Qırğızıstanda vəziyyət sabitləşmir

SON XƏBƏRLƏR

Qırğızıstanda vəziyyət sabitləşmir

2021.10.20, 07:36

Gunaz.tv

GünAzTv: Qırğızıstanda vəziyyət yenidən gərginləşib. Mayın 14-də səhər Qırğızıstanda indiki hökumətlə sabiq prezident Kurmanbek Bakiyevin tərəfdarları arasında yeni toqquşmalar yaşanıb. Vəziyyət Bakiyevin tərəfdarlarının mayın 13-də ölkənin cənubundakı iki şəhərdə – Cəlalabad və Oş vilayətlərində administrasiya binalarını ələ keçirməsindən sonra pisləşib. Dünən səhər yeni hökumətin tərəfdarları binaları geri qaytarmaq istəyiblər. Oşdakı toqquşmalarda 400-ə yaxın adamın iştirak etdiyi bildirilir. Xəsarət alanların olduğu, eləcə də atəş səslərinin eşidildiyi bildirilir. Məlumata görə, Qırğızıstanın sabiq prezidentinin Müdafiə Komitəsi ölkənin cənubunda 25 min tərəfdar yığıb. Bakiyevin hüquqlarının müdafiəsi Komitəsinin əvvəlki rəhbəri Janara Moldokulova bildirib ki, mitinqə Cəlalabad vilayətinin bütün rayonları üzrə Bakiyevin tərəfdarları cəlb olunacaq. “Biz 10 minlərlə insanın iştirak edəcəyi aksiyada Kurmanbek Bakiyevin həqiqi və qanuni prezident olduğunu təkid edəcəyik” - deyə o bildirib. Bir müddət keçəndən sonra müvəqqəti hökumətin tərəfdarı olan “Ak-niet” gənclər hərəkatının üzvləri “24.kg” saytına bildiriblər ki, Bakiyevin tərəfdarları tərəfindən zəbt edilən Batken vilayətinin inzibati binası artıq azad edilib. Bina danışıqlar nəticəsində boşaldılıb. Vilayət xəstəxanasının baş həkimi Abdullatip Şamşiyevin verdiyi məlumata görə, toqquşma nəticəsində 28 nəfər yaralanıb. Onlardan 10 nəfəri güllə yarası ilə xəstəxanaya gətirilib. Onun sözlərinə görə, xəstəxanaya meyit gətirilməyib və yaralılardan 5-i əməliyyat olunur. Qırğızıstanın Oş vilayətinin dövlət administrasiya binası isə vilayətin qubernatoru vəzifələrinin icraçısı S.Jeenbekovun nəzarəti altına keçib. O da qeyd edilib ki, Qırğızıstanın devrilmiş prezidenti Kurmanbek Bakiyev hakimiyyəti geri qaytarmaq üçün qəti həmləyə hazırlaşır. “Exo Moskvı” radiosunun yaydığı məlumata görə, Qırğızıstan Dövlət Televiziyasında Kurmanbek Bakiyevin keçmiş məsləhətçisi Usen Sadıkovun səsi yazılmış audiolent səsləndirilib. Audiolentdə bir neçə nəfərin söhbəti yazılıb. Danışanlardan birinin Usen Sadıkov olduğu və aksiyaların təşkilində əsas rol oynadığı bildirilib. Usen Sadıkov ölkənin cənubunda aksiyaların təşkili ilə bağlı göstərişlər verir, eyni zamanda müvəqqəti hökumətin bir neçə nazirini əsir götürməklə bağlı çağırış edir. Dünən günorta saatlarında Bakiyevin keçmiş müşaviri, «Yeni Qırğızıstan» partiyasının lideri Usen Sadıkov Oş vilayətində həbs edilib. Müvəqqəti hökumət onu Oşda baş verən hadisələri təşkil etməkdə günahlandırıb. Axşama yaxın isə Cəlalabad şəhərində Bakiyevin tərəfdarları ilə əleyhdarları arasında baş verən silahlı toqquşma nəticəsində 3 nəfərin həlak olduğu, 34 nəfərin yaralandığı barədə məlumat yayılıb.

GUNAZ.TV

SON XƏBƏRLƏR