GünAzTv: Ermənistan prezidenti Serj Sərkisyan iyunun 1-də Rostov şəhərində Rusiya prezidenti Dmitri Medvedyevlə görüşüb. Xəbər verildiyi kimi, Sərkisyan Rusiya prezidentinin prizi uğrunda təşkil edilən at yarışına tamaşa etmək üçün Rostova səfər edib. O, hər il keçirilən belə yarışa qatılan yeganə MDB dövlət başçısıdır.

GünAzTv mətbuat mərkəzinin “Musavat”-a istinadən yaydığı məlumata görə, Əvvəlki illərdən fərqli olaraq bu il Azərbaycan prezidenti də daxil olmaqla, MDB dövlət başçılarının demək olar ki, heç biri yarışa tamaşa etməyə getməyib. Rusiya prezidentinin rəsmi saytında yer alan məlumata görə, Medvedyevlə Sərkisyan işgüzar görüşdə iki ölkə arasında əməkdaşlığın indiki vəziyyətini, habelə Dağlıq Qarabağ münaqişəsinin nizamlanması, Türkiyə-Ermənistan münasibətləri də daxil olmaqla aktual regional problemləri müzakirə ediblər.Medvedyev görüşün mətbuata açıq hissəsində Rusiya və Ermənistanın “yaxın tərəfdaşlar və strateji müttəfiqlər” olduğunu bildirib. O, Sərkisyanla mayın 9-da Qələbə bayramı münasibətilə keçirilən tədbirlər zamanı keçirilən görüşünü xatırladaraq deyib ki, Ermənistan prezidentinin yenidən Rusiyaya gəlməsindən və sözügedən mərasimdə iştirakından məmnunluq duyur. Medvedyev qeyd edib ki, əvvəlki danışıqlarda olduğu kimi bu dəfə də iqtisadi əməkdaşlıq məsələlərinə dair müzakirə edilməli məsələlər var: “Eyni zamanda regional məsələləri də müzakirə etməliyik. Bir sözlə, sizə deməyə sözüm var. Mənim son günlər bir sıra mühüm səfərlərim olub, gizlətmirəm ki, həmin səfərlər zamanı Türkiyə-Ermənistan münasibətlərinin nizamlanmasını, eyni zamanda digər regional məsələləri müzakirə etmişik. Mənim bir sıra avropalı həmkarlarımla da kontaktlarım olub. Ona görə də fikir mübadiləsi aparmağımız vacibdir”.Sərkisyanla Medvedyev danışıqlardan sonra mətbuata açıqlama verməyiblər. Lakin Ermənistan prezidenti Rostovda  erməni diasporu ilə görüşü zamanı Türkiyə ilə münasibətlərdən və Qarabağ münaqişəsindən danışıb. Sərkisyan xatırladıb ki, Ermənistan-Türkiyə protokollarının ratifikasiyası dayandırılıb: “Əsasən ona görə ki, Türkiyə bu gün həmin protokolların ratifikasiyasına hazır deyil. Eyni zamanda Türkiyə bu prosesin iflasa uğramasına haqq qazandırmaq üçün müxtəlif ilkin şərtlər irəli sürür. Elə sferalarda bizimlə alver etmək istəyir ki, orada onun heç bir işi yoxdur. Mən əlbəttə ki, Qarabağ münaqişəsinin nizamlanmasını nəzərdə tuturam”. Ermənistan prezidenti Türkiyəni “etibarsız tərəfdaş” adlandıraraq deyib ki, bu ölkə əldə edilmiş razılaşmaları müntəzəm olaraq pozur. Ona görə də belə tərəfdaşla danışıqları davam etdirməyə lüzum yoxdur. “Vaxt göstərdi ki, Avropanın sonuncu bağlı sərhədlərinin açılması üçün Ermənistan əlindən gələni etdi, ancaq Türkiyə bu gün buna hazır deyil. Dağlıq Qarabağ probleminə gəldikdə isə biz öz müqəddəratını təyin etmə hüququ ilə alver etmək fikrində deyilik və bu məsələni heç kimlə müzakirə etmək fikrimiz yoxdur” deyə, Sərkisyan bildirib.Bu arada Ermənistan müxalifət mətbuatı yazıb ki, Sərkisyan at yarışına baxan yeganə dövlət başçısı olub. Belə ki, tribunada qondarma Abxaziya və Cənubi Osetiya “prezidentlərindən” başqa dövlət başçısı, o cümlədən Rusiya prezidenti yer almayıb. Ermənistan prezidentinin mətbuat katibi Aleksandr Arzumanyan isə deyib ki, Sərkisyan at yarışında iştirak etməyib. Onun dediyinə görə, səfər proqramında at yarışına baxmaq yer alsa da son anda proqram dəyişib: “Sərkisyan ikitərəfli görüşlərə görə ippodroma gedə bilməyib. Onun Rusiya prezidenti ilə ippodromda qeyri-rəsmi görüşü planlaşdırılsa da daha sonra prezidentlərin rəsmi görüş keçirməsi qərara alınıb. Görüş bir saat çəkib”. Göründüyü kimi, Sərkisyan Rostovda “bambılı” durumuna düşüb, o, at yarışına gedən yeganə MDB dövlət başçısı olub, üstəlik, ora çatanda məlum olub ki, tribunada qondarma “prezidentlər”dən və Rusiyanın bəzi regionlarının qubernatorlarından başqa yüksək rütbəli qonaq yoxdur. Rusiya prezidenti Dmitri Medvedev yarışın keçirildiyi vaxt Rostovda olsa da Avropa İttifaqı-Rusiya sammitində iştirak edib. Belə görünür ki, MDB ölkələrinin prezidentlərinin yarışa gəlmədiyini görən Medvedev də ippodroma getməyi lazım bilməyib.Ermənistanın xarici işlər naziri Edvard Nalbəndyan isə Kanadada erməni diasporu qarşısında Qarabağ məsələsindən danışarkən deyib ki, güc tətbiqi və ya güc tətbiqi ilə hədələmə “kozır” kimi istifadə edilməməlidir. Nalbəndyana görə, Azərbaycan rəhbərliyi “qılınc yelləməklə və hərbi ritorikaya üstünlük verməklə” Dağlıq Qarabağ əhalisinin rifahında maraqlı olduğu haqda bəyanatlarını təkzib edir: “Kiminsə qayğısına qalmaqla eyni vaxtda onu öldürməklə hədələmək nə dərəcədə məntiqlidir?”Qeyd edək ki, Qarabağ danışıqlarının dalana dirəndiyi bir vaxtda Ermənistan rəhbərliyinin mövqeyində son vaxtlar artan aqressivlik müşahidə edilir. Erməni rəhbərliyi, siyasətçiləri və hərbi çevrələri deyirlər ki, Azərbaycana “bir santimetr torpaq” da qaytarıla bilməz. Eyni zamanda Ermənistanda Azərbaycanın əraziləri qaytarmaq üçün hərbi yola əl ata biləcəyi ilə bağlı narahatlıqlar da açıq hiss olunur. Lakin bununla belə, rəsmi İrəvan Azərbaycan tərəfinin qəbul etdiyi yenilənmiş Madrid prinsiplərinə nə “hə”, nə “yox” cavabı vermir. Prezidentlər arasında danışıqların yaxın zamanlarda baş tutması ehtimalı zəifləyib. Rəsmi Bakı Ermənistanın danışıqları yenidən uzatmaq və 6 il əvvəli mərhələyə qayıtmaq səyləri ilə barışmaq fikrində olmadığını vasitəçilərə çatdırıb. Göründüyü kimi, Ermənistan rəhbərliyi Türkiyəyə qarşı da qəzəblidir və Sürix protokollarının iflasa uğradığını etiraf edir. Rəsmi İrəvan anlayıb ki, Türkiyə bu protokolları həyata keçirmək üçün Qarabağ şərtindən geri çəkilməyəcək.