GünAzTv: Dünya liderləri 28 May – Respublika Günü münasibətilə prezident İlham Əliyevi təbrik ediblər.

Roma Papası XVI Benedikt Azərbaycan prezidenti Azərbaycanın Respublika Günü münasibətilə İlham Əliyevə təbrik məktubu göndərib.

Prezidentin mətbuat xidmətindən verilən məlumata görə, Roma Papası Azərbaycan Respublikasının milli bayramı münasibətilə prezidenti və bütövlükdə bütün vətəndaşları təbrik edib: “Tanrıdan diləyirəm ki, dövlət işləri ilə məşğul olan məsul şəxslər ümumi rifahı yüksəldərək və insanların hərtərəfli inkişafına zəmin yaradaraq, ölkələrinə hər zaman səmimi qəlbdən xidmət etsinlər. Ulu Tanrıdan Zati-alinizə və Azərbaycan xalqına xeyir-dua diləyirəm”.

GünAzTv mətbuat mərkəzinin İTV-yə istinadən yaydığı məlumata görə, BMT-nin baş katibi Pan Gi Mun da 28 may – Respublika Günü münasibətilə prezident İlham Əliyevə təbrik məktubu göndərib: “Ölkənizin milli bayramı münasibətilə Sizə, hökumətinizə və Azərbaycan xalqına ən səmimi təbriklərimi çatdırmaqdan çox məmnunam. Birləşmiş Millətlər Təşkilatı dünyanın aparıcı universal forumu olmaqda davam edir. İqlim dəyişikliyindən gender bərabərliyinədək, sülhün yaradılmasından inkişaf və insan hüquqlarınadək bütün qlobal xarakterli mühüm məsələlərdə BMT beynəlxalq ictimaiyyətin iradəsinin ifadə edilməsi və təşviqində zəruri vasitədir. Üzv dövlətlərin iştirakı bu proses üçün mühüm əhəmiyyət kəsb edir. Sizin dəstəyinizlə biz zəmanəmizin təhlükələrinin qarşısının alınmasına və hamı üçün daha firavan, bərabər və möhkəm dünyanın qurulmasına nail olacağıq. Xüsusilə, mən üzv dövlətlərin 2015-ci ilə qədər “Minilliyin İnkişaf Məqsədləri”nə nail olmaqda öz səylərini səfərbər edəcəklərinə ümid edirəm. BMT-nin qarşısında duran vəzifələr onun effektiv və çevik olmasını tələb edir. Mən ən yüksək standartların təyin edilməsi üzərində çalışıram və nəticələr əldə etmək qərarına gəlmişəm. Təqdirəlayiq haldır ki, BMT bütün atdığı addımlarda Azərbaycanın tövsiyə və dəstəyinə arxalana bilər”.

ABŞ (Amerika Birləşmiş Ştatları) dövlət katibi Hillari Klinton Azərbaycanı Respublika Günü münasibəti ilə təbrik edib. Dövlət Departamentinin İnternet saytında da yerləşdirilən bəyanatda  xanım Klinton deyib ki, 28 May Respublika Gününü qeyd etdikləri bir zamanda,  Prezident Obama və  Amerika  xalqı adından mən Azərbaycan xalqını ən səmimi arzularla təbrik edirəm.  O bildirib ki, “Zəngin tarixinizin və Azərbaycanın müstəqilliyini əldə etdikdən sonrakı inkişafının qeyd olunmasında biz sizə qoşuluruq.

Birləşmiş Ştatların  Azərbaycanla qarşılıqlı hörmət və qarşılıqlı maraqlar əsasındakı tərəfdaşlığı yüksək qiymətləndirdiyi qeyd olunan bəyanatda  ABŞ dövlət katibi Hillari Klinton deyir ki,” biz ölkələrimiz arasındakı yaxın əlaqələrin daha da möhkəmləndirilməsi üçün öhdəlik götürmüşük.”

Xanım Klinton  Azərbaycanın Respublika günü münasibətilə  verdiyi bəyanatının axırında bu bayram günü münasibətilə və  gələn il ərzində Azərbaycan xalqına sülh və firavanlıq arzuzunu bildirib.

Bundan başqa Qazaxıstan prezidenti Nursultan Nazarbayev, Almaniya prezidenti Horst Köler, Böyük Britaniya və Şimali İrlandiyanın Kraliçası II Elizabet, Pakistan prezidenti Asif Əli Zərdari, Səudiyyə Ərəbistanının Kralı Abdullah bin Əbdüləziz al Səud da 28 May – Respublika Günü münasibətilə Azərbaycan prezidentinə təbrik məktubları göndəriblər.