GünAzTv: İranın keçmiş baş naziri və müxalif islahatçı lideri Mir Hüseyn Musəvi bildirib ki, tarixi həqiqətləri təhrif etmək prosesi davam etdirildiyi təqdirdə müharibə dövrünün indiyə qədər deyilməyən həqiqətlərini ifşa edəcək.

 “Kələmə” veb saytının verdiyi məlumata əsasən, Musəvi Kərəc şəhərinin siyasi təşkilatlarının bir qrup üzvü ilə görüşü zamanı bildirib ki, hələ indiyə qədər inqilabın ilk on illiyi barədə heç bir söz danışmayıb. Amma müharibədə iştirak edənləri və o dövrdə rəhbər vəzifədə işləyən fədakar kadrlarını müdafiə məqsədi ilə indiyə qədər deyilməyən həqiqətlərin və özünün müharibə illərində istefasının səbəblərini açıqlaya bilər.

Xatırladaq ki, bir neçə gün əvvəl müharibə dövründə Nazirlər Kabinetində müdafiə  naziri kimi fəaliyyət göstərən Mohsen Rəfiqdust İran-İraq müharibəsinə son qoyan BMT-nin 598 sayılı atəşkəs qərarının İran İslam İnqilabı rəhbəri Ayətullah Ruhullah Musəvi Xomeyni tərəfindən qəbul olunmasının ildönümü münasibəti ilə çıxış edərək bildirmişdi ki, müharibə zamanı İranın imkanları zəif olsada o vaxtkı rəhbərlik cəbhələrə vəsait göndərməkdən imtina edib. O, əlavə edib ki, müharibəyə lazımi vəsait ayrılsaydı, İraqın paytaxtı Bağdad şəhərini zəbt etmək mümkün idi.

Musəvi, Rəfiqdustun bu sözlərinə cavab olaraq bildirib ki, “keçmişdə mənə məcburən nazir təyin olunan şəxs bilməlidir ki, ölkənin bütün imkanları müharibə dövründə cəbhələrə göndərilirdi. Buna baxmayaraq o, deyir dövlətin bütün imkanları cəbhələrə axsaydı Bağdadı zəbt edə bilərdi.” Musəvi daha sonra həmin nazirin Yoxsullar Fondunun prezidenti təyin olunması və oradakı fəaliyyətini barədə danışıb. İslahatçı lider   bildirib ki, “o, bu fondu pis vəziyyətə saldmışdı. Belə adam ölkə başçısı təyin olsaydı,  fondun başına gətirdiklərini  ölkənin də başına gətirəcəkdi.” Musəvi həmçinin müharibə dövründə İran rəhbərliyi içindəki  bəzi ixtilaflarından da söz açıb. O, bildirib ki, dövrün bir sıra hərbiçiləri müharibənin sonlarına doğru ümidsizliyə qapanmışdılar.  Onlar,  hətta İraqın müharibədə uğur qazandığına inanırdılar.

Xatırladaq ki, İranda müharibə dövrünün gizli məqamları hələ də ortaya çıxmayıb. İran- İraq müharibəsinin qurtarmasından 22 il keçməsinə baxmayaraq o dövr haqqında çoxlu gizli məqamlar var. Iranın 20-ci əsrdəki tarixinin mühüm bir hissəsini təşkil edən bu savaş haqda ara sıra o dövrün rəhbərləri bəzi sənədləri üzə çıxarsada, əsas məqamlar hələ də gizli saxlanılır. Belə ki,  Haşimi Rəfsəncani  də öz xatirələrində müharibə dövrünün bəzi qizli məqamlarına yer verib. Müharibədən sonra ilk dəfədir ki, Musəvi müharibə dövründə liderlərin ixtilafları haqda məqamları açılayıb. Amma o da hələlik həqiqətlərin hamısını açıqlamaq yerinə yalnız xəbərdarlıq edir. araztm