Bu gün Küveytdə İranlı casuslar mühakimə olunacaq

SON XƏBƏRLƏR

Bu gün Küveytdə İranlı casuslar mühakimə olunacaq

2021.10.20, 07:36

Gunaz.tv

GünAzTv: Küveytdə yeddi iranlı bu gün məhkəmə qarşısına çıxarılacaq. onlar İran lehinə casusluq etməkdə ittiham olunur.

Həmin şəxslər Küveyt ordusu və ölkədə olan ABŞ (Amerika Birləşmiş Ştatları) hərbi qüvvələri ilə bağlı gizli məlumatları İrana ötürdüyünə görə, təqsirləndirilir. Bu barədə SİA xarici mətbuata istinadən xəbər yayıb.

Bu günki məhkəmə prosesində yalnız iranlı qadının iştirak etməyəcəyi deyilir. Həbs olunan digər 6 nəfərdən biri isə Küveyt ordusunun əsgəridir. Günahlandırılan şəxslər isə ittihamları rədd edir. Küveyt səlahiyyətliləri may ayında bu şəxsləri nəzarətə alan vaxt İran İnqilab Keşikçiləri Korpusuna aid casus şəbəkəsinin çökdürüldüyünü açıqlamışdılar. Küveyt parlamentinin başçısı Casim əl-Hurafi isə “ümid edirəm İranın, ya da başqa bir ölkənin Küveytdə belə bir casus qrupu yoxdur” demişdi.

Tutulan şəxslərin vəkili isə onların işgəncələrə məruz qaldığını və günahlarını işgəncələr altında etiraf edildiyini bildirib. Vəkil həbs olunanların həkim müayinəsindən keçməsini tələb edib.

İran tərəfi isə ittihamları rədd edir. Xarici İşlər Nazirliyinin açıqlamasında deyilir ki, casus məsələsinin ortaya atılması ilə körfəz bölgəsində qorxu mühiti yaratmaq istəyirlər. İddiaların əsassız olduğu İran İnqilab Keşikçiləri Korpusu tərəfindən də bildirilib.

Qeyd edək ki, ABŞ-ın Küveytdə təxminən 20 min hərbi qüvvəsi və çoxlu sayda tankları, döyüş təyyarələri və vertolyotları var. ABŞ Qırğızıstanda hökumət dəyişikliyindən sonra Əfqanıstandakı hərbi qüvvələrin silah və ərzaqla təhciz edilməsi üçün Küveytdən istifadə etməyə başlayıb. Bu məqsədlə Vaşinqton Küveytdəki hərbi qüvvələrin sayını artırıb. Ekspertlər isə bunun Küveytin yaxınlığında yerləşən İran üçün qəbuledilməz olduğunu bildirir.

GUNAZ.TV

SON XƏBƏRLƏR