərinin yerləşdirildiyini açıqlayıb. General deyib ki, bu raketlər Abxaziyanı Gürcüstanın istənilən hava hücumundan qoruyacaq. Lakin hərbi ekspertlər uzaq məsafədən hava hədəflərini məhv edə bilən raketlərin Abxaziyada yerləşdirilməsinin mənasız olduğunu deyirlər.

Bildirilir ki, Gürcüstan güclü hava qüvvələrinə malik olmadığı üçün belə komplekslər tamamilə yararsız olacaq. İsrail kəşfiyyatına bağlı olan “Debka” saytı isə dünən Rusiyanın bu addımı ilə bağlı ilginc məlumat yayıb. Sayt Amerika və İsraildəki hərbi mənbələrə istinadən bildirir ki, S-300 raketlərinin Abxaziyada yerləşdirilməsinin əsl səbəbi İranı ABŞ və İsrailin mümkün qəfil zərbələrindən qorumaqdır.

Mənbə bildirir ki,Gürcüstanın Abxaziya və Cənubi Osetiyaya mümkün hava hücumlarının qarşısını adi HHM batareyaları ilə almaq mümkündür. Ona görə də Amerikadakı mənbələr hesab edir ki, Rusiya Qara dəniz sahillərində S-30 komplekslərini Birləşmiş Ştatların Qara dənizdəki hərbi gəmilərindən buraxıla biləcək ballistik raketlərə qarşı yerləşdirib. Amerika İrana qarşı mümkün hücumlar zamanı Qara dənizdəki gəmilərindən də istifadə edə bilər. Həmçinin Rumıniyadakı Amerika aviabazası Qara dənizin cəmi 50 kilometrliyində yerləşir. Həmin bazadan Amerika Hərbi Hava Qüvvələri sərbəst şəkildə Qara dəniz və Aralıq dənizi üzərindən keçərək İrana zərbə endirə bilər. “Bizim hərbi mənbələrimiz təsdiq edir ki, İsrail hava qüvvələrinin Şərqi Avropadakı iki Amerika bazasından istifadə edərək İrana zərbə endirmək üçün keçirildiyi təlimlər Moskva və Tehranın diqqətini cəlb edib. Bu təlimlər zamanı İsrail hərbi vertolyotu qəzaya uğrayıb. İsrail tərəfi qəza ilə bağlı məlumatları məxfi saxlayır. İsrail hərbi kəşfiyyatındakı mənbələrə görə Rusiya S-300 raketlərini Abxaziyada yerləşdirərək Qara dəniz, daha sonra Gürcüstan və Azərbaycandan keçməklə Xəzər üzərindən İranın şimalındakı nüvə obyektlərinə hava zərbələrinin endirilməsini əngəlləmək istəyir. İsrail İrana zərbə üçün bu marşrutu nəzərdən keçirir. Rusiya İrana S-300 raketlərinin satılmasını təxirə salıb, ancaq həmin raketləri Abxaziyada yerləşdirməklə Amerika və ya İsrailin mümkün zərbələrindən İranı qoruyur” deyə, məlumatda deyilir.musavat