GünAzTv: Qüdrətli "5+1" ölkələri İranın son nüvə sazişindən qəti məmnun qalmayıb.

İran parlamentinin spikeri Əli Laricani bildirib ki, Birləşmiş Ştatlar Tehrana qarşı yeni sanksiyaların tətbiqinə çalışmağa davam etsə, ölkəsi Türkiyə və Braziliyanın vasitəçiliyilə nüvə yanacağına dair plandan imtina edə bilər. Dövlət televiziyası vasitəsilə yayımlanan çıxışı zamanı Əli Laricani onu da deyib ki, ABŞ BMT-nin Təhlükəsizlik Şurası, ya da Birləşmiş Ştatlar Konqresində sanksiyaların tətbiqi yönündə addım atsa, bu razılıq pozulacaq.    Onun sözlərinə görə, İran Beynəlxalq Atom Enerjisi Agentliyilə də əməkdaşlığı məsələsinə yenidən baxa bilər.    Xatırladaq ki, keçən həftə ABŞ və dünyanın başqa qüdrətli dövlətləri uran zənginləşdirilməsi proqramını dayandırmadığına görə İrana qarşı sanksiyaların dördüncü paketinin tətbiq edilməsini nəzərdə tutan BMT qətnaməsinin planını təsdiq edib. Bu arada isə İran televiziyasının yaydığı digər xəbərə əsasən, Tehran bu yaxınlarda imzaladığı nüvə sövdələşməsilə bağlı Beynəlxalq Atom Enerjisinə Nəzarət Agentliyinə məktub göndərib. "Reuters" agentliyinin məlumatına əsasən, Beynəlxalq Atom Enerjisinə Nəzarət Agentliyinə göndərilmiş məktubda İran tərəfi Braziliya və Türkiyənin iştirakı ilə əldə edilmiş sövdələşmənin şərtlərindən yazır. Sövdələşmədə söhbət İranın uranı xaricə göndərməsi şərtlərindən gedir. Məktubu İranın Atom Enerjisi Təşkilatının rəhbəri Əli Əkbər Salehi imzalayıb. Məktubda qeyd edilib ki, Tehranın fikrincə, aşağı səviyyədə zənginləşdirilmiş 1200 kg uranın Türkiyəyə göndərilməsi irəliyə atılmış addımdır.     İranın nüvə proqramına münasibətdə əsas maraqlı ölkələrin mövqelərində oxşarlıq nəzərə çarpır. Məsələn, Rusiya prezidenti Dmitri Medvedyev qeyd edir ki, bu razılığın beynəlxalq ictimaiyyətin tələblərinə cavab verməmək ehtimalı var. Ona görə də, İran da daxil olmaqla, bu məsələyə aidiyyəti olan bütün tərəflərin iştirakı ilə əlavə müzakirələr aparılmalıdır. Fransa tərəfi hesab edir ki, narahat olmaq, qorxmaq və şübhələnmək üçün əsaslı səbəblər var. Qərb hələ də İrandan inandırıcı cavablar gözləyir və əldə edilən razılıq bu cavabların yalnız bir hissəsidir. Böyük Britaniya hökuməti, sənədin qəbuluna baxmayaraq, yeni sanksiyaların tərəfdarı olduğunu bəyan edir. Ağ Ev rəsmiləri bu irəliləyişi müsbət addım adlandırsalar da, Birləşmiş Ştatlarda İranın üzərinə götürdüyü öhdəlikləri sonadək yerinə yetirəcəyi barədə şübhələr qalır. Nəhayət, Almaniya hökuməti də hesab edir ki, İranın daxildə nüvə materiallarını zənginləşdirib-zənginləşdirməyəcəyi məsələsi açıq qalır. Qeyd edək ki, Moskva və Pekin əvvəllər İrana qarşı yeni sanksiyaların əleyhinə olsalar da, son aylar bu məsələdə onlar Birləşmiş Ştatlar, Böyük Britaniya və Fransanın mövqeyini dəstəkləyir. Beləliklə, açıq görünür ki, "altılıq" ölkələri üçtərəfli sazişə müsbət yanaşsa da, onun nüvə probleminin tam həllinə gətirib çıxaracağına inanmırlar. Bu da BMT Təhlükəsizlik Şurasına yeni qətnamə layihəsinin təqdim edilməsinə təkan verib. ABŞ-ın dövlət katibi Hillari Klinton bildirib ki, layihə İran maliyyə institutlarına və şirkətlərinə qarşı sanksiyaların sərtləşməsini, İranın yük gəmilərinin yoxlanmasını nəzərdə tutur.    Belə vəziyyət, həm də, ekspertlərə görə, İrana qarşı müharibə ehtimalının açıq qaldığını göstərir. Rusiyanın "Pressentr" portalı isə yazır ki, əslində İranla bağlı Türkiyə və Braziliyanın imzaladığı yeni sazişə ABŞ-ın birmənalı yanaşmamasının əsas səbəbi də Vaşinqtonun Tehrana qarşı mümkün hərbi əməliyyatlarının qarşısına hər hansı hüquqi maneə qoymamaq istəyindən irəli gəlir. Baki-xeber