GünAzTv: Sadə insanlar İsrailin beynəlxalq sularda üzən yük gəmilərinə hücum etməsini yolverilməz hesab edir.

İsrailin Qəzza sektoruna humanitar yardım aparan gəmilərə qarşı beynəlxalq sularda həyata keçirdiyi hərbi əməliyyat zamanı güc tətbiq etməsi və nəticədə insanların qətlə yetirilməsi beynəlxalq ictimaiyyəti hiddətləndirib.      Artıq BMT Təhlükəsizlik Şurası və NATO kimi təşkilatlar, eləcə də dünyanın əksər dövləti İsrailin hərbi aksiyasını pisləyib, məsələnin araşdırılmasını, cinayəti törətmiş şəxslərin cəzalandırılmasını, əsir və girovların azad edilməsini tələb edib. O cümlədən Azərbaycan da İsrail hərbçilərinin insan tələfatına səbəb olmuş aksiyasını pisləyib. Azərbaycanın Xarici İşlər Nazirliyi bu hadisənin qısa müddətdə araşdırılması və günahkarların cəzalandırılmasının zəruriliyini bəyanlayaraq hər zaman Qəzza sektorunda yaşayan əhaliyə humanitar yardım göstərilməsinin tərəfdarıdır.       Azərbaycan ictimaiyyətinin nümayəndələri, politoloqlar, ziyalılar, QHT və KİV nümayəndələri, sıravi vətəndaşlar İsrailin hərbi aksiyasını qətiyyətlə pisləyir, belə hallara qarşı əməli tədbirlərin görülməsini, cinayəti törətmiş şəxslərin cəzalandırılmasını, Qəzza sektoruna humanitar yardımın çatdırılmasına tətbiqlənmiş məhdudiyyətlərin aradan qaldırılmasını tələb edirlər. Bununla da Azərbaycan dövləti və ictimaiyyəti həmişəki kimi, bu dəfə də Türkiyənin yanında olduğunu, dost və qardaş ölkənin mövqeyini birmənalı şəkildə dəstəklədiyini əyani şəkildə nümayiş etdirmiş oldu. Düzdür, Azərbaycan bir müsəlman ölkəsi olaraq İsraillə diplomatik münasibətlərə, geniş iqtisadi-ticari əlaqələrə malikdir. O cümlədən beynəlxalq arenalarda da dövlət olaraq bir-birinin maraqlarını qoruyurlar. Yeri gəlmişkən, hazırda İsraildə vaxtilə Azərbaycanda yaşamış və hələ də özlərini azərbaycanlı adlandıran 100 mindən artıq yəhudi yaşayır. Amma bütün bunlar beynəlxalq qərarların kobudcasına pozulmasına göz yummağımıza əsas verə bilməz. Hətta bir vaxtlar ümummilli lider Heydər Əliyev də Pakistanda səfərdə olarkən Kəşmir məsələsində İslamabadın mövqeyini dəstəklədiyini açıq-aşkar bəyan etmişdi. Fikrini də belə əsaslandırmışdı ki, Kəşmirin statusu məsələsində BMT-nin qərarına görə, haqq Pakistanın tərəfindədir. Təbii ki, o vaxt Hindistan tərəfi H.Əliyevin beynəlxalq normalara əsaslanan bəyanatına açıq etiraz edə bilmədi. Bu gün də Azərbaycan İsrailin "Azadlıq karvanı" adını almış humanitar yükdaşıyan gəmilərə hücumunu pisləməklə artıq Qəzzaya bu cür yardımların göstərilməsini nəzərdə tutan BMT qərarlarına, ən azından isə insanlıq meyarlarına söykənib. Ona görə də Təl-Əvivin Bakıdan inciməyə haqqı yoxdur.      Təəssüf ki, digər türkdilli dövlətlər Azərbaycan kimi qətiyyətli mövqe tutmur, passiv, seyrçi olaraq məsələləri kənardan müşahidə etməyə üstünlük verirlər. Bu mövqe türkdilli dövlətlərin dövlət və hökumət başçılarının zirvə toplantılarında, o cümlədən 2009-cu ildə keçirilmiş Naxçıvan sammitində qəbul olunmuş qərarların ruhuna uyğun deyil. Digər təəssüf doğuran fakt isə bu məsələdə ərəb dövlətlərinin vahid mövqe nümayiş etdirməmələridir. Çünki İsrail hər dəfə bu cür beynəlxalq hüquqa zidd addımlar atanda adətən 22 ərəb ölkəsini birləşdirən Ərəb Dövlətləri Liqası təcili toplanar və sözdə də olsa, hansısa bəyanatla çıxış edərdi. Amma bu dəfə nədənsə, çox sönük reaksiya verildi. Bu da sanki Türkiyənin proseslərdə oynadığı lider mövqeyini qısqanmaqdan irəli gəlir. Çünki başda Səudiyyə Ərəbistanı, Misir və Suriya daim Türkiyənin islam dünyasında qüvvətlənməsini istəməyiblər.