GünAzTv: İranın keçmiş prezidenti Əkbər Haşimi Rəfsəncani bir neçə gün əvəl yerli mətbuata verdiyi müsahibədə Ali Dini Rəhbər Ayətullah Əli Xameneinin ona qarşı yönəlmiş tənqidlərə sakit baxmasından gileyələnib. Rəfsəncani bildirib ki, Ali Dini Rəhbərlə müntəzəm görüşləri azalaraq hər biri 1 saat olmaqla həftədə iki dəfəyə endirilmişdir. Keçmiş prezident onu da qeyd edib ki, onun iş saatı məcburən azalıb.

Haşimi Rəfcəncani “Əlaqələr idarəetməsi” jurnalına verdiyi müsahibədə bir il əvvəl Ali Dini Rəhbərə yazdığı məktubdan və indiki münasibətlərindən də danışıb. O, müsahibədə qeyd edib ki, bütün vəzifələrindən istefa verməyə hazırdır, amma bu addımının onun küskünlüyü kimi dəyərləndiriləcəyindən çəkindiyi üçün bunu etmir.

Haşimi Rəfsəncaninin 76 yaşı var. Nizamın Məsləhət Şurasının və Ali Dini Rəhbəri də təyin edən Xobrəqan Məclisinin rəhbəridir. O, İranın son 30 illik tarixində ən təsirli şəxsiyyətlərdən biri olub. Son bir ildə mühafizəkarların ciddi tənqidləri ilə üzləşib. Digər yandan islahatçılar da bəzən onu açıq danışmadığına görə ciddi tənqid atəşinə tuturlar.

Rəfsəncaninin ailəsi Əhmədinejadın özü və dostları tərəfindən korrupsiyada ittiham olunur. Amma indiyə qədər bu iddianı sübut edən məhkəmə qərarı və ya sənəd üzə çıxmayıb. İnqilabdan əvvəl və sonra “Islam respublikası”nın qurulmasında və qorunmasında ciddi rollara malik olan Rəfsəncani hakim qüvvələr tərəfindən yavaş- yavaş sistemdən kənarlaşdırılır.

Xameneinin hakimiyyətə gəlməsində də böyük rolu olan Haşimi Rəfsəncani əsasən məmur təbəqələr ilə sıx əməkdaşlıq edərək onları özünə yaxınlaşdırmağı bacarmışdı. Xamenei isə yeni nəsil inqilabçılarla o cümlədən müharibə iştirakçıları və İnqilab qvardiyasının gənc nəsli ilə işləməyə üstünlük verib. İki önəmli şəxsiyyət bununla da öz kadrlarını yetişdirmək və hazırlamaq məqsədini güdüb. Bütün hakimiyyəti və hərbi gücü ələ keçirən Xamenei artıq Rəfsəncanini özünə böyük rəqib və qarşısında dayana biləcək gücdə fiqur hesab etmir.

Digər tərəfdən böyük var-dövlətə malik olan Rəfsəncani də problemləri bir inqilabçı kimi həll etmək niyyətində deyil. Amma onun ailəsi onlara qarşı təzyiqləri inqilabçı yollarla və ya hakimiyyəti ələ keçirməklə önləməyə çalışırlar. Son dövrlərdə zəifləməsinə baxmayaraq Rəfsəncani ailəsi İranda Xamenei qədər olmasa da böyük mali və siyasi qüvəyə malikdirlər. Bu iki şəxs arasındakı mübarizə İranda siyasi sistemin gələcək taleyi baxımından mühüm önəm daşıyır. Araztm