Soydaşlarımız Berlində Sarkisyana qarşı aksiya keçiriblər

SON XƏBƏRLƏR

Soydaşlarımız Berlində Sarkisyana qarşı aksiya keçiriblər

2021.10.20, 07:36

Gunaz.tv

GünAzTv: "Bizə Vətənimizi qaytar!“, "İşğalçı siyasəti dayandır“ şüarları səsləndirilib.

Almaniyanın paytaxtı Berlindəki Azərbaycan diasporu Konrad Adenauer fondunun qarşısında etiraz aksiyası keçirib. Diasporla İş üzrə Dövlət Komitəsindən verilən məlumata görə, azərbaycanlılar Ermənistan prezidenti Serj Sarkisyan iyunun 21-23-də Almaniyaya rəsmi səfəri çərçivəsində Konrad Adenauer Fondunda "Cənubi Qafqazda təhlükəsizlik və inkişaf haqqında: Ermənistanın bu proseslərdə rolu“mövzusunda məruzə ilə çıxışına etiraz ediblər. Piketdə Azərbaycan bayraqları dalğalanıb, "Bizə Vətənimizi qaytar!“, "BMT-nin qətnamələrinə əməl et!“, "İşğalçı siyasəti dayandır“ məzmunlu şüarlar qaldırılıb. Aksiya iştirakçıları Dağlıq Qarabağ münaqişəsi, Xocalı facisəi haqqında həqiqətləri əks etdirən ədəbiyyat və digər məlumatlandırıcı vasitələr paylamaqla alman ictimaiyyətinin diqqətini bu mövzuya cəlb ediblər. Almaniyadakı Azərbaycanlıların Koordinasiya Mərkəzinin təşkil etdiyi etiraz aksiyasına Alman-Azərbaycan Həmrəylik Cəmiyyəti, Berlin Azərbaycan evi, Azərbaycan Kültür Ocağı, Azərbaycan Akademiklər Birliyi, Almaniyadakı Azərbaycanlı Tələbələr ve Elmi Işçilər Birliyi, Alman-Azərbaycan Akademiklər Birliyi, Bakılı klubu, LBN Boxstudio Magdeburg təşkilatının fəalları qatılıblar. Qeyd edək ki, Sarkisyanın nitqi əsasən birtərəfli faktlar üzərində qurulub. O öz çıxışında Cənubi Qafqazın sabit və qüdrətli bir regiona çevrilməsi üçün siyasi və iqtisadi inkişaf yollarını göstərməyə çalışsa da, əsas məqsədi Ermənistanın regiondakı əlverişli iqtisadi proyektlərə qatılmasının mühümlüyünü isbatlamaq olub. Ermənistan prezidentinə verilən suallarda bir çox mühüm məsələlərə toxunulub. Lakin Azərbaycanın ərazi bütövlüyü haqqında olan BMT qətnamələrinin yerinə yetirilməsi, işğal edilmiş Azərbaycan torpaqlarının, Dağlıq Qarabağ və 7 ətraf rayondan didərgin düşmüş azərbaycanlıların öz doğma ev-eşiyinə qaytarılması haqda olan suallara heç bir qənaətbəxş cavab verilməyib. Tədbirdə alman ictimaiyyətinin Azərbaycan həqiqətlərini bilən və dövlətimizin mövqeyini dəstəkləyən nümayəndələri, Azərbaycan Respublikası Diasporla İş üzrə Dövlət Komitəsinin əməkdaşı və Azərbaycn diasporunun nümayəndələri iştirak ediblər.

GUNAZ.TV

SON XƏBƏRLƏR