GünAzTv: Sənəd Dağlıq Qarabağ münaqişəsinin həllində ölkəmizə yeni şanslar verir.

Hərbi doktrina Azərbaycanın milli təhlükəsizliyinin təminatı strategiyasının tərkib hissəsidir, insanın, cəmiyyətin və dövlətin hüquq və mənafelərinin daxili və xarici hərbi və digər təhdidlərdən qorunmasına yönələn hərbi təhlükəsizlik sisteminin konseptual əsasını müəyyənləşdirən sənəddir. Müdafiə xarakterli olan bu sənəd hərbi təhlükəsizliyə təhdidlərin vaxtında aşkarlanması, təhlil edilməsi, qiymətləndirilməsi, qarşısının alınmasını nəzərdə tutur. Sənəd həmçinin dövlətin, əhalinin və ərazinin müdafiəyə hazırlanması, səmərəli hərbi təhlükəsizlik sisteminin yaradılması, müharibə və silahlı münaqişələrin qarşısının alınması, silahlı təcavüzün dəf edilməsi ilə bağlı məsələlərə dair Azərbaycanın mövqeyini əks etdirir. Hərbi doktrina Azərbaycanın təhlükəsizlik mühitini və milli maraqların həyata keçirilməsinə mane olan və ya onlara təhlükə yaradan şərait, proses və amilləri təhlil edir. 

Sənədə əsasən, Azərbaycan beynəlxalq təhlükəsizlik sferasında bir sıra problemləri özünün maraqlarına zidd sayır. Məsələn, iqtisadi, maliyyə böhranları, terrorizm, separatizm, ekstremizm və bir sıra mütəşəkkil cinayətkarlıqlar ölkənin təhlükəsizlik maraqlarını təhdid edən məqamlar kimi dəyərləndirilir. O cümlədən beynəlxalq enerci problemlərinin və geosiyasi maraqlar uğrunda mübarizənin bəzən silahlı toqquşmalarla müşayiət edilməsi də Azərbaycanın maraqlarına ziddir. Doktrinada Cənubi Qafqaz regionu üçün əsas təhdidlər də göstərilir. Bu sırada Ermənistanın Azərbaycan torpaqlarını işğal etməsi əsas yer tutur.

Hərbi doktrinada göstərilir ki, Azərbaycanın quru və su sahillərində hərbi bazaların yerləşdirilməsi, o cümlədən Dağlıq Qarabağa və Ermənistana hərbi və siyasi yardımların edilməsi, hətta qonşu ərazilərdə hərbi bazaların yaradılması da ölkəmiz üçün real təhlükədir. Sənəddə nüvə silahlarının yayılmasının da Azərbaycanın maraqlarına uyğun olmadığı bildirilir. 75 bənddən ibarət olan Hərbi doktrinanın hüquqi əsasını Azərbaycan Respublikasının Konstitusiyası, qanunları və digər normativ-hüquqi aktları, Milli təhlükəsizlik konsepsiyası, milli təhlükəsizlik sahəsində digər konseptual sənədlər, habelə Azərbaycanın tərəfdar çıxdığı beynəlxalq müqavilələr təşkil edir. Sənəddə Azərbaycan ərazilərində xarici hərbi bazaların yerləşdirilməsinə dair istisnalar da nəzərdə tutulur. Qeyd olunur ki, milli maraqlar tələb etdiyi halda, Azərbaycan belə bir səlahiyyəti özündə saxlayır.

Beləliklə, hərbi doktrina bugünkü reallıqlara əsaslanan və gələcəyə istiqamətlənmiş sənəd hesab olunur. Buna görə də sənəddə hərbi quruculuq perspektivlərinə böyük əhəmiyyət verilir. Ümumilikdə isə prioritet istiqamətlərdən Silahlı Qüvvələrin və digər hərbi birləşmələrin komanda və idarəetmə strukturlarının effektivliyinin artırılmasını, peşəkar əsaslarda digər hərbi birləşmələrin komplektləşdirilməsinə tədrici keçidi, müasir birgə müdafiə və hücum əməliyyatlarının keçirilməsi vərdişlərinin mənimsənilməsini, Silahlı Qüvvələr və digər hərbi birləşmələr arasında koordinasiya işinin effektivliyinin artırılmasını qeyd etmək olar. Hərbi doktrina Azərbaycanın təhlükəsizlik mühitinin daim dəyişən dinamikası nəzərə alınmaqla, yenidən baxılma, dəqiqləşdirmə və əlavələr üçün açıq sənəddir. 

Qəbul olunmuş sənədə müxtəlif səviyyələrdə reaksiya verilir. Cəmiyyətdə hərbi doktrinanın qəbulunun vacibliyi, burada əksini tapan bəndlərin həyata keçirilməsi üçün əlverişli şəraitin artıq mövcud olduğu fikri hakimdir. Bundan başqa, ekspertlər sənədin qəbulunun Ermənistanla müharibə şəraitində olan Azərbaycana hərbi siyasətini daha mükəmməl formada gerçəkləşdirə biləcəyini vurğulayırlar. Başqa sözlə desək, hərbi doktrina Dağlıq Qarabağ münaqişəsinin həllində ölkəmizə yeni şanslar verir.

«1-ci kanal»ın Analitik Qrupu