GünAzTv: Qəzzaya humanitar yardım aparan "Azadlıq donanması"na edilən hərbi əməliyyatla bağlı araşdırma aparılacaq. Belə bir bəyanatla İsrailin müdafiə naziri Ehud Barak çıxış edib.    Gözlənilməz bəyanatla çıxış edən İsrailin müdafiə naziri eyni zamanda Qəzzanın blokadasının müxtəlif yollarla davam etdirilməsi ilə bağlı məsələ üzərində də çalışdıqlarını bildirib. Bu arada İsrailin "Haaretz" qəzeti İsrail ordusunun "Mavi Mərmərə" gəmisinə hücum zamanı 9 türkün ölümü ilə nəticələnən basqınla əlaqədar dövlət araşdırma komissiyasının yaradılması barədə qərar verildiyi barədə məlumat yayıb. "Haaretz" həmçinin bildirir ki, araşdırma komissiyasının tərkibinə beynəlxalq və dəniz hüququ məsələləri üzrə mütəxəssislər cəlb olunacaq. Bundan başqa, komissiyaya ən azı 1 amerikan, 2 beynəlxalq hüquqşünasın da nəzarətçi qismində cəlb ediləcəkləri bildirilir.   GünAzTv mətbuat mərkəzinin “Fəftə-içi”-nə istinadən yaydığı məlumata görə, İsrailin Qəzza zolağına yardım aparan gəmilərə hərbi müdaxiləsi yalnız müsəlmanları deyil, yəhudiləri də ayağa qaldırdı. Başda İran və Livan olmaqla bir çox ölkə Qəzzaya yeni yardım gəmiləri göndərəcəklərini açıqladıqları bir zamanda İsraili ağır duruma salan xəbər Almaniyadan gəldi. "Orta Şərqdə sülh üçün yəhudi səsi" adlı dərnəyə aid olan Almaniya yəhudiləri Qəzzada mühasirənin aradan qaldırılması üçün iyulun başlanğıcında bir yardım gəmisi ilə yola çıxacaqlarını bildiriblər. 16 yəhudi sülh könüllüsünün olacağı yardım gəmisində qəzzalı uşaqlar üçün məktəb ləvazimatları, şirniyyat və musiqi alətləri aparılacaq. Gəmidə həmçinin Qəzza bölgəsindəki uşaqlara musiqi alətlərində ifa etməyi öyrətmək üçün musiqiçilər də olacaq. Bu arada bəlli olub ki, yəhudi gəmisinə yoldaşlıq etmək üçün İngiltərə, İsveç və Amerika yəhudilərinin və jurnalistlərin daxil olduğu daha 1 gəmi də Qəzzaya yola düşəcək.       İsrail Silahlı Qüvvələri Baş Qərargahının sabiq rəis müavini Uzi Dayan sərt açıqlama ilə çıxış edib. İsrail mətbuatının verdiyi məlumata görə, o deyib: "İsrail açıq şəkildə bildirməlidir ki, növbəti humanitar yardım gəmisi Qəzzanın blokadasını pozmağa cəhd etsə, bu ona qarşı hərbi əməliyyat kimi qiymətləndiriləcək. Əvvəlcədən demək istəyirik ki, Türkiyənin baş naziri bu aksiyanı dəstəkləyərsə, bu, müharibənin başlanması anlamına gələcək. Bu halda biz nəinki gəmini atəşə tutacaq, hətta onu batıracağıq".       