NATO Azərbaycan paytaxtında iclas keçir

SON XƏBƏRLƏR

NATO Azərbaycan paytaxtında iclas keçir

2021.10.20, 07:36

Gunaz.tv

GünAzTv: NATO-nun Ali Mülki Fövqəladə Planlama Komitəsi öz plenar iclasını müstəsna hallarda NATO-nun Brüsseldəki Mənzil Qərargahından kənarda keçirir.

Bakıda Avro-Atlantik Tərəfdaşlıq Şurası (AATŞ) formatında NATO-nun Ali Mülki Fövqəladə Planlama Komitəsinin (AMFPK) plenar iclası başlayıb. Tədbirdə NATO-ya üzv və tərəfdaş dövlətlərin, NATO-nun müvafiq strukturlarının nümayəndələri iştirak edirlər. İclasda çıxış edən NATO baş katibinin əməliyyat planlaması üzrə müavini, səfir Maurits Yohems dəyərli əməkdaşlığa və plenar iclasın yüksək səviyyədə təşkilinə görə Azərbaycan tərəfinə təşəkkürünü bildirib.

Bundan sonra, fövqəladə fallar naziri, general-polkovnik Kəmaləddin Heydərov qısa giriş nitqi ilə çıxış edib. Nazir çıxışında Azərbaycanla NATO arasında artan tərəfdaşlığın dinamikasını, o cümlədən mülki fövqəladə planlama sahəsində əməkdaşlığın xüsusi vacibliyini vurğulayıb. K. Heydərov AATŞ məkanında təbii və texnogen xarakterli fəlakətlərin baş vermə tezliyini yada salaraq, bu sahədə əməkdaşlığın daha da möhkəmləndirilməsinin əhəmiyyətini qeyd edib: “Azərbaycan bu əməkdaşlığa öz töhfəsini verməkdə davam edəcək, o cümlədən beynəlxalq xilasetmə əməliyyatlarına da töhfə verməyə qadirdir”.

Daha sonra nazir hazırda respublika arasında baş verən daşqınların qarşısını almaq və nəticələrini aradan qaldırmaq istiqamətində görülən tədbirlər barədə məlumat verib.

Qeyd edək ki, NATO-nun Ali Mülki Fövqəladə Planlama Komitəsi öz plenar iclasını müstəsna hallarda NATO-nun Brüsseldəki Mənzil Qərargahından kənarda keçirir. Bu plenar iclasın Azərbaycanda keçirilməsi NATO-nun Azərbaycanla tərəfdaşlığın, o cümlədən mülki fövqəladə planlama sahəsində əməkdaşlığının vacibliyinin tanınmasının göstəricisidir.

Plenar iclas sabah öz işini NATO müttəfiqlər formatında davam etdirəcək.

Qeyd edək ki, iclasın əsas məqsədi 2010-2013-cü illər üzrə AMFPK-nın planlaşdırma büro və komitələrinin iş proqramı, 2011-2015-ci illər üzrə treninq və təlimlərlə bağlı fəaliyyət proqramı, kimyəvi, bioloji, radioloji və nüvə təhlükəsizliyi sahəsi mütəxəssisləri ilə mümkün hücumlara qarşı mülki hazırlığın təkmilləşdirilməsi üçün AMFPK-nın fəaliyyət planının, həmçinin, fövqəladə hallar və fəlakətlər zamanı yardım imkanları və digər aidiyyəti məsələlərin müzakirəsidir.

Tədbir çərçivəsində mülki fövqəladə planlaşdırma və böhranların idarə olunması sahəsində FHN-in NATO-nun müvafiq strukturları ilə əlaqələrinin inkişaf etdirilməsi üçün bir sıra görüşlər keçiriləcək və qarşılıqlı maraq doğuran məsələlər müzakirə ediləcək.

GUNAZ.TV

SON XƏBƏRLƏR