Azərbaycan Ermənistana gedən qaz kəmərini alır

SON XƏBƏRLƏR

Azərbaycan Ermənistana gedən qaz kəmərini alır

2021.10.20, 07:36

Gunaz.tv

GünAzTv: Regionda gözlənilməz və sürpriz gəlişmələr baş verir. Düşmən ölkəyə qarşı mühüm iqtisadi rıçaq əldə etmək üçün şans yaranıb, Tiflislə Bakı arasında danışıqlar başlayıb.

Xəbər verildiyi kimi, Gürcüstan hökuməti ölkə ərazisindən Ermənistana gedən qaz kəmərini satmaq niyyətini elan edib. Gürcüstan ərazisindən keçən “Şimal-Cənub” qaz kəməri strateji əhəmiyyətə malikdir və bu kəmərlə Ermənistana Rusiya qazı nəql olunur. Kəmərin satışa çıxarılacağını bir neçə gün əvvəl Gürcüstanın baş naziri Nikoloz Giluari də təsdiqləyib və dərhal Ermənistanda təşvişlər başlayıb.

Ermənistanda narahat olublar ki, qaz kəmərini Gürcüstanla strateji tərəfdaşlığa malik olan Azərbaycan ala və beləliklə də ölkə üçün həyati əhəmiyyətli kommunikasiyanı nəzarətinə keçirə bilər. Çünki Gürcüstanın Rusiya ilə münasibətləri düşmənçilik səviyyəsindədir və bu səbəbdən “Qazprom”un Ermənistana gedən qaz kəmərini almaq üçün Tiflislə anlaşma əldə etməsi qeyri-mümkün görünür. Azərbaycan isə Gürcüstanın qazla təchizatını bütünlüklə təmin edir, bu ölkə ərazisindən neft-qaz nəqlini həyata keçirir və bütün çətin məqamlarda Tiflisə dəstək verib. Üstəlik, kəməri almaq üçün kifayət qədər maliyyə imkanlarına malikdir və məsələnin strateji əhəmiyyətini nəzərə alaraq qiymət məsələsində çək-çevir etməzdi.Ermənistana gedən qaz kəmərini Azərbaycanın ala biləcəyinə dair İrəvanda yaranmış təşviş boş yerə deyilmiş. Dünən Gürcüstan mənbələri xəbər yayıblar ki, ARDNŞ artıq kəmərin alınmasına dair Gürcüstan hökuməti ilə danışıqlar aparır. Xəbərə görə, Ermənistana gedən magistral qaz kəməri ilə eyni vaxtda Rusiyanın “Qazprom”, Qazaxıstanın “Kazmunayqaz” şirkətləri və ARDNŞ maraqlanır. Həmçinin “Qazprom”un Ermənistandakı törəmə şirkəti “Armrosqazprom” da kəməri almaq imkanlarını araşdırır. ARDNŞ-ın Gürcüstandakı təmsilçiliyindən xəbəri şərh etməyiblər. Hələlik kəmərin səhmlərinin neçə faizinin satılması da məlum deyil. Buna baxmayaraq, Azərbaycanın məsələyə kifayət qədər yüksək səviyyədə önəm verdiyi və Ermənistana qarşı mühüm iqtisadi rıçaq əldə etmək şansını əldən vermək fikrində olmadığına dair məlumatlar var. Ötən həftə Gürcüstanın xarici işlər naziri Qriqol Vaşadze Bakıda səfərdə olub və ehtimal edilir ki, onunla keçirilən görüşlərdə Ermənistana gedən qaz kəmərinin Azərbaycan tərəfindən alınmasının mümkün siyasi nəticələri müzakirə edilib.Gürcüstanda isə bəzi müxalifət partiyaları qaz kəmərinin satışa çıxarılmasına qarşıdır. Gürcüstanın BMT-dəki keçmiş səfiri İrakli Alasaniyanın başçılıq etdiyi Azad Demokratlar Partiyası bəyan edib ki, kəmərin satışa çıxarılması ölkənin maraqlarına ziddir. Alasaniya hesab edir ki, bu məsələnin ABŞ dövlət katibi Hillari Klintonun səfəri ərəfəsində gündəmə gətirilməsi təsadüfi deyil. Görünür, hökumət Gürcüstan ərazilərinin bir hissəsini işğal altında saxlayan Rusiyanın strateji maraqlarına bu yolla toxunmaq istəyir, lakin bu ucuz siyasi avantüradır. Musavat

GUNAZ.TV

SON XƏBƏRLƏR