İranda təhsil alan azərbaycanlı tələbələr Əhmədinejaddan Ermənistanla əlaqələri kəsməyi tələb ediblər

SON XƏBƏRLƏR

İranda təhsil alan azərbaycanlı tələbələr Əhmədinejaddan Ermənistanla əlaqələri kəsməyi tələb ediblər

2021.10.20, 07:36

Gunaz.tv

GünAzTv: “On minlərlə müsəlmanı qətlə yetirən, ana-bacılarımızı əsir götürən təcavüzkar Ermənistanla dostluq hər şeydən öncə şəhid ailələrinə, əlillərə, qaçqınlara və işğal olunmuş torpaqları azad etmək barədə düşünən qeyrətli Azərbaycan müsəlmanlarına qarşı hörmətsizlikdir.” İranın Qum şəhərində dini təhsil alan azərbaycanlı tələbələr ölkə prezidenti Mahmud Əhmədinejada müraciət ünvanlayıblar. Bu barədə APA-ya məlumat verən tələbələr müraciətlərində İran prezidentindən Ermənistanla əlaqələri kəsməyi tələb etdiklərini bildiriblər: “Təəssüf ki, bu gün İran İslam Respublikasının Ermənistanla münasibəti Azərbaycanla münasibətdən daha səmimi nəzərə çarpır. Bunun səbəbini bilmirik, amma bu sahədə bəzi məqamları diqqətinizə çatdırmağı özümüzə borc bilirik. Ermənilərin Azərbaycan müsəlmanları ilə qarşıdurması tarixə erməni-müsəlman davası kimi düşüb. Qafqaz erməniləri orada soyqırımı törədəndə, azərbaycanlılarla yanaşı digər müsəlman xalqlar, o cümlədən kürdlər, talışlar, tatlar, ləzgilər və s. də onların qurbanına çevriliblər. Ermənilər “Böyük Ermənistan” xülyasıyla 1905-1907-ci illərdə minlərlə, 1918-ci ilin mart-aprel qırğınlarında on minlərlə, 1991-1994-cü illərdə isə 40 minə yaxın müsəlmanı qətlə yetiriblər. Təkcə 1992-ci ilin 26 fevral soyqırımında 613 dinc müsəlmanı amansızlıqla qətlə yetiriblər. Bu faciələrdə bizim yüzlərlə müsəlman bacı-qardaşımız xüsusi vəhşiliklə, gözü çıxarılmaqla, dili, burnu, qulağı və digər bədən üzvləri kəsilməklə, diri-diri basdırılmaqla, yandırılmaqla və digər qeyri-insani işgəncələrlə öldürülüblər”. Müraciətdə qeyd olunur ki, İranın Ermənistanla bugünkü əlaqələri təəccüb doğurur: “İslam Respublikasının öz müsəlman qardaşlarına hərtərəfli yardım üçün bütün imkanlarından istifadə etməsi, Ermənistana siyasi və iqtisadi təzyiqlər göstərməsi gözlənildiyi halda, işğalçı Ermənistanla dostluq əlaqələri günbəgün artır, iqtisadi münasibətlərin həcmi daha da genişləndirilir. Belə ki, hətta Ermənistan rəsmiləri belə İran hökumətinin təkliflərinə təəccüb edirlər”.Müraciəti imzalayan yüzdən artıq azərbaycanlı tələbə hesab edir ki, “müsəlman torpaqlarını işğal edən, on minlərlə müsəlmanı qətlə yetirən, bu ərazilərdə saysız-hesabsız İslam abidələrini – məscidləri, mədrəsələri, qəbiristanlıqları dağıdıb, yerlə yeksan edən, ana-bacılarımızı əsir götürən təcavüzkar Ermənistanla dostluq hər şeydən öncə şəhid ailələrinə, əlillərə, qaçqınlara və işğal olunmuş torpaqları azad etmək barədə hər an düşünən qeyrətli Azərbaycan müsəlmanlarına qarşı hörmətsizlikdir”. Müraciətin sonunda deyilir: “İnanırıq ki, qardaş İran Azərbaycanın maraqlarını elə öz maraqları bilib, onun ərazisinin 20 faizini işğal etmiş və 1 milyon vətəndaşını öz yurdundan didərgin salmış işğalçı Ermənistanla dostluq əlaqəsinə son qoyacaq”. Müraciətin surəti İranın bütün nüfuzlu liderlərinə, cümə imamlarına və bir çox nüfuzlu şəxsə göndərilib.

GUNAZ.TV

SON XƏBƏRLƏR