GünAzTv: Fransada Qərbi Avropa İttifaqı Assambleyasının 58-ci sessiyası keçirilib. Bu barədə SİA Azərbaycanın Fransadakı səfirliyinə istinadən yazır ki, sessiyada Böyük Britaniyadan olan deputat Maykl Hankokun “Dondurulmuş münaqişələr və Avropanın təhlükəsizliyi” mövzusunda məruzəsi dinlənilib. Maykl Hankokun məruzəsi tanış olmaq məqsədilə yığıncaqdan əvvəl iştirakçılara paylanılıb. Azərbaycanın bu iki regionda əsasən sabitləşdirici rolunu yüksək qiymətləndirən M.Hankok münaqişələr həll edilməyəcəyi təqdirdə, bölgələrdə siyasi, iqtisadi və etnik sabitliyə daim təhlükə mövcud olacağını, bunun Avropa üçün də problem yaradacağını bəyan edib.

Dağlıq Qarabağ münaqişəsinə gəldikdə o, həmin bölgədə doğulan nəslin nümayəndələri ilə görüşündə onların hansı hisslərlə yaşadığını, doğma torpağa qayıdış arzularını qeyd edib, “Qəzzədən başqa dünyada elə bir yer yoxdur ki, bir ölkə digərini bu qədər işğal etsin. Biz şəraiti dəyişmək üçün çox az iş görmüşük”. Onun sözlərinə görə, işğalçılıq siyasəti Ermənistan iqtisadiyyatını çökdürüb: "İşğalçılıq siyasətinin davam etdirilməsi ağılsızlıqdır".

Azərbaycanı sessiyada təmsil edən Milli Məclisin deputatı Fuad Muradov Qərbi Avropa İttifaqı Assambleyası tərəfindən tərəflərə veriləcək siqnalın regionda çoxdan gözlənilən sülhün əldə olunmasında öhdəlik götürməkdə tərəddüd edənləri inandırmağa yardım edəcəyini bəyan edib. Deputat Azərbaycanın Minsk qrupunun həmsədrləri tərəfindən uzun müddət hazırlanan yeniləşmiş Madrid prinsiplərinə tövsiyə layihəsində verilən dəstəyi qiymətləndirdiyini və bunun gələcək fəaliyyət üçün əsas ola biləcəyini ifadə edib. Milli Məclisin deputatı ölkəmizin yeniləşmiş Madrid prinsiplərini qəbul eməklə sülhə nə qədər əhəmiyyət verdiyini nümayiş etdirdiyini, lakin Ermənistan tərəfindən bu istiqamətdə heç bir addım atılmadığını, bununla da regionda sülhün bərqərar olması barədə götürdüyü öhdəlikləri daim sual altında qoyduğunu bildirib.

 Sonda F.Muradov Azərbaycanın Şərq tərəfdaşlığı təşəbbüsü çərçivəsində Avropa İttifaqı tərəfindən Cənubi Qafqaz bölgəsinin hər üç ölkəsinə ciddi yanaşma gözləndiyini diqqətə çatdırıb.

Türkiyənin nümayəndəsi Birgen Keles Dağlıq Qarabağ münaqişəsinin Ermənistan və Türkiyə arasında yeganə məsələ olmamasından, bunun iki ölkənin yaxınlaşması ilə sıx bağlılığından, Türkiyənin Ermənistanın Azərbaycan ərazilərini işğal etməsinə cavab olaraq sərhədlərini bağlamasından söhbət açıb.

Məruzə ətrafında çıxış edən digər deputatlar dondurulmuş münaqişələrin tezliklə həll edilməsinin vacibliyini vurğulayıb, Minsk qrupu həmsədrlərini münaqişənin həlli istiqamətində səylərini artırmağa çağırıblar.