GünAzTv: Azərbaycan torpaqlarının işğal olunmasında əli olan, Ermənistanla və seperatçı qurumla hər cür münasibətlər quran İran öz ampulasına sadiqdir. Bu günlərdə redaksiyamıza məlumatlı mənbələrdən daxil olan məlumat da təsdiqləyir ki, molla rejimi hər zaman müsəlman qardaşlığından, birliyindən danışsa da, müsəlmanları qanına qəltan edən ermənilərə "qardaş" deməkdən əl çəkmək niyyətində deyil. Etibarlı mənbə bildirir ki, seperatçı rejimin və işğalçı qoşunların hərbi texnikasını yanacaqla İran təmin edir. Məlumata görə, İran dövlət nömrə nişanlı maşınlar çəkinmədən erməni hərbi hissələrinə daxil olaraq onların yanacaq təminatını ödəyirlər. Bu fakt molla rejiminin xislətini bir daha göstərir. Doğrudur, Ermənistanın və seperatçı rejimin yanacaq problemini İranın həll etməsilə bağlı əvvəllər də informasiya verilirdi. Ancaq hərbi hissələrə İran avtomobillərinin daxil olması yeni məsələdir. Məsələylə bağlı münasibətini öyrəndiyimiz Azərbaycanın İrandakı sabiq səfiri Əlyar Səfərli deyir ki, molla rejimi bu günə qədər Ermənistana əlindən gələn köməyi ən yüksək səviyyədə göstərib: "İran Ermənistanın, o cümlədən seperatçı rejimin ordusunu hər zaman ərzaqla, yanacaqla təmin edir. Hətta döyüşlərdə iştirak etmiş şəxslər dəfələrlə bildiriblər ki, müharibə dövründə ermənilərin yararlandığı ərzağın İran istehsalı olmasını öz gözlərilə görüblər. Mən özüm səfir işləyən zaman dəfələrlə şahidi olmuşam ki, Arazın üzərində olan körpüdən maşın karvanı Ermənistana ərzaq, yanacaq daşıyır. Bununla bağlı dəfələrlə müstəqil şəkildə öz etirazımı bildirmişəm, İranın xarici işlər nazirliyinə məktub ünvanlamışam. Belə əməllərin xəyanətdən başqa adı yoxdur. Onlar üzdə danışırlar, amma əməldə tamam əks mövqe tuturlar. Bu isə saxtarlıqdır. Əslində farsların qardaşı müsəlmanlar yox, ermənilərdir. İran müharibə dövründə Ermənistana əlindən gələn köməyi əsirgəməsəydi, onlar məğlub olardılar. Yenə də deyirəm, İranın siyasəti qeyri-səmimi siyasətdir. Onların siyasətinin 20 üzü var. Ümumiyyətlə, İran arzulayır və çalışır ki, Quzey Azərbaycanı da Güney Azərbaycan kimi özündən asılı vəziyyətə salsın. Eyni zamanda, bəzi torpaqlarımız Ermənistana qalsın. Qalan hissələrini isə özü mənimsəsin. Hiyyətlərinə çatmaq üçün islam inqilabını burada həyata keçirmək istəyindədirlər. Biz başa düşməliyik ki, İranın bizə münasibəti bundan fərqli olmayacaq. Heç cür İrana etibar etmək olmaz. Onu da deyim ki, molla rejiminin işğal olunmuş torpaqlarda müəyyən obyektləri fəaliyyət göstərir. İran ikinci Xudafərin dəryaçası yaradıb ki, məhz bunun nəticəsində Bakı-Şərur yolu su altında qalmaqdadır. Bu da İranın xəbis, riyakar siyasətinin nəticəsidir. Bu ölkənin yaratdığı su dəryaçalarının sayı-hesabı yoxdur. İstisna olunmur ki, sabah suyun ağzını açmaqla bizim üçün ciddi problemlər yaradacaqlar. Bundan başqa beş min nəfərdən artıq gənci Ermənistana oxumağa göndərir, onlara hər cürə şərait yaradırlar. Bu faktlar məncə çox şey deyir. İranın iç üzünü açmaq lazımdır". Əlyar Səfərli təəssüflə bildirir ki, Azərbaycanda bəzi din adamları İranın təsiri altındadırlar: "Təəssüf ki, bizim bir sıra dindarlarımız avantürst çıxışlar edirlər. Məscidlərimiz iranlaşdırılıb, farslaşdırılıb. Böyük panfarsist qüvvələr ölkəmizdə fəaliyyət göstərməkdədir. Üstəlik, gündə bir məscid tikirlər. İranın "İmdad" cəmiyyəti həm də ailələrimizin içərisinə girir. İran Mədəniyyət Mərkəzi ölkəmizin içində ikinci bir dövlət yaratmaqdadır. Azərbaycan əleyhinə çoxlu kitablar, nəşrlər təbliğ edib yayırlar. Qum şəhərindən gətirilən zərərli kitablar ölkəmizdə təbliğ olunur. Məscidlərdə Xomeyninin təbliğatı aparılır. İran Azərbaycanın elmi-tədqiqat institutlarına da vəsait ayırır. Nəticədə bu institutlarda tematik İran planları həyata keçirilir. Ancaq Cənubi Azərbaycanla bağlı bir dənə mövzu işlənmir. İranın bu əməllərinə qarşı ciddi şəkildə təşkilatlanmalı, qurumlar yaratmalı, gənclərimizi səfərbər etməliyik. Bəzi gəncləri İranın ideoloji təsirindən xilas etmək lazımdır. Molla rejimi bizim beynimizə xurafatı yeritmək istəyindədir". Xalq Cəbhəsi