İslam ölkələri başçıları ötən həftə Qəzzaya humanitar yardım aparan beynəlxalq donanmaya hücuma görə İsrailin cəzalandırılması və bu ölkəyə qarşı beynəlxalq tənqidlərin səsləndirilməsinin davam etdirilməsi barədə razılığa gəlib. İranın xarici işlər naziri Mənuçöhr Möttəki 57 müsəlman ölkəsindən ibarət İslam Konfransı Təşkilatının növbədənkənar iclasından sonra bunu bildirib. "Biz İsrailin addımını pisləməklə yanaşı, bir tərəfdən bu rejimin cəzalandırılması barədə razılığa gəlmişik. Digər tərəfdən isə İslam Konfransı Təşkilatı Qəzzanın digərləri ilə əlaqələr yaratmaq, ehtiyaclarını təmin etmək və humanitar yardımlar almaq üçün dəniz, quru və ərazi sərhədlərindən istifadə edə bilməsini tələb edir", - deyə o bildirib.      "İsraillə Türkiyə arasındakı münasibətlər bizim ölkənin ikitərəfli əlaqədə olduğu ölkələrlə müqayisədə ən qədimidir". Bu barədə İsrailin "Haaretz" qəzetinin yazarı Mohammed Salem öz məqaləsində qeyd edib. Müəllif iddia edir ki, yaxın zamanlara qədər strateji nöqteyi-nəzərdən Türkiyə ilə münasibətlər Misirlə münasibətlərdən az vacib deyildi. M.Salemə görə, bu problemlərin kökündə türk baş nazirin antiisrail bəyanatları durur. Bu bəyanatlar iki ölkə arasında qurulmuş sistemli, stabil münasibətlərin kəskin şəkildə pisləşməsinə səbəb olub. Bu gün İsrail cəmiyyətinin gözündə Türkiyə ən azı pisləniləsi və boykot ediləsi bir düşmən kimi görünür.      Onu da qeyd etmək lazımdır ki, Misirdən fərqli olaraq Türkiyə ötən 10 ildə İsraillə münasibətlərdə bütün səviyyələrdə aydın və dost əlaqələrinə sadiq qalıb. İsraillilər Türkiyəni qardaş ölkə sayıblar, iki ölkə arasında ticarət münasibətləri inkişaf edib, hərbi sahədəki münasibətlər xüsusilə çox ağıllı münasibətlər hesab olunurdu, iki ölkə rəsmilərinin bir-birinə səfərləri siyasi gündəmin ayrılmaz hissəsi idi. Türkiyənin Suriya ilə İsrail arasındakı danışıqlardakı rolu Qüds və Dəməşq probleminin yoluna qoyulmasında qarşılıqlı anlaşmaya gəlməyə dərindən kömək edib. Ən vacibi isə, İsraillə Türkiyə arasında münasibətlərin normallaşması ilə bağlı heç zaman fikir ayrılığı olmayıb. Münasibətlərdəki dramatik dəyişiklik seçkilərdə Rəcəb Tayyib Ərdoğanın rəhbərlik etdiyi Ədalət və İnkişaf Partiyasının qələbəsi nəticəsində baş vermədi. Bu partiya 2002-ci ildən hakimiyyətdədir. Baxmayaraq ki AKP-nin hakimiyyətə gələcəyi təqdirdə bəzi pessimist proqnozlar verilirdi, ancaq münasibətlər əvvəlki kimi qalırdı. Rəsmi olaraq münasibətlər onda qırıldı ki, İsrailin sabiq baş naziri Ehud Olmert Türkiyənin Qüds və Dəməşq arasındakı danışıqlarda vasitəçi olmasına və "Tökmə qurğuşun" əməliyyatının həyata keçirilməsində iştirakına etiraz etdi. Ərdoğanın İsraili tənqidi Avropa ölkələri və ABŞ-ın tənqidindən fərqlənir. Ərdoğanın tənqidi daha çox emosionallığı və açıqlığı ilə seçilir. Ərdoğan Qəzza zolağına İsrailin qoyduğu blokadanı qəbul etmir və bunun üçün heç bir səbəb də görmür. Eyni zamanda blokadanın mövcud olduğu 4 il ərzində İsrail də heç bir istəyinə nail ola bilməyib. Ərdoğanın birbaşa himayədarlığı ilə təşkil olunan "Azadlıq donanması" da Qəzzanın blokadasına etirazetmənin davamı idi.