GünAzTv: BMT-nin açıqladığı rəqəmlərə görə, Qırğızıstanın cənubunda yaşanan etnik qarşıdurmalar üzündən 250 mindən çox insan son bir həftədə bölgədən qaçmaq məcburiyyətində qalıb.

Qırğızıstanda keçən həftə başlayan etnik toqquşmaların qarşısını almağa çalışan səlahiyyətlilər Oş şəhərində bir neft anbarını ələ keçirən bir qrup özbəklə müzakirələr aparırlar. Özbəklər hökumət qüvvələrinin anbarı ələ keçirməyə çalışacağı halda özlərini və anbarı havaya uçurmaqla hədələyirlər.Bu anbar ölkənin cənub hissəsinin neft ehtiyaclarının böyük bir hissəsini təmin edən paylama məntəqəsidir. Anbarda məskunlaşmış bir özbək nümayəndənin BBC-yə verdiy açıqlamaya görə, onlar günlərlə sürən şiddətli toqquşmaların ardından hökumətə və orduya güvənmirlər. O, BMT sülh qüvvələrinin vəziyyətə müdaxilə etməsini istədiklərini bildirib. Özbək fəalları sülh istədiklərini, ancaq təhlükəsizlikləri üçün səlahiyyətlilərdən gözlədikləri zəmanətləri ala bilmədikləri üçün sərt addımlar atdıqlarını deyiblər. Müzakirələrdə iştirak  edən bir qırğız səlahiyyətlisi başlıca məqsədlərinin daha çox qan tökülməməsini təmin etmək olduğunu deyib. Rəsmi rəqəmlərə  görə, toqquşmalar zamanı 170 adam ölüb, minlərlə adam mühacirət etməyə məcbur olub. Bu arada ABŞ nümayəndəsi Robert Bleyk on minlərlə özbək mühacirin toplandığı Özbəkistan sərhədini ziyarət etdikdən sonra Qırğızıstanın müvəqqəti rəhbərliyi ilə görüşəcəyini açıqlayıb. BMT-nin açıqladığı rəqəmlərə görə, Qırğızıstanın cənubunda yaşanan etnik qarşıdurmalar üzündən 250 mindən çox insan son bir həftədə bölgədən qaçmaq məcburiyyətində qalıb. Təşkilat özbək azlıqla qırğızlar arasında baş verən toqquşmalar üzündən getdikcə böyüyən mühacir böhranını önləmək üçün təcili yarldım mallarını hava yolu ilə göndərməyə hazırlaşır. BMT həmçinin təcavüz və cinayət xəbərlərinin qonşu ölkələrdə də etnik toqquşma hadisələrinə səbəb ola biləcəyindən narahatdır.

Başqa bir xəbərə görə, Qırğızıstanın cənubunda etnik zəmində baş verən zorakılıqların 190 nəfərə qədər qurbanının 3 gün davam edəcək dəfn mərasimləri başlanıb. Qırğızıstan hökumətinin rəsmiləri dünən ölkədə bayraqların yarıya qədər endirildiyini və əyləncələrin təxirə salınacağını bildirmişlər. Xəbər agentlikləri son iki gündə zorakılıqların azaldığını xəbər verir.  Xəbərlərdə qırğız hərbçilərin Oş şəhərinin küçələrində keşik çəkdikləri və bir keçə küçədə yoxlanış məntəqələri qurduğları deyilir.

Dünən eləcə də Qırğızıstanın təhlükəsizlik şurası başçısının yüksək səviyyəli rəsmilərlə ölkəyə humanitar yardımların çatdırılmasını sürətləndirmək yollarını müzakirə etmək üçün Moskvaya yola düşdüyü xəbər verilir. Humanitar yardımın bir hissəsinin artıq regiona çatdırıldığı bildirilir.