GünAzTv: "Ermənilərin ağlı özlərinə getməsin, azərbaycanlılar tarixi vətənlərini unuda bilməzlər." Bu sözləri Azərbaycan Prezidenti İlham Əliyev deyib.

Dünən Dağlıq Qarabağın azərbaycanlı icmasının mərkəzi qərargahının açılış mərasimi keçirilib. Mərasimdə prezident İlham Əliyev də iştirak edib. Dövlət başçısına məlumat verilib ki, dördmərtəbəli, xüsusi memarlıq üslubunda əsaslı şəkildə yenidən qurulan inzibati binada əməkdaşların fəaliyyəti üçün hər cür şərait yaradılıb. Prezident binanın iş otaqlarında yaradılan şəraitlə tanış olub. Bildirilib ki, otaqların hamısı informasiya və kommunikasiya texnologiyaları, mebel və inventarla tam təchiz edilib. Binada müxtəlif tədbirlərin keçirilməsi üçün geniş konfrans zalı və digər müşavirə otaqları da var. Prezident "Dağlıq Qarabağ bölgəsinin azərbaycanlı icması" ictimai birliyinin mərkəzi qərargahının açılışında iştirak edərkən bu qurumun idarə heyətinin üzvləri ilə görüşüb. "AzTV"nin məlumatına görə, dövlət başçısı çıxışında deyib:       "İcmanın öz fəaliyyətini bu binada həyata keçirməsi müvəqqəti xarakter daşıyır. Dağlıq Qarabağ işğaldan azad olunandan sonra bu bölgəmizdə quruculuq işləri həyata keçiriləcək və icma da öz fəaliyyətini orada davam etdirəcək. Dağlıq Qarabağ əzəli Azərbaycan torpağıdır və bunu Dağlıq Qarabağın tarixi və toponimləri, mədəniyyəti, XX əsrin əvvəlinə aid xəritələr də təsdiq edir. Həmin xəritələrdə Stepanakert adında ərazi vahidi yoxdur". Dövlət başçısının sözlərinə görə, artıq Azərbaycan erməni lobbisinin yalan təbliğatına böyük zərbə vurub. Beynəlxalq təşkilatların münaqişə ilə bağlı qəbul etdiyi qərarlar isə həqiqəti əks etdirir. Azərbaycanın ərazi bütövlüyünün pozulduğunu heç kim inkar etmir. Beynəlxalq hüquq normaları da Azərbaycanı dəstəkləyir. Dağlıq Qarabağ danışıqlarına toxunan prezident Azərbaycanın yenilənmiş Madrid prinsiplərini müəyyən istisnalarla qəbul etdiyini deyib: "Bu yaxınlarda 3 həmsədr ölkənin verdiyi bəyanat da Azərbaycanın mövqeyini əks etdirir..."      "...Əgər münaqişə bu prinsiplər əsasında həll olunarsa, Azərbaycanın maraqları tam təmin olunacaq. Azərbaycan vətəndaşları Dağlıq Qarabağ ətraf ərazilərə qayıdacaqlar. Azərbaycan əhalisinin sayı son illər ərzində artıb. Bölgədəki demoqrafik vəziyyət qısa müddətdə bizim maraqlarımızı tam şəkildə təmin edəcək". Dövlət başçısı bildirib ki, Azərbaycan istənilən sahədə Ermənistan güclüdür. Praqa prosesi Ermənmistan üçün son şansdır. Azərbaycan xalqı heç zaman öz tarixi vətənini unutmayacaq. Azərbaycan güclü müstəqil ölkədir və ölkəmiz bu vəziyyətlə heç vaxt barışmayacaq:       "Mən əminəm ki, Azərbaycan ərazi bütövlüyünü təmin edəcək. İlk növbədə beynəlxalq hüquq, sonra Ermənistanla inkişaf sahəsində aramızda böyməkdə olan uçurum bizi dəstəkləyir. Azərbaycan xalqının iradəsi bizi dəstəkləyir. Ermənistan rəhbər dairələrində belə bir fikir formalaşıb ki, danışıqlar 20 ildir davam edir və daha 10 il də davam etsin və ermənilər burda imitasiya ilə məşğul olsun. Onlar ümid edirlər ki, vaxt keçdikcə azərbaycanlılar bu torpaqları unudacaq, bu bölgə ilə heç bir bağlığı olmayan yeni nəsil dünyaya gələcək. Bütün bu fikirlərin qarşısına Azərbaycan xalqı öz iradəsini qoyub. Ermənilərin ağlı özünə getməsin, onlar bəlkə də öz tarixi vətənini unuda bilərlər, azərbaycanlılar isə heç vaxt tarixi vətənlərini unuda bilməz. Azərbaycan xalqı və rəhbərlik üçün Dağlıq Qarabağ və ətraf ərazilərin işğalı dözülməzdir və bu vəziyyətlə barışmayacağıq. Bu məsələ bizim və mənim üçün prioritet məsələdir. O, həllini tapmayana qədər prioritet məsələ olaraq da qalacaqdır". Daha sonra Dağlıq Qarabağın azərbaycanlı icmasının rəhbəri Bayram Səfərov və idarə heyətinin üzvləri dövlət başçısının münaqişənin həlli ilə bağlı yürütdüyü siyasəti dəstəklədiklərini bildiriblər.