GünAzTv: İranın müdafiə naziri general Əhməd Vahidi bəyan edib ki, hökumətin qərarı ilə bütün hərbi zavodlar Tehrandan çıxarılır.

 “Fars” agentliyinə müsahibəsində Vahidi bildirib ki, hərbi zavodların Tehrandan çıxarılması prosesi artıq başlayıb: “Biz bu prosesi kifayət qədər qısa müddətdə başa çatdırmağa çalışırıq”. Vahidi əlavə edib ki, evakuasiya prosesinə baxmayaraq, hərbi zavodlarda konveyerlərin işi bir an da olsun dayanmayacaq.

O, zavodların hara köçürüldüyünü açıqlamayıb. Bununla belə, müdafiə naziri təsdiq edib ki, ABŞ-ın (Amerika Birləşmiş Ştatları) pilotsuz kəşfiyyat təyyarələri İran üzərində uçuşlar həyata keçirərək strateji obyektlər barədə informasiya toplamağa çalışır. Vahidi İranın Hava Hücumundan Müdafiə Qüvvələrinin bu cür casusluq fəaliyyətinin qarşısını almaq iqtidarında olduğunu da bildirib.İranın hərbi zavodlarını Tehrandan təcili çıxarmaq qərarını təhlil edən Qərb ekspertləri bunun ABŞ və İsrailin mümkün hərbi əməliyyatları ilə izah edirlər. Belə ki, İrana qarşı hava zərbələrinin hədəfləri arasında təkcə nüvə obyektləri deyil, hərbi zavodlar da yer alır. Məlumatlara görə, Tehran və ətrafında yerləşən hərbi zavodlarda əsasən ballistik raketlər və onların komponentləri, habelə yaxın mənzilli raketlər və torpedolar istehsal edilir. Görünür, İran hakimiyyəti bu zavodların yerinin ABŞ və İsrail kəşfiyyatı tərəfindən müəyyən edilməsindən duyuq düşərək onları köçürməyi qərara alıb. Həmçinin həmin zavodlara hava zərbələrinin endirilməsi mülki əhali arasında da tələfata səbəb ola bilər. Müxtəlif mənbələrdən yayılan məlumatlara əsasən, İsrail İrana hava zərbələri endirmək üçün fürsət və ABŞ-ın icazəsini gözləyir. Lakin istisna deyil ki, İsrail ABŞ-ın icazəsini almadan da İrana qarşı hücum əməliyyatlarına başlaya bilər. Bu günlərdə ABŞ Mərkəzi Kəşfiyyat İdarəsinin istefada olan yüksək rütbəli zabitlərindən bir qrupu prezident Barak Obamaya məktub yazaraq bildirib ki, İsrail avqust ayı ərzində İrana qarşı hücuma başlayacaq. Kəşfiyyat zabitləri Obamanı İsraili bu addımdan çəkindirmək üçün təcili hərəkətə keçməyə çağırıblar. Çünki onlar hesab edirlər ki, İsrailin İrana hücumu Yaxın Şərqdə genişmiqyaslı müharibəyə və İsrailin məhv olmasına gətirib çıxaracaq.Lakin ABŞ-ın özü də İrana qarşı hərbi əməliyyatları istisna etmir. Vaşinqtonda bunu ən son variant kimi nəzərdən keçirsələr də, İranı vurmaq üçün bütün hərbi hazırlıqlar tamamlanıb. Birləşmiş Ştatlar Fars körfəzində İrandakı hədəflərə kütləvi zərbələr endirməyə imkan verəcək qədər hərbi qüvvə cəmləşdirib. Həmçinin ABŞ Yaxın Şərqdəki müttəfiqlərinin İranın mümkün cavab zərbələrindən müdafiə olunması üçün onlara davamlı olaraq hərbi yardımlar edir. ABŞ-ın bir neçə ərəb ölkəsində “Petriot” sistemləri yerləşməsinin ardınca məlum olub ki, bu ölkə Səudiyyə Ərəbistanına qırıcı təyyarələr satmağı qərara alıb. Müqavilənin məbləği 30 milyard dollara yaxındır. Həmçinin ABŞ İsrail ərazisinin raket hücumlarından müdafiəsi üçün ikinci “qalxan”ın qurulmasına başlayıb. Hələlik Vaşinqton İrana qarşı tətbiq edilən son sanksiyaların hansı nəticə verəcəyini gözləyir. Dövlət katibi Hillari Klinton bildirib ki, ABŞ İranla nüvə məsələsində dialoqa hazırdır, ancaq bu dialoqun baş tutması üçün nə etmək lazım gəldiyini Tehran yaxşı bilir. Klintona görə İran nüvə fəaliyyətlərinə dair beynəlxalq ictimaiyyətin narahatlıqlarını aradan qaldıran əməli fəaliyyətə keçməlidir. İranın xarici işlər naziri Manuçehr Möttəki isə jurnalistlərə bildirib ki, müharibənin başlaması realdır. Möttəkiyə görə İranın əlində İsrail və ABŞ-ın belə plana malik olduqlarını göstərən məlumatlar var. Lakin o, əlavə edib ki, İrana qarşı hücumlar düşmənin məğlubiyyəti və İsrailin məhv olması ilə nəticələnəcək. Hərbi ekspertlərə görə, İsrailin İrana qarşı hava zərbələri endirməsi üçün ən münasib vaxt avqust-sentyabr ola bilər. Belə məlumatlar var ki, İsrail İranı vurmaq üçün Səudiyyə Ərəbistanının hava məkanından istifadəyə gizli razılıq alıb. Ancaq İsrail aviasiyası havada əlavə yanacaq doldurmaqla da İran səmasına çata bilər. Bununla belə, İsrailin hərbi imkanları İrana qarşı uzunmüddətli müharibə üçün yetərli hesab edilmir. Münaqişənin bir neçə gündən artıq uzanması ABŞ-ın istər-istəməz hərbi əməliyyatlara qarışmasına gətirib çıxaracaq. Məhz bunu nəzərə alan ABŞ rəhbərliyi İranla hərbi münaqişəyə qəfil cəlb olunmaq istəmir və İsraili təkbaşına addım atmaqdan çəkindirməyə çalışır.