GünAzTv: Düşmən Sərsəng su anbarından böyük həcmdə su buraxmaqla sel fəlakətini gücləndirir.

Azərbaycanı bürüyüən sel fəlakətini doğuran səbəblərdən daha biri məlum olub. Demə, daşqının əhatə dairəsinin genişlənməsinə ermənilərin də "xüsusi xidmətləri" varmış.    Azərbaycanda yaranmış böhranlı vəziyyətdən istifadə edən düşmən işğal altında saxladığı Sərsəng su anbarından böyük həcmdə suyu buraxmağa başlayıb. Bu barədə Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktor əvəzi Umayra Tağıyeva məlumat verib. Onun sözlərinə görə, yaxın günlərdə Kür və Araz çaylarında yüksək sululuğunun davam edəcəyi gözlənilir. Bunun səbəblərindən biri Tərtərçayda yüksək sululuğun müşahidə olunmasıdır. Ermənilər tərəfindən böyük həcmdə buraxılan suyun miqdari 76 kubmetr/saniyə təşkil edir. Bu da çayın aşağı axınında böhran vəziyyəti yaradır.    U.Tağıyevanın sözlərinə görə, mayın 15-dən 16-dək, əsasən gecə və axşam saatlarında ölkənin bəzi rayonlarında, eyni zamanda Gürcüstan ərazisində gözlənilən leysan xarakterli yağışlarla əlaqəli çaylarda yüksək sululuğun davam edəcəyi, bəