İranın nüvə proqramı məsələsində daha təhlükəli mərhələ başlayır (TƏHLİL)

SON XƏBƏRLƏR

İranın nüvə proqramı məsələsində daha təhlükəli mərhələ başlayır (TƏHLİL)

2021.10.20, 07:36

Gunaz.tv

GünAzTv: Bu mərhələdə İrana qarşı hərbi müdaxilə variantının gündəliyə çıxa biləcəyini düşünmək olar.

BMT Təhlükəsizlik Şurasının ardınca Avropa İttifaqı da İran əleyhinə əlavə sanksiyaların tətbiqi barədə qərar qəbul etdi. Brüsseldə toplaşan dövlət və hökumət başçıları İranın neft-qaz sektoruna sərmayə qoyuluşunun dayandırılmasını məqbul saydılar. Bu, rəsmi Tehranla əməkdaşlıq məsələsində avropalıların yeni siyasi kursa keçdiyindən xəbər verir. ABŞ-ın (Amerika Birləşmiş Ştatları) təkidləri sayəsində Rusiya da daxil olmaqla Qərb ölkələrinin bu dəfə sanksiyalar məsələsində daha radikallıq nümayiş etdirməsi nüvə proqramı problemi ətrafında dairənin sürətlə daraldığına bir işarə sayıla bilər. Bu mərhələdə cənub dövlətinə qarşı hərbi müdaxilə variantının gündəliyə çıxa biləcəyini düşünmək olar.

Rəsmi Tehran baş verənlərdən dərin təəssüf hissi keçirdiyini dilə gətirir. Xüsusilə, bu yaxınlarda İranın Türkiyə və Braziliya ilə birlikdə Tehranda nüvə proqramına dair üçtərəfli sazişə imza atmasından sonra sanksiya qərarının ortaya çıxması böyük narahatlıq doğurub. Ölkə prezidenti Mahmud Əhmədinecad bildirib ki, dünyanın istənilən ölkəsi sanksiyaları bəhanə edərək İran xalqının hüquqlarını zərrə qədər də tapdalasa, o ölkənin cavabı qəti surətdə veriləcək. Dövlət başçısının fikrincə, Qərb dünyası İran əleyhinə sanksiyalar tətbiq etməklə İsrail hökumətinin cinayətlərinin üstünə pərdə çəkmək istəyir. Bununla belə, Əhmədinecad rəsmi Tehranın danışıqlara həmişə hazır olduğunu bildirib. İran rəhbərliyinin BMT Təhlükəsizlik Şurasının qətnaməsi ilə əlaqədar yaydığı bəyanatda da bildirilir ki, İran xalqının milli maraqlarına, qanuni haqlarına və hüquqlarına qarşı yönələn hər bir addımın cavabı qanun çərçivəsində veriləcək.

Rəsmi Tehran Təhlükəsizlik Şurası və Avropa İttifaqının qətnamələrinə əhəmiyyət verməyəcəyini və bu sənədlərin reallığa əsaslanmadığını desə də, Rusiya və Çinin əvvəlkitək İrana dəstək verməməsi vəziyyəti bir qədər gərginləşdirir. Nəzərə alsaq ki, cənub dövləti istər Avropa ölkələri, istərsə də Çin üçün ciddi iqtisadi tərəfdaşdır və bu ölkələr sanksiyaların tətbiqinə kifayət qədər loyal yanaşır, Birləşmiş Ştatların İranla bağlı planını həyata keçirmək üçün şans əldə etdiyini bildirmək olar.

Beləliklə, İranın nüvə proqramı məsələsində daha təhlükəli mərhələ başlayır. «Altılıq ölkələri» öz mövqelərini qətiləşdirərək Türkiyə ilə danışıqlar aparır, bölgə dövlətləri ilə bu məsələdə əməkdaşlığı əhəmiyyətli hesab edirlər. Müşahidəçilər bildirirlər ki, Təhlükəsizlik Şurasının son iclasında ABŞ-ın tutduğu sərt mövqe proseslərin istənilən formada inkişafını proqnozlaşdırmağa imkan verir. Bu baxımdan Birləşmiş Ştatların dövlət katibi Hillari Klintonun regiona səfərinin bir nömrəli müzakirə mövzusu da məhz İran problemi olacaq.

«1-ci kanal»ın Analitik Qrupu

GUNAZ.TV

SON XƏBƏRLƏR