GünAzTv: Türkiyədə Konstitusiya Məhkəməsi hakim Ədalət və İnkişaf Partiyası tərəfindən irəli sürülən konstitusiya düzəlişləri paketini qismən dəstəkləyib. Paketdə əsas siyasi mübahisələrə səbəb olan maddələr Konstitusiya Məhkəməsinin və Hakimlər və Prokurorlar Yüksək Şurasının (HSYK) tərkibinin formalaşdırılması qaydalarının dəyişdirilməsini, habelə HSYK-nın səlahiyyətlərinin məhdudlaşdırılmasını nəzərdə tuturdu. Müxalifət hesab edirdi ki, bu düzəlişlər ölkənin məhkəmə və ədliyyə sisteminin bütünlüklə siyasi iqtidarın nəzarətinə, daha konkret isə iqtidarı dəstəkləyən dini təriqətə bağlı kadrların bu qurumlarda yerləşdirilməsinə yol açacaq.

Keçmiş CHP lideri Dəniz Baykal da məhz bu paketə qarşı sərt müxalifət mövqeyi nümayiş etdirdiyi bir vaxtda kaset qalmaqalı ilə üzləşib istefa verməli oldu. Baykalın istefasından az sonra CXP paketin ləğvi üçün Konstitusiya Məhkəməsində iddia qaldırmışdı. Qeyd edək ki, düzəlişlər paketi parlamentdə təsdiqlənib, lakin yetərli üçdə iki səs çoxluğu ilə dəstəklənmədiyi üçün referenduma çıxarılmalıdır. Referendum sentyabr ayına təyin olunub.Konstitusiya Məhkəməsi isə iddianı araşdıraraq belə qənaətə gəlib ki, paketin bütünlüklə ləğvi üçün əsas yoxdur. Lakin məhkəmə Konstitusiya Məhkəməsinin və HSYK-nın tərkibinin formalaşdırılması üçün hökumətin təklif etdiyi yeni qaydaları əsas qanuna zidd hesab edərək paketdən çıxarıb. Bununla belə, Konstitusiya Məhkəməsinin və HSYK-nın üzvlərinin sayının artırılması və səlahiyyətləri məsələsi paketdə qalır. İlk dəfədir ki, məhkəmənin qərarı heç kimi-nə müxalifəti, nə iqtidarı, nə də hüquqçuları razı salmayıb. Baş nazir Rəcəb Tayyib Ərdoğan qərara reaksiya verərək “bu halı ilə  də xeyirli olsun, referendumda xalq öz mövqeyini ortaya qoyacaq” deyib. Lakin onun hökumətinin ədliyyə naziri Sadullah Ərgin daha sərt danışaraq deyib ki, Konstitusiya Məhkəməsi səlahiyyətlərini aşıb və parlamentin funksiyalarını öz üzərinə götürərək səs çoxluğu ilə təsdiqlənmiş paketdə düzəlişlər edib. Türkiyə parlamentinin sədri Mehmet Əli Şahin da məhkəmənin qərarının demokratiyaya zidd olduğunu bildirib. Onun fikrincə, qərar parlamentin etibarını zədələyir və demokratiyanı zəiflədir. AKP-dən digərləri də yüksək məhkəməni tənqid edən bəyanatlar veriblər.Müxalifət cəbhəsində də vəziyyət fərqli deyil. MHP lideri Dövlət Baxçalı Konstitusiya Məhkəməsinin düzəlişlər paketini bütünlüklə rədd etməli olduğu halda belə qərar verməsini tənqid edərək deyib ki, yüksək məhkəmə səlahiyyətlərini aşıb və siyasi qərar verib. Baxçalıya görə, qərar AKP-nin gizli planlarını həyata keçirməsinin yolunu açır. CXP lideri Kamal Kılıcdaroğlu isə deyib ki, məhkəmənin qərarı onları tam qane etmir. Çünki yüksək məhkəmə və ədliyyə orqanlarının müstəqilliyinə təhlükə yaradan maddələr bütünlüklə ləğv edilməlidir. Bununla belə, Kılıcdaroğlu mübarizənin davam edəcəyini və referendumda paketə “yox” deyəcəklərini bildirib.HSYK başqan vəkili Kadir Özbək də qərarın onların gözləntilərinə cavab vermədiyini deyib. Onun sözlərinə görə, Konstitusiya Məhkəməsinin tərkibinin formalaşdırılmasına və HSYK-nın səlahiyyətlərinə aid iki maddə bütünlüklə əsas qanuna zidd idi və ölkədə hakimiyyət qollarının bir-birindən müstəqil olması prinsiplərini pozurdu. “Bu maddələr ləğv edilmiş kimi göstərildi, ancaq ləğv edilmədi. Türkiyəyə yazıq oldu. Bu ifadəmin arxasında nələrin dayandığını, ölkəni nələrin gözlədiyini gələcəkdə daha detallı şəkildə açıqlaya bilərəm” deyə, Özbək bildirib. Onun sözlərinə görə, hökumətdən qərara bildirilən etirazlar “timsahın göz yaşları axıtmasını” xatırladır. Belə ki, hökumət qərardan məmnundur. Siyasi müşahidəçilər isə hesab edir ki, Konstitusiya Məhkəməsinin qərarı Türkiyədə dünyəvi dövlət prinsiplərini aradan qaldırmaq planlarına qarşı çıxanlarla dini dövlət tərəfdarları arasında mübarizəni daha da qızışdıracaq. Ölkəni bundan sonra gərgin siyasi müzakirələrin gözlədiyi də təxmin edilir.