GünAzTv: İngiltərənin “Financial Times” qəzetinin beynəlxalq siyasət üzrə köşə yazarı Flipp Setfans son zamanlar dünyanın aparıcı mətbu orqanlarında Türkiyənin Şərqə meyllənərək Qərbdən üz döndərməsi haqda söylənilən fikirlərə etirazını bildirib. O, yazdığı məqaləsində Ankaranın Avropa Birliyiÿ hədəflərinin hələ yeni olduğunu qeyd edərək Yaxın Şərqdəki nüfuzlu, etibarlı və müstəqil Türkiyə simasının Qərb üçün olduqca önəmli olduğunu vurğulayıb.“Indiki zamanda Ankara Qərb üçün itirilmiş sayıla bilməz. Reallıq ondan ibarətdir ki, Türkiyəyə münasibətlərdə şərtlər dəyişib. Ankara artıq ABŞ və Avropada bir çox insanın düşündüyü kimi yazıq durumda deyil. Türkiyə iqtisadi cəhətdən dinamik inkişaf edən, siyasi cəhətdən özünəgüvənən bir ölkəyə çevrilib. Hətta Qərbin ona verdiyi səlahiyyətlərdən daha artığına sahibdir”, - deyə yazar qeyd edir.  Flipp Stefans Türkiyənin Şərq regionuna yönəlməsinə də toxunub. Ancaq Ankara bunu kimsənin səhvinə görə etmədiyini, əksinə, öz istəyi ilə həmin bölgəyə dair yaxınlaşma kursu tutduğunu vurğulayıb: “Ölkə öz istəyi ilə Şərqə meyllənir. Və bir zamanlar Osmanlı Imperiyasının nəzarəti altında olan bölgədə yenidən lider olmaq istəyir. Qərbin üz çevirdiyi Ankara qonşuları ilə münasibətlərini yaxşılaşdırmaq kursu tutub. Bölgədə özünü sübut etmək üçün iqtisadi və diplomatik fürsətlərdən istifadə edir.Qeyts Türkiyənin Şərq ilə Qərb arasında seçim qarşısında olduğunu və Vaşinqtonun son dönəmdə Ankara ilə münasibətlərində doğru yol tutduğunu söylədi. Ancaq bu, yalnış açıqlamadır. Ankara ilə Vaşinqton münasibətləri Türkiyənin 2003-cü ildə ABŞ-ın Iraq işğalına dəstək  verməkdən imtina etməsi ilə soyumağa başlayıb". Yazar Ankaranın Avropa Birliyinə üzv olma məsləsinə də toxunub. Onun fikrincə, Türkiyə Avropaya arxa çevirərək bölgədə artan nüfuzunun Avropa Birliyinə daxil olmasına təkan verəcəyinə inanır.“Ərdoğan hökumətinin üzvlərindən biri hansısa konfrans zamanı Avropa Birliyini tarixin ən böyük sülh layihəsi adlandırdı. Və Türkiyənin quruma üzvlüyünün reallaşmasını da regional və strateji bir məqsəd olduğunu bildirdi. Son olaraq Istanbulda gördüklərimdən sonra belə qənaətə gəldim ki, Türkiyənin niyyəti Qərblə konfliktə girmək deyil. Soyuq Savaşın bitməsindən 20 il sonra artıq özünün xarici siyasət kursunu formalaşdırmaq istəyir. Bir zamanlar Qərbin bir parçası olmaq Vaşinqtonun dediklərini yerinə yetirmək anlamı verirdi. Bu gün isə öz maraqlarına, fikrlərinə və haqlarına sahib olmaq istəyirlər. ABŞ və Avropada bəzi dairələr bunu həzm edə bilmir. Onların gözündə Türkiyə Qərbin hər zaman təzyiq etdiyi, əmr verdiyi və Ankaranın onlardan minnətçi düşdüyü ölkə kimi görsənir. Məsələnin də ironiya doğuran tərəfi məhz budur. Ancaq reallıq və proseslər onu göstərir ki, Şərq və Islam dünyasında etibarı getdikcə artan Türkiyə Qərbin itirməməsi vacib olan bir ölkədir”. Azadlıq qəzeti