GünAzTv: İki gün öncə "Traktor"la "Piruzi"nin oyununda baş verən hadisələr azarkeşlər arasında adi bir qarşıdurmadan daha çox milli zəmində toqquşma məqsədi daşıyıb. Bu sözləri  Güneyli yazıçı, jurnalist Məhəmmədrza Ləvai "Xalq Cəbhəsi" qəzetinə bildirib.

Onun sözlərinə görə, Əvvəlcə fars azarkeşlər Azərbaycan türklərini təhqir etməyə başlayıblar. Sonra türklərin və "Traktor" komandasının ünvanına səslənən söyüş və təhqirlər münaqişəyə çevrilib: "Biz azarkeşləri həmişə düşündürən öncə milli şüur, sonra futbol şüurudur. Amma qarşıdurmanı Azərbaycan türkləri deyil, farslar yaratdılar. Əlidayi farsların tərəfini saxladığı üçün "Traktor"un azarkeşləri ona sərt cavab verdilər. Bundan sonra farslar türkləri "eşşək" deyə təhqir etməyə başladılar. Hətta vəziyyət o həddə çatdı ki, telekanalda yayımı iki dəfə dayandırmağa məcbur oldular. Türklər də məcbur olub oturacaqları farslara atmalı oldular. Bu bir milli məsələ idi ki, orada açıq şəkildə özünü göstərdi. Burada müəyyən qüvvələrin əli də var idi. Yəni planlaşdırılmış bir məsələ idi. İndi qarşıdurma yaratmış azarkeşləri cərimə etmək istəyirlər. Mənim fikrimcə, gərək farslar cərimələnsinlər, nəinki "Traktor"un tərəfdarları. "Traktor"un ilk oyununun "Piruzi"ilə salınması özü sual doğurur, başqa komanda ilə sala bilərdilər. Özləri bilirdilər ki, belə bir hadisə olacaq, ona görə də stadionu bağlamışdılar. Rejim istəyir ki, "Traktor"un fəaliyyətini dayandırsın. Bu məqsədələ də komandanı isterik vəziyyətə salırlar. "Traktor"un əvvəlki illərdə olduğu kimi aşağı vəziyyətə salınması təhlükəsi var. "Traktor" güclü bir komanda olduğu üçün çalışırlar ki, onun fəaliyyətini dayandırsınlar. İstəyirlər ki, "Traktor"a psixoloji təzyiq göstərsinlər və bu yolla ona qalib gəlsinlər. Farslar istəyir ki, "Traktor"u o qədər təhqir edib gözdən salsınlar ki, xal yığa bildməyib liqadan düşsün".Məhəmmədrza Ləvai "Traktor" komandasına və onun azarkeşlərinə qarşı farsların təhqiramiz hərəkətlərə yol verməsini apporteid münasibət adlandırdı. Ona görə də güneyli soydaşımız bu problemi FİFA-nın müzakirəsinə çıxarmağı təklif edir: ""Traktor" komandasına və onun azarkeşlərinə aporteid münasibəti bəslənilib. Ona görə də gərək bu məsələni FİFA araşdırsın. Bu bir komandaya deyil, bir xalqa yönəlmiş zorakılıq və təhqirdir. Hətta İran televiziyasından bu sözləri həm farslar, həm türklər eşitdilər. "Piruzi" komandasını da FİFA böyük məbləğdə cərimə etməlidir". Məhəmmədrza Ləvainin sözlərinə görə, hazırda Güney Azərbaycan türkləri "Traktor" komandasına qarşı baş vermiş təhqiramiz hərəkətləri milli ayrıseçkilik sayır. Bu səbəbdən də İran rejimi yaranmış vəziyyətə son qoymasa, ölkənin digər şəhərlərində də milli zəmində toqquşmalar baş verə bilər.