Müharibə ölkəmiz Azərbaycana 60-70 milyard manat ziyan vurub

SON XƏBƏRLƏR

Müharibə ölkəmiz Azərbaycana 60-70 milyard manat ziyan vurub

2021.10.20, 07:36

Gunaz.tv

GünAzTv: “Müharibənin Azərbaycana 60-70 milyard manat həcmində ziyan vurduğu hesablanıb. Amma torpaqlar azad olduqdan sonra bu ziyan yenidən dəqiqləşdiriləcək”. Bunu Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov deyib.

Onun sözlərinə görə, müharibənin Azərbaycana vurduğu ziyan Ermənistana vurulan ziyandan yüz dəfələrlə çoxdur. Bu barədə APA məlumat yayıb.

Komitə sədri deyib ki, 5-6 il əvvəl Azərbaycandan köçən ermənilər onlara ziyanın dəyməsi iddiası ilə Avropa Məhkəməsinə şikayət ediblər. Bunu görən Azərbaycan qaçqınları və köçkünləri də həmin quruma müraciət ünvanlayıblar: “Avropa Məhkəməsi bu məsələlərə baxmağa başlamışdı. Amma görünür, bu məsələdə də sonralar ermənilərin əli oldu. Avropa Məhkəməsi azərbaycanlı köçkünlərin kütləvi şəkildə müraciət etdiyini gördükdən sonra Azərbaycana daha çox ziyan dəydiyini bildiyi üçün bu işi bağlamağa başladı”.Ə.Həsənov həmçinin deyib ki, ağır şəraitdə yaşayan 400 min məcburi köçkünün 216 mini Bakıda məskunlaşıb. O bildirib ki, bu il Dövlət Neft Fondundan məcburi köçkünlərin həyat şəraitinin yaxşılaşdırılması üçün 80 mln. manat ayrılıb. Lakin fonddan əlavə vəsaitin ayrılacağı da güman edilir və bu il həmin məqsəd üçün ayrılan vəsaitin ümumi həcminin 100 mln. manatdan yuxarı olacağı gözlənilir. Ə.Həsənov bildirib ki, yay düşərgələri, pansionatlar, sanatoriyalar, bağçalarda məskunlaşan köçkünlərin köçürülməsi dövlət proqramında nəzərdə tutulur və bu proses tədricən həyata keçirilir: "Çadır şəhərcikləri dözülməzliyinə görə prioritet olduğu üçün ilk növbədə onlar ləğv edilib. Fəaliyyətdə olan hərbi hissələrdə köçkünlərin yaşaması da yolverilməzdir. İstismar müddəti 5-6 il olan fin qəsəbələrində köçkünlər 17-18 ildir ki, məskunlaşıblar. Məktəb binalarının yarısında dərsin keçirilməsi, yarısında isə köçkünlərin yaşaması dözülməzdir. Ona görə də ikinci mərhələdə bu yerlər seçilib. Ölkə prezidenti tələbə şəhərciyindəki yataqxanalardakı köçkünlərin köçürülməsi barədə tapşırıq verib. Bu proses tədricən həyata keçirilir".Ə.Həsənov köçürülmə zamanı bütün köçkünlərin istəyinin nəzərə alındığını da söyləyib. Amma o, bu il bütün yataqxanalardakı köçkünlərin köçürülməsi barədə yayılan məlumatları da təkzib edib: "Bu, böyük məsələdir. Hələ biz yalnız torpağı götürmüşük. Bundan sonra layihələşdirmə aparılmalıdır və vəsait ayrılmalıdır».

GUNAZ.TV

SON XƏBƏRLƏR