GünAzTv: Keçən həftələdə Azərbaycan Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu,  Ermənistanın Azərbaycan ordusunun giziri Şəhid Mübariz İbrahimovun meyitini saxlaması ilə bağlı belə bir bəyanatla çıxış etmişdi."Beynəlxalq humanitar prinsipləri tapdalayan bu hiyləgər münasibətə Azərbaycan Müdafiə Nazirliyi vaxtında öz mövqeyini bildirib. Sınaqdan keçirilmiş konkret təcrübə göz qabağındadır. Dəfələrlə atışmalar zamanı meyitlərin qarşı tərəflərdə qaldığı hallar olub. Belə vəziyyətlərdə beynəlxalq təşkilatların, xüsusi ilə Qırmızı Xaç Komitəsinin vasitəçiliyi ilə danışıqlar aparılıb və qısa müddətdə cəsədlər qaytarılıb”. Bu sözləri açıqlamasında Azərbaycan Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu deyib.

 O bildirib ki, bütün əngəllərə baxmayaraq, Azərbaycan gizir İbrahimovun meyitinin geri alınması üçün səylərini davam etdirəcək: “Təəssüflə qeyd edirik ki, hələlik Beynəlxalq Qırmızı Xaç Komitəsinin təşəbbüsləri bir nəticə vermir. Hazırda Ermənistan digər başqa bir uydurma ilə çıxış edir. Ermənilər Qırmızı Xaç Komitəsinin sorğusuna cavab olaraq bildirirlər ki, M. İbrahimovun cəsədi nə Ermənistanda, nə də Dağlıq Qarabağda yoxdur. O zaman sual meydana çıxır: atışmanın səhəri gün Ermənistanın müdafiə və xarici işlər nazirliklərinin Mübariz İbrahimovun cəsədinin silah-sursatla birlikdə qarşı tərəfdə qaldığı barədə verdikləri bəyanatlar nə məqsəd güdürdü? Yaxud rəsmi müraciət deyə səs-küy qoparmaqla nəyə işarə vururdular? Əslində ortada müəmmalı bir şey yoxdur. Yenə də ənənəvi milli bir keyfiyyətin nümayiş etdirilməsinin şahidi oluruq. Onlar indi də meyiti gizlətmək yolunu tutublar. Bu da heç bir bəşəri və insani normalara sığmır. Azərbaycan Müdafiə Nazirliyi Beynəlxalq Qırmızı Xaç Komitəsinin son nəticəyə qədər öz missiyasını davam etdirəcəyinə inanır. Əks təqdirdə gələcəkdə yeni bir presedentin təməli qoyula bilər ki, bunun da məsuliyyəti birbaşa Ermənistanın üzərinə düşür”.

Bu arada ermənilərin iddiasını rədd edən fakt ortaya çıxıb. Belə ki, iki gün öncə ermənilər tərəfindən “odnoklassniki” sosial şəbəkəsində Azərbaycan Respublikasının Milli Qəhrəmanı Mübariz İbrahimovun şəkilləri yerləşdirilib. Azərbaycanlıların və türklərin təhqir olunduğu profil “Tehler Yan” adlı bir istifadəçi tərəfindən yaradılıb və həmin səhifədə şəhid əsgərimizin 4 fotosu yer alıb. Şəkillərdə Mübariz İbrahimovun belinin sol nahiyəsindən güllə yarası alması, sifəti əks olunub. Digər bir fotoşəkildə isə xərəyə qoyulmuş əsgərimiz əlləri bağlı şəkildə olub. Ermənilərin cəsədindən belə qorxaraq əllərini bağladıqları əsgərimizin şəkillərini nümayiş etdirməsi erməni rəsmilərinin riyakar simasını bir daha təcəssüm etdirir. Belə ki, Ermənistanın Qırmızı Xaç Komitəsi Azərbaycan tərəfinin müraciətlərinə cavab olaraq həlak olmuş əsgərin meyitinin nə Ermənistanda, nə də Dağlıq Qarabağda olmadığını bildirmişdi. Xatırladaq ki, Milli Ordumuzun giziri Mübariz İbrahimov iyun ayının 18-dən 19-na keçən gecə cəbhənin Tərtər istiqamətində baş verən ağır döyüşdə qəhrəmancasına şəhid olub. O, Azərbaycan ordusunun mövqelərinə həmlə edən 4 erməni hərbçisini təkbaşına öldürüb, sonra özü şəhid olub. Ancaq bu günə kimi onun meyiti qaytarılmayıb.Ölkə prezidentinin sərəncamı ilə Azərbaycan Respublikasının müstəqilliyinin və ərazi bütövlüyünün qorunub saxlanılmasında müstəsna xidmətinə və göstərdiyi rəşadətə görə gizir Mübariz Ağakərim oğlu İbrahimova Azərbaycanın Milli Qəhrəmanı adı verilib.