GünAzTv: Güney Azərbaycanın tanınmış ziyalılarından olan Mühəndis Həsən Raşıdı, Əlirza Sərrafi və Səid Muğanlı iyunun 22-də Tehranın “İnqilab” məhkəməsində dindiriliblər. Hakim dindirmə iclasının qənaətbəxş olmadığın bildirərək hər üç ziyalının işinin baxılması üçün “Evin” həbsxanasına göndərildiyin bildirib. Qarşıdakı həftə adlı çəkilən ziyalılar dindirilmək üçün “Evin” həbsxanasına müraciət etməlidirlər.

GünAzTv mətbuat mərkəzinin “Bütöv Azərbaycan Birliyi” saytına istinadən yaydığı məlumata görə, Mühəndis Əlirza Sərrafi nəşri qadağan edilmiş siyasi, ictimai, iqtisadi-mədəni “Dilmac” aylıq dərgisinin təsisçisi və baş redaktoru, “iranlıların milli kimliyi və çox millətlilik” kitabının müəllifi, “Varlıq” dərgisinin yazarlar heyərinin üzvüdür. Tehran Universitetlərində Azərbaycan folklorunun tədrisi ilə məşqul olan, Təbrizdə “Ana dili” seminarları keçirən Ə.Sərrafi eyni halda “Milli Sülh Şurası”nın təsisçilərindəndir. Tələbə nəşrlərinin yayımı və “70-ci illərdə Azərbaycan tələbə hərəkatı”  haqda xatirələrinin nəşri onu Azərbaycan türklərinin hüquqların müdafiə edən şəxslərin sırasına önəmli yer tutmasına nədən olub.

Mühəndis Əlirza Sərrafi 10 il öncə həbs olunaraq Tehranın “Evin” həbsxanasının 209-cu bölməsinin təkadamlıq kamerasında saxlanılıb. Həbsdə qaldığı müddətdə o ağır fiziki və pisixi işkəncələrə məruz qalmış, vəkillə təmin edilməmiş və ailəsilə görüşünə icazə verilməmişdir və uzun müddət aclıq aksiyası keçirmişdir.

  Səid Muğanlı Güney Azərbaycanın istedadlı gənc şair və jurnalistlərindəndir. O ədəbi “Yaşmaq” dərgisinin təsisçisi olmaqla yanaşı, Azərbaycan türkcəsində yazan müasir quzeyli-güneyli şair və yazıçıların 30 ədəbi-bədii kitabının nəşrinə müvəffəq olub. S.Muğanlı eyni halda “Yarpaq”, “Dilmac” və “Günəş” kimi dərgilərlədə əməkdaşlıq edib. Səid Muğanlıda başqa qələm və fikir dostları kimi bir neçə dəfə Tehran hökuməti tərəfindən həbs edilərək ağır basqılara məruz qalıb.

Mühəndis Həsən Raşidi “Türk dili, İranda onun keçmişdəki və hazırkı yeri ”, “Dilimizin sadə qrameri” və “Türklər və onların İranda tarix, kimlik və dillərinin araşdırılması” kitablarının, “Varlıq”, “Yarpaq”, “Yol” , “Nəvidi Azərbaycan” və “Şərq” nəşrlərində çap edilmiş çox sayda siyasi, ictimai, tarixi və ədəbi zəmində yazılmış məqalələrin müəllifidir. O eyni halda 1992-ci ildə təsis edilmiş “Çiçəklər Quruluşu” uşaq  qurumunun təsisçilərindən və türk dili müəllimi olub.

 O 22 may 2006-cı ildə Güney Azərbaycanda baş qaldıran milli üsyandan sonra saxlanılaraq bir ay həbsdə qaldı. H.Raşıdı ağır girov müqabilində azad edilsədə müxtəlif ittihamlarla günahlandırılaraq 5 il şərti cəza aldı. Ona qarşı irəli sürülən ittihamlar əsasən yazdığı məqalələr, milli toplantıların keçirilməsində fəall iştirak, türk dili və ədəbiyyatının təbliqi ilə əlaqədar olub. Məhkəmədə bütün bunları “rejimə qarşı təbliqat” kimi dəyərləndirərək onu məhkum etmişdilər.