GünAzTv: ABŞ (Amerika Birləşmiş Ştatları) regiona hərbi qüvvə cəmləşdirir və Təl-Əvivlə hərbi təmasları davam etdirir.

İran ətrafında vəziyyət getdikcə gərginləşməkdədir. Müxtəlif mənbələrdən alınan məlumatlar bu ölkə ətrafında vəziyyətin müharibə istiqamətində inkişaf etdiyini göstərir. Azərbaycanın adı da son günlər xarici mətbuatda və internet bloqlarında İrana qarşı hücum planlarında tez-tez çəkilməkdədir. Buna səbəb Yaxın Şərqdəki mənbələr tərəfindən İsrailin guya Gürcüstan və Azərbaycan ərazisində məxfi şəkildə bombardmançı təyyarələr və xüsusi təyinatlılar yerləşdirdiyi haqda məlumatlardır.

Xəbər verildiyi kimi, İran bu məlumatları kifayət qədər ciddi qəbul edərək Azərbaycanla sərhədlərə qoşun yığıb. Həmçinin Xəzər dənizi istiqamətindən ABŞ və İsrailin mümkün hücumlarını dəf etmək üçün hərbi hazırlıq elan edilib. İranın ordu generalı iddia edib ki, Azərbaycan ərazisində ABŞ və İsrail xüsusi təyinatlıları yerləşdirilib. İranın Azərbaycan istiqamətində qoşun cəmləşdirməsinə dair xəbərlər İsrail mediasında da geniş şərh olunur. Bildirilir ki, ilk dəfədir Tehran İsrailin hərbi əməliyyatlara başlamaq planlarını ciddi qəbul edərək hücumun qarşısını almaq üçün konkret tədbirlər görür.Bununla belə, İsrail ekspertləri Azərbaycan və Gürcüstan ərazisindən İrana mümkün həmlələrlə bağlı deyilənləri “boş söhbətlər” hesab edir.Bu arada Gürcüstanın Müdafiə Nazirliyi bu ölkənin ərazisində İsrail təyyarələrinin və xüsusi təyinatlıların yerləşdirildiyi barədə xəbərləri qətiyyətlə təkzib edib. Nazirlik bu məlumatları “şayiə” adlandırıb. Xatırladaq ki, ABŞ-ın Bakıdakı səfirliyi də bu məlumatlara eyni yanaşma nümayiş etdirmişdi. Azərbaycan və Gürcüstan ərazisinin İrana qarşı mümkün hücumlar zamanı istifadə ediləcəyinə dair məlumatlar ciddi qarşılanmasa da, ABŞ və İsrailin Tehrana qarşı hərbi planlarının mövcudluğu, son günlər regionda durmadan qüvvə cəmləməsi faktdır.Xəbər verildiyi kimi, ötən həftə ABŞ-ın “Harri Truman” təyyarədaşıyan gəmi qrupu İsrail hərbi gəmisi ilə birlikdə Süveş kanalını keçərək Fars körfəzinə daxil olub. Son məlumata görə, həmin gəmi qruplaşması hazırda Hind okeanının şimalında, Hörmüz boğazı yaxınlığında mövqe tutub. “Harri Truman” təyyarə daşıyanının artıq bölgədə olan “USS Dwight D. Eisenhower” təyyarədaşıyan gəmi qrupuna qoşulduğu bildirilir. “Harri Truman” gəmisinin göyərtəsindəki müxtəlif tipli bombardmançılar İranın nüvə obyektlərinə hava zərbələri endirmək üçün təlimlər keçiblər.ABŞ Silahlı Qüvvələrinin Qərargah Rəisləri Komitəsinin rəhbəri admiral Maykl Müllen bazar günü İsrailə səfər edib və həmkarı Qabi Aşkenazi ilə danışıqlar aparıb. Bu danışıqlarda İrana qarşı hərbi əməliyyatlar planının müzakirə edildiyi barədə məlumatlar var. ABŞ Mərkəzi Kəşfiyyat İdarəsinin direktoru Leon Panetta isə bəyan edib ki, kəşfiyyat məlumatlarına əsasən İran yaxın iki ildə nüvə silahına malik olacaq. MKİ direktoru İranın azı iki nüvə başlığı düzəltmək üçün zəruri ehtiyatlar yaratdığını bildirir. Panetta bildirib ki, İrana qarşı tətbiq edilən son sanksiyalar bu ölkənin hökumətini zəiflədə və müəyyən iqtisadi problemlər meydana çıxara bilər. Lakin sanksiyalar Tehran rejiminin nüvə silahı əldə etmək ambisiyalarını aradan qaldıra bilməyəcək. “Böyük 20-lər”in sammitində iştirak edən Rusiya prezidenti Dmitri Medvedyev isə deyib ki, Amerika kəşfiyyatının İrana dair məlumatı narahatedicidir. Lakin bu məlumatların nə dərəcədə səhih olduğunu yoxlamaq lazımdır. Həmin sammitdə iştirak edən İtaliyanın baş naziri Silvio Berluskoni isə deyib ki, “Böyük səkkizlər” qrupuna daxil olan ölkələrin liderlərinin heç biri İsrailin İrana hücum edəcəyinə şübhə etmir. Berluskoninin sözlərinə görə, İsrail İrana nüvə silahı əldə etmək imkanı verməməkdə tam qərarlıdır və hərbi yola əl atmağı ciddi şəkildə nəzərdən keçirir. Musavat