GünAzTv: Nurçuların liderinin açıqlaması AKP-də də ciddi fikir ayrılıqlarının ortaya çıxmasına gətirib çıxarıb.Nurçuların lideri, ABŞ-da yaşayan Fətullah Gülənin İsrailin son hərəkətilə bağlı mövqeyi həm Türkiyədə, həm də Azərbaycanda ciddi müzakirə mövzusuna çevrilib. Yada salaq ki, Gülən "Wall Street Üournal"a verdiyi müsahibədə İsrailin icazəsi olmadan Türkiyənin Qəzza zolağına yardım aparmasını tənqid edib. Onun fikrincə, bu işin təşkilatçıları Qəzzaya yardım aparmazdan əvvəl İsraillə anlaşma yolunu seçməli idilər. O bildirib ki, nurçu hərəkatına bağlı olan dərnəklərə Qəzzaya humanitar yardım aparmaq üçün İsraildən icazə almaq tapşırılıb. Nurçuların lideri bu məsələnin BMT-də araşdırılmasının tərəfdarıdır. Ekspertlər Gülənin ABŞ-da yaşamasını əsas gətirərək bu mövqeni təbii sayır və ona qarşı hər hansı təzyiqlərin olması ehtimalını irəli sürürlər. Fətullah Gülənin İsraili müdafiə edən bəyanatından sonra isə ortaya başqa maraqlı məqamlar çıxıb. Baş nazir Rəcəb Tayyib Ərdoğan İsrail ünvanına yenə də sərt fikirlər səsləndirməkdədir. Ancaq baş nazirin birinci müavini Bülənd Arınc Güləni müdafiə edərək onun doğru söylədiyini bildirib. Eyni partiyanın rəhbərliyində təmsil olunan şəxslərin tamam əks mövqelər nümayiş etdirməsi ciddi marağa səbəb olub. Baş verənlər AKP daxilində fikir ayrılıqlarının olduğu barədə rəy formalaşdırır. Yada salaq ki, Gülən Türkiyənin indiki hakimiyyətinin, xüsusilə də Rəcəb Tayyib Ərdoğanın mənəvi müəllimi sayılır. Məsələ bu konteksdən də xeyli maraqlı görsənir. "Atlas" Araşdırmalar Mərkəzinin rəhbəri Elxan Şahinoğlu deyir ki, "Fətullah Gülən mühasirədə olan Qəzza bölgəsinə humanitar yardım aparan insanları ittiham edən bir açıqlama verib ki, bu da doğru yanaşma sayıla bilməz. Humanitar yardım aparmaq üçün İsraildən icazə alınmasına ehtiyac yox idi, çünki əvvəllər bu dövlətdən icazə alınmaqla aparılan yüklərin taleyi bir o qədər də yaxşı olmayıb. İsrail humanitar yükləri aylarla saxlayır, yardım ac-yalavac insanlara çatmırdı. BMT-nin Qəzzada təmsilçiliyi var, heç onlar yardım ala bilmirlər. Bu baxımdan Fətullah Gülənin açıqlaması çox ziddiyyətlidir, amma bundan daha ziddiyyətlisi AKP-dən verilən cavablardır. Bu təbii ki, fikir ayrılıqlarının mövcudluğunun göstəricisidir. Bir tərəfdən İsrail sərt tənqid olunur, digər tərəfdən isə hakim partiya təmsilçilərindən bəziləri Gülənin açıqlamasına haqq qazandırırlar. Hətta Fətullah Gülənin təsirində olan qəzetlər onun mövqeyilə hakimiyyət təmsilçiləri arasında ziddiyyət olmadığını göstərmək üçün müxtəlif bəhanələr fikirləşirlər, ancaq buna baxmayaraq ziddiyyətli yanaşmanın olması açıq-aşkar ortadadır. Buna görə də Gülənə yaxın olan qəzetlərin özləri pis vəziyyətə düşüblər. Həm Fətullah Güləninin mövqeyini müdafiə etməyə çalışırlar, həm də Türkiyə hakimiyyətinin. Bu ikisi bir araya sığmır. Ümumiyyətlə belə görsənir ki, Fətullah Gülənin Türkiyə hakimiyyətindən müəyyən narazılığı var. Ola bilsin ki, Gülən belə açıqlamalarla sətiraltı nələrisə qabartmağa, vurğulamağa çalışır. Bildiyiniz kimi son günlərdə Səadət Partiyası da aktivləşməyə başlayıb. Bu partiya da obrazlı şəkildə desək, Fətullah Gülənin köynəyindən çıxıb. Belə bir versiya da var ki, bu şəxs AKP-dən daha çox Səadət Partiyasına diqqət yetirməyə qərar verib. Belə bir versiya da mümkündür". Elxan Şahinoğlu deyir ki, Fətullah Gülənin ABŞ-da müəyyən təzyiqlərlə üz-üzə qaldığı fikiri ilə də hardasa razılaşmaq olar: "Fətullah Gülən ABŞ-da çox böyük ehtimalla "yaşıl kart"la yaşayır, təbii ki, ABŞ vətəndaşı deyil. Ola bilər ki, o, ABŞ-ın müəyyən dairələrilə sıx əlaqələr saxlayır. Əgər o birmənalı olaraq İsraili hədəfə alsaydı, onun ABŞ-da yaşamağı üçün müəyyən problemlər yarana bilərdi. Fətullah Gülən nə qədər din xadimi olsa da, reallıqları dəyərləndirməyi bacaran adamdır. Keçmiş fəaliyyətinə əsasən də demək olar ki, o öz fəaliyyətində bir çox məqamları nəzərə alır. Ola bilsin bu məqam var. ABŞ-ın müvafiq qurumları ilə arasında problem yaranmasın deyə belə bir açıqlama səsləndirib. Özü də bu açıqlama ABŞ-ın tam ürəyindən olan bir açıqlama idi". xalqcebhesi