GünAzTv: “The Sunday Times” qəzeti yazır ki, Fars körfəzindən İran ərazisindəki istənilən hədəf vurula bilər.

GünAzTv mətbuat mərkəzinin “Musavat”-a istinadən yaydığı məlumata görə, İsrail İrana qarşı müharibə hazırlıqlarını davam etdirir. Son məlumata görə, yəhudi dövləti İrana qarşı hücum əməliyyatlarına hazırlıq çərçivəsində Fars körfəzi sularına 3 sualtı qayıq göndərməyi qərara alıb. Almaniya istehsalı olan və dizellə işləyən bu sualtı qayıqlar nüvə başlıqlı raketlərlə təchiz olunub.

Gəmilərdən birinin artıq yola çıxdığı bildirilir. Onların Fars körfəzinə keçməsi üçün Misirin nəzarətində olan Süveyş kanalından keçməsi lazımdır. Bildirilir ki, Misir buna qeyri-rəsmi icazə verib. Bir neçə ay əvvəl İsrail sualtı qayıqları Süveyş kanalından keçərək Fars körfəzinə daxil olmuşdu və manevrlərdən sonra geri qayıtmışdı. Bu dəfə isə gəmilərin Fars körfəzində uzun müddət qalması nəzərdə tutulub. Məlumata görə, sualtı qayıqlarda uçuş məsafəsə 1500 kilometr olan raketlər yerləşdirilib. Bu raketlər Fars körfəzindən İran ərazisindəki istənilən hədəfi vura bilər.İsrail İranın nüvə obyektlərini sıradan çıxarmaq üçün əsasən havadan zərbələr endirməyi planlaşdırır. Lakin əməliyyatlara hərbi dəniz qüvvələri və xüsusi təyinatlıların qoşulması da nəzərdə tutulur. Amerika hərbi ekspertlərinin hesablamalarına görə, İsrail təkbaşına İrana qarşı hücumlara başlasa, hərbi potensialı müharibəni udmaq üçün kifayət etməyəcək. Belə ki, mümkün hərbi əməliyyatlar zamanı İsrail İran səmasına onlarla bombardmançı-qırıcı təyyarə göndərə bilər. Əgər İranın hava hücumundan müdafiə sistemlərinin işi elektron silahla sıradan çıxarılsa, o zaman həmin təyyarələr İranın əsas nüvə obyektlərini bombardman etmək üçün kifayətdir. Lakin İranın nüvə obyektləri ölkənin hər yerinə səpələnib, onların bir çoxu dərin bunkerlərdə yerləşir. Belə obyektləri vurmaq üçün ağır bombalar və onları daşıya bilən strateji aviasiya lazımdır. Belə silahlar və aviasiya isə ancaq ABŞ-da var. Digər tərəfdən, İranın hava hücumlarından müdafiə sistemləri İsrail təyyarələrinin bir hissəsini sıradan çıxara bilsə, o zaman havada üstünlük əldən verilə bilər. Bu səbəbdən İsrail hərbçiləri İrana qarşı hərbi əməliyyatlar planını dəfələrlə götür-qoy edir, həmçinin İranın mümkün cavab zərbələri hesablanır. Qeyd edək ki, Vaşinqton İsrailin İrana qarşı təkbaşına hücum əməliyyatlarına yaşıl işıq yandırmır. Birləşmiş Ştatlar nəzərə alır ki, əgər İsrailin zərbələri gözlənilən nəticəni verə bilməsə və İran cavab zərbələrində uzağa gedə bilsə, o zaman regionda vəziyyət kifayət qədər mürəkkəb xarakter alacaq. Bu isə ABŞ-ı istər-istəməz müharibəyə qoşulmağa məcbur edəcək. Eyni zamanda, ABŞ özü də İrana qarşı mümkün müharibəyə hazırlıq görür və bəzi ekspertlər ehtimal edir ki, iyul ayı müharibənin başlanması üçün ən uyğun vaxt olacaq. Hələlik Vaşinqton BMT Təhlükəsizlik Şurasından İrana qarşı yeni sanksiyaların tətbiqinə səy göstərir.