AKP-ORDU mübarizəsi dəvam edir

SON XƏBƏRLƏR

AKP-ORDU mübarizəsi dəvam edir

2021.10.20, 07:36

Gunaz.tv

GünAzTv: Türkiyədə ordu rəhbərliyinin və hökumətin təmsil olunduğu Yüksək Hərbi Şuranın bir neçə gündür davam edən iclası AKP ilə silahlı qüvvələr arasında çəkişmənin kritik mərhələsinə çevrilib.

Xəbərlərə görə, baş nazir Ərdoğan ordu tərəfindən müxtəlif hərbi postlara təyinatlarla bağlı təqdim edilən namizədlərə veto qoyub. Buna əsas kimi həmin namizədlərin adlarının bu günlərdə baxılmaq üçün məhkəməyə təqdim edilən “Balyoz” çevriliş planı ilə bağlı cinayət işində keçməsi göstərilir. Həmin cinayət işinə əsasən vaxtilə 1-ci ordu komandanı Çətin Doğanın rəhbərliyi ilə hazırlandığı deyilən planda orduda xidmət keçən generalların təxminən üçdə birinin adları yer alır.

GünAzTv mətbuat mərkəzinin “Musavat”-a istinadən yaydığı məlumata görə, Yüksək Hərbi Şuranın iclası zamanı həmin generalların bir çoxunun rütbələrinin artırılması, habelə yeni vəzifələrə təyinatı baş nazir tərəfindən əngəllənib. Belə əngəllə qarşılaşanlardan biri də Baş Qərargah rəisi İlkər Başbuğ tərəfindən quru qoşunlarının komandanı vəzifəsinə namizəd göstərilən ordu generalı Həsən İğsızdır. Həsən İğsız 1-ci ordunun komandanıdır və onun adı “Balyoz” işində şahid qismində yer alır. Məhkəmə onun ifadə verməsini tələb edir. Ənənəyə görə səlahiyyət müddəti başa çatmaqda olan Baş Qərargah rəisi İlkər Başbuğun yerini namizədliyi təsdiqlənəcəyi halda məhz İğzıs tutmalı idi. Çünki həmin vəzifəni bir qayda olaraq quru qoşunlarının komandanı tutur.Yüksək Hərbi Şuradakı gərgin müzakirələr zamanı jandarma qüvvələrinin komandanı ordu generalı Atilla İşık sürpriz şəkildə istefa verib. Onun istefasının səbəbləri açıqlanmır, ancaq ekspertlər qeyd edir ki, general hökumətin seçdiyi yeni Baş Qərargah rəisi ilə işləmək istəmədiyini nümayiş etdirib. Həsən İğsızın namizədliyinin əngəllənməsindən sonra ordu rəhbərliyində üç kritik posta yeni təyinat hələ reallaşmayıb. Dünən isə prezident Abdullah Gül Quru Qoşunlarının indiki komandanı İşık Koşanerlə görüşüb. Bu cür kritik mərhələdə Gülün görüşə İlkər Başbuğu yox, Koşaneri çağırması belə təxminlərə səbəb olub ki, prezident ordunun başında məhz onu görmək istəyir. Xarici mətbuat isə Türkiyədə hərbi vəzifələrə təyinatlarla bağlı yaranan gərginliyi şərh edərək yazır ki, ordunun ölkənin idarə edilməsindəki rolu artıq minimuma endirilib. “ Wall Street Journal” qəzeti yazır ki, Türkiyədə generallar AKP hökuməti ilə dünyəvilik prinsipləri uğrunda neçə vaxtdır gedən çəkişmədə növbəti mövqelərini əldən veriblər.

GUNAZ.TV

SON XƏBƏRLƏR