GünAzTv: Sabirabadın bəzi kəndlərinin sakinləri artıq evlərinə dönürlər.

Ölkəni cənginə alan daşqınların nəticələri hələ aradan qaldırılmamış, yenidən Zərdab rayonunun iki kəndi subasma təhlükəsi ilə üzləşib. Rayonun Qoruqbağı və Sarıqaya kəndlərinin əhalisində bununla bağlı narahatlıq var. Qoruqbağı kənd sakini, jurnalist Nicat İntiqam Lent.az-a bildirib ki, hazırda kənddə bir neçə ay əvvəl eni 3-4 metr olan bəndin eni təqribən 10-15 santimetrədək azalıb.       Onun sözlərinə görə, bənd uçsa, Sarıqaya və Qoruqbağı kəndi subasma təhlükəsi ilə üzləşə bilər. Nicat İntiqam deyir ki, Zərdab rayonunda Kürün məcrasından çıxmasının qarşısını almaq üçün ciddi tədbirlər görülsə də, bu kəndlərin ərazisindəki vəziyyət hələ dəyişməyib.       Xaçmazda da sel təhlükəsi      Qudyalçayda suyun səviyyəsinin artması Xaçmazın Köhnə Xaçmaz kəndindəki evlər üçün təhlükə yaradıb. Artıq bir evin həyətinin bir hissəsində su torpaq sahəsini yuyub, aparıb. Köhnə Xaçmaz kənd bələdiyyəsinin sədri Rəhman İsrafilovun məlumatına görə, Qudyalçayın kənarında 15-ə yaxın yaşayış evi var. Bələdiyyə sədrinin sözlərinə görə, təhlükənin qarşısını almaq üçün əraziyə texnika cəlb olunub.       Suvarma sistemləri idarəsinin baş mühəndisi Bəybala Poladov isə Lent.az-a bildirib ki, əraziyə iki texnika cəlb edilib. Çayda suyun səviyyəsinin çox olması səbəbindən texnikalar intensiv işləyə bilmir.      Xatırladaq ki, Quba Regional Hidrometeorologiya müəssisəsi regionda yarana biləcək sel təhlükəsi ilə əlaqədar may ayının 11-də bölgənin 6 rayonunun müvafiq qurumlarına xəbərdarlıq edib.       Leysan gözlənilir      Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosundan verilən məlumata görə, rayonlarda mayın 15-də gündüz hava əsasən yağmursuz keçəcək. Lakin axşam və gecə bəzi yerlərdə şimşək çaxacağı, leysan xarakterli qısamüddətli yağış yağacağı gözlənilir. Səhər ayrı-ayrı yerlərdə duman olacaq. Şərq küləyi əsəcək. Havanın temperaturu gecə 15-17 dərəcə, gündüz 24-27 dərəcə, dağlarda gecə 5-10 dərəcə, gündüz 15-18 dərəcə isti olacaq.       Sabirabadın bir neçə kəndinin sakinləri evlərinə qayıdır      Sabirabad rayonunun Azadkənd, Polad Toğayı, Sarxanbəyli, Hacıbəbir, Deşdəli, Bala Həşimxanlı və Yaxa Dəllək kəndlərinin çadırlarda yerləşdirilən sakinlərinin geri qaytarılmasına başlanıb. Bu barədə Kürün daşması nəticəsində baş verən təbii fəlakətin nəticələrinin aradan qaldırılması məqsədi ilə yaradılan operativ qərargahda hökumət nümayəndələrinin iştirakı ilə keçirilən müşavirədə qərar qəbul olunub. Müşavirədə adıçəkilən kəndlərin elektrik enerjisi, su təminatı, infrastrukturunun bərpası barədə də göstərişlər verilib.      Sabirabad rayon İcra Hakimiyyəti başçısının müavini, rayon Fövqəladə Hallar Komissiyasının sədri Vəfadar Bağırovun sözlərinə görə, artıq sakinlərin avtobuslarla evlərinə köçürülməsinə başlanıb.      Qeyd edək ki, adıçəkilən kəndlərin sakinləri Kürün daşması ilə bağlı təhlükə yarandığı üçün köçürülüblər. Şərq