GünAzTv: Ekspertlərin fikrincə, Ermənistanın təxribatları Azərbaycanı hərb yoluna əl atmağa vadar edir.

Son günlər cəbhə xəttinin bir neçə istiqamətində atəşkəsin intensiv pozulması, itkilərin sayının artması müharibənin yenidən alovlanması, hərbi əməliyyatların miqyasının genişlənməsi ehtimalını meydana çıxarıb. Artıq ATƏT-in Minsk Qrupu həmsədrləri və Avropa Birliyinin Cənubi Qafqaz üzrə xüsusi nümayəndəsi Piter Semnebi də atəşkəsin intensiv pozulmasının hərbi əməliyyatların miqyasının genişlənməsi təhlükəsini yaratdığından narahatlıqlarını bəyan ediblər.

GünAzTv mətbuat mərkəzinin “Musavat”-a istinadən yaydığı məlumata görə, Azərbaycanın Müdafiə Nazirliyi isə atəşkəsin ermənilər tərəfindən pozulduğunu bildirib. Yerli və beynəlxalq ekspertlərin fikrincə, atəşkəsin belə intensiv pozulması və atışma zamanı itkilərin artması hərbi əməliyyatların daha geniş vüsət almasına, müharibənin başlamasına gətirib çıxara bilər.Azərbaycan Milli Strateji Təhqiqatlar Mərkəzinin sədri Natiq Miri də hesab edir ki, Ermənistanın atəşkəs rejimini intensiv pozmaqla Azərbaycanı ictimai rəydə təcavüzkar ölkə kimi qələmə vermək planı müharibənin yenidən alovlanmasına yol açar: “Ermənistanın Azərbaycanla bağlı məkrli planı həyata keçməyəcək. Çünki ortada dünya birliyinin də tanıdığı Azərbaycan torpaqlarının işğal faktı var. Bu isə beynəlxalq hüquqa və BMT-nin nizamnaməsinə söykənən Azərbaycana imkan verir ki, hər an öz torpaqlarını işğaldan azad etsin. Ermənistanın təxribatları Azərbaycanın güc yoluna əl atmasını günbəgün yaxınlaşdırır. Son hadisələr də sübut etdi ki, Azərbaycan ordusu ilə müqayisədə Ermənistan ordusu qat-qat zəifdir və ilk təmasda nə qədər acınacaqlı durumda olduğu üzə çıxacaq. Bunu beynəlxalq birlik də bilir və məhz buna görə də müharibədə Ermənistanın acınacaqlı məğlubiyyətini istəmirlər. Çünki hadisənin bu cür inkişafı regionda qüvvələr nisbətinin dəyişdiyinin göstəricisi olacaq ki, bu da tamamilə başqa geosiyasi reallıqlar ortaya qoyacaq. Bu isə Türkiyə və Azərbaycana qarşı siyasi təzyiq mexanizmi olaraq ”erməni faktoru"nun zəifləməsi demək olardı ki, bunu da nə Rusiya, nə ABŞ, nə də Avropa Birliyi istəyir. Dünyaya bir mesaj göndərildi ki, münaqişə dondurulmayıb və bunun danışıqlar yolu ilə imitasiyasına imkan verilməyəcək. Bu mesaj hər şeyi hesablayaraq doğru qəbul olunmasa, müharibə qaçılmazdır. Bunun ilk görüntüləri və Ermənistanın xeyrinə olmadığı ortadadır. Müharibə üçün lazım olan hüquqi və maddi baza yaradılıb. Hər şeyi yaxın zaman kəsiyində beynəlxalq birliyin məsələyə münasibəti müəyyən edəcək. Ancaq onu da yaddan çıxarmaq lazım deyil ki, qalibiyyətli müharibə Azərbaycanın şərəf məsələsidir".N.Miri hazırkı həssas məqamda informasiya savaşı yönündə KİV-in və özünü ekspert kimi təqdim edən şəxslərin də son dərəcə diqqətli və vətənpərvər olmalarının vacibliyini vurğuladı. Həmçinin son dərəcə ilginc informasiya verdi: “Təəssüf ki, bəzi mətbu orqanlar bilərəkdən və ya bilməyərəkdən ordumuzu gözdən salan, düşmənin öz xeyri üçün istifadə edə biləcəyi fikirlər yayırlar. Telman Əbilov kimi keçmiş hərbçilər isə belə bir həssas məqamda ermənilərə bağlı olan ”Reqnum" agentliyinə Azərbaycan ordusunu haqsız çıxaran açıqlamalar verirlər. Ermənilərin çoxlu itki verdiyi son atəşkəs pozuntusu haqda Telman Əbilov danışarkən Azərbaycan vətəndaşı kimi yox, erməni təəssübkeşi kimi danışıb. Dolayısı ilə Azərbaycan tərəfini günahkar və zəif təqdim edir. Belələrinin məqsədi və haradan qidalandıqları təəccüb və suallar doğurmaya bilmir. Bizim əlimizdə hətta konkret sənədlər var ki, Rusiya Hərbi Əks-Kəşfiyyat İdarəsinə Azərbaycandan hərbi-strateji informasiyalar ötürülür. Bu, vətənə xəyanətdir, zabit adına şərəfsizlikdir".İstefada olan polkovnik İldırım Məmmədov da Ermənistanın Azərbaycanı cana doydurduğunu və müharibənin hər an başlanma ehtimalının olduğunu bildirdi. Keçmiş hərbçi hesab edir ki, Azərbaycan ordusu Cənubi Qafqazda hər cəhətdən ən güclü ordudur: “Əgər Rusiya Ermənistana yardımçı olmasa, Azərbaycanla təkbaşına qarşı-qarşıya gəlsə, ordumuz qısa müddətdə onları darmadağın edəcək. Dağlıq Qarabağı Azərbaycan qısa müddətdə azad edə bilər”.İ.Məmmədov müharibənin hər an başlana biləcəyini beynəlxalq təşkilatların da nəzərə almalı olduğunu diqqətə çatdırdı.