GünAzTv: Ermənistan xarici işlər naziri Edvard Nalbəndyanın Tehrana səfəri gözlənilir. Ermənistan KİV-lərinin məlumatlarına görə, nazir İranın Qarabağ münaqişəsinin nizamlanmasına dair irəli sürdüyü təşəbbüslə bağlı Tehrana çağırılıb.

 Səfərin sentyabrda baş tutacağı gözlənilir, ancaq indidən erməni ekspertləri və mediası bu səfərin mümkün nəticələri və İranın Qarabağ prosesinə qarışmasının Ermənistanın maraqlarına nə dərəcədə uyğun olduğuna dair müzakirələr aparırlar. Xatırladaq ki, İran bir neçə ay əvvəl Ermənistan və Azərbaycan arasında danışıqlarda vasitəçilik etmək niyyətini tərəflərə çatdırıb. İndiyədək Tehranın vasitəçiliyinə soyuq yanaşan rəsmi Bakı bu təklifi qəbul etdiyini açıqlayıb. Lakin erməni tərəfi işarə edib ki, İranın vasitəçiliyini qəbul etməyə hazırlaşmır.

GünAzTv mətbuat mərkəzinin “Musavat”-a istinadən yaydığı məlumata görə, Tehranın Qarabağ məsələsində fəallaşmasını təhlil edən ekspertlərə görə, İran hesab edir ki, bu münaqişənin yenidən alovlanması təhlükəsi onun milli təhlükəsizlik maraqlarına zərbə vura bilər. İran kəşfiyyatı regiondakı vəziyyəti təhlil edərək ölkə rəhbərliyinə belə hesabat təqdim edib ki, ABŞ və İsrail Qarabağda hərbi əməliyyatların başlamasından istifadə edərək bölgədə öz qoşunlarını yerləşdirə və bununla da İranı təhdid edə bilərlər. Bu ilin iyun ayında Qarabağda cəbhə xəttində baş vermiş insident də Tehranda xarici qüvvələrin işi kimi şərh edilmişdi. Həmin ərəfədə Tehran Azərbaycanla sərhədlərə qoşun cəmləşdirərək bildirmişdi ki, ABŞ regiondakı etnik münaqişələri alovlandırmaqla İrana hücum hazırlayır. Eyni zamanda, Qarabağ münaqişəsinə dair Minsk Qrupu formatında aparılan danışıqlar da İranda narahatlıqla izlənir. Bu danışıqlar zamanı Azərbaycanın İranla sərhəd Füzuli bölgəsində Amerika sülhməramlılarının yerləşdirilməsinin müzakirə olunduğuna dair şayiələr Tehranda kifayət qədər ciddi qarşılandı və məsələyə rəsmi səviyyədə reaksiya bildirildi. İran xəbərdarlıq etdi ki, xarici hərbi qüvvələrin regionda yerləşdirilməsinə imkan verməyəcək. Erməni mətbuatında yer alan xəbərlərə görə, İran həm danışıqların, həm də münaqişənin yenidən alovlanmasının onun maraqlarına təhlükə olduğunu düşünərək prosesə fəal müdaxilə etməyə qərar verib. Bu məqsədlə İran Qarabağ münaqişəsinin həllinə dair öz təkliflərini hazırlayıb və bunu tərəflərə təqdim edib. Təkliflərin nədən ibarət olduğu məlum deyil, ancaq bildirilir ki, erməni tərəfi ona ehtiyatla yanaşır. Bir neçə dəfə diplomatik kanallarla Ermənistan İrana çatdırıb ki, münaqişənin nizamlanması prosesində Tehranla məsləhətləşmələrə hazırdır, ancaq bu ölkənin vasitəçiliyini qəbul etməkdə maraqlı deyil. Eyni zamanda Azərbaycanın İranın köməyini qəbul etməyə hazır olduğunu bildirməsi İrəvanı bir qədər çətin vəziyyətdə qoyur. Çünki İran Ermənistanın ən yaxın müttəfiqlərindən biridir və Tehranın vasitəçilik təklifini rədd edən tərəf İrəvan olarsa, o zaman bu müttəfiqliyə zərbə dəyə bilər. Bu səbəbdən xarici işlər naziri Edvard Nalbəndyan Tehrana səfər edərək İran rəhbərliyi ilə müəyyən ortaq məxrəc tapmağa çalışacaq. Maraqlıdır ki, İranın Qarabağ danışıqlarında birbaşa vasitəçilik təklifinə Rusiya da qarşı çıxmır. Rusiya XİN-in rəsmisi Andrey Nesterenko jurnalistlərə bildirib ki, rəsmi Moskva İranın vasitəçiliyi ilə Ermənistan və Azərbaycan arasında danışıqların təşkil olunmasına qarşı deyil. Buna baxmayaraq, rəsmi İrəvan İran, Ermənistan və Azərbaycan xarici işlər nazirləri arasında üçtərəfli formatda danışıqların keçirilməsinə dair təkliflərə soyuq yanaşır. Bildirilir ki, belə təklifi İranın xarici işlər naziri Manuçehr Möttəki irəli sürüb.