GünAzTv: İraq ordusunun ölkədə nəzarəti öz üzərinə götürməsi üçün 10 il zamana ehtiyac var. bunu General Babəkir Zəbari bəyan edib.

ABŞ (Amerika Birləşmiş Ştatları) qoşunlarının çıxarılması  prosesi yaxınlaşdıqca  İraqda terror hadisələrinin  sayı artır.İraq ordusunun yüksək səviyyəli hərbçisi general-leytenant Babəkir Zəbari Amerika Birləşmiş Ştatları silahlı qüvvələrinin bu ay ölkəni tərk etməklə bağlı planlarını şərh edərək İraq ordusunun ölkədə nəzarəti tam olaraq öz üzərinə götürməsi üçün əlavə olaraq 10 il zamana ehtiyac olduğunu bəyan edib. Qeyd edək ki, ABŞ bu ayın sonunda İraqdakı silahlı qüvvələrini geri çağırmaq niyyətindədir. Hazırda Amerikanın İraqda 64 min əsgəri var. Bu əsgərlərin əlli mini İraq qüvvələrinə təlim keçmək və ABŞ-ın maraqlarını qorumaq üçün 2011-ci ilin sonuna qədər İraqda qalacaq. İraq generalalı isə çəkilmə planlarının «vaxtından əvvəl» gündəmə gəldiyini iddia edib. Zəbari İraq əsgərlərinin təhsilinin 2020-ci ildən tez tamamlanmayacağını və amerikalıların dəstəyi olmadan ölkədə problemlərin öhdəsindən gələ bilməyəcəyini bildirib. Generalın şərhi ölkədə qarşıdurma hallarının ciddi şəkildə artdığı və Əl-Qaidənin fəaliyyətini gücləndirdiyinə dair xəbərlərin daxil olduğu bir dövrə təsadüf edir. Paytaxt Bağdadda bir konfransa qatılan Zəbari «Bu mərhələdə qoşunların çıxarılması öz qaydasında gedir, çünki amerikalılar hələ buradalar. Amma problemlər 2011-ci ildən sonra başlayacaq - siyasətçilər həmin vaxtdan sonra meydana gələcək boşluğu doldurmağın bir yolunu tapmalıdırlar» deyə bildirib. Xatırladaq ki, ABŞ rəhbərliyi srağagün çəkilmə təqvimi mövzusunda hazırlıqların plana uyğun davam etdiyini açıqlamışdı. Ağ Ev sözçüsü Robert Cibbs prezident Obamanın proseslərlə bağlı İraqdakı Amerika komandanı Rels Odyerno tərəfindən məlumatlandırıldığını söyləyib. Cibbs bildirib ki, general Odyerno təhlükəsizlik şəraitinin yaxşılaşdığı və İraq təhlükəsizlik qüvvələrinin bu ay ABŞ qoşunları çıxarıldıqdan sonra liderliyi boynuna götürməyə hazır olduğu barədə fikirlərini prezidentə çatdırıb. Amerikalı sözçü eyni zamanda ABŞ-ın çəkilməsi yaxınlaşdıqca şiddət hadisələrinin artması ehtimalının olduğunu qəbul edib və və bunu qiyamçıların diqqəti cəlb etmək səyləri kimi şərh edib. Xatırladaq ki, İraqda təkcə bu ay ərzində baş verən terror hücumları nəticəsində 100-dən çox adam həyatını itirib. İyul ayı isə İraqda 2008-ci ildən bu yana ən çox insan itkisinin qeydə alındığı dövr olub. Cibbs prezident  Obamanın ölkədə yeni bir hökumət qurmaq yönündə səylərlə bağlı məlumiatlandırıldığını açıqlayıb. Mart ayında keçirilənseçkilərdə heç bir partiya aaşkar üstün bir qalibiyyət əldə edə bilmədiyinə görə o vaxtdan bu yana hökumət qurulmayıb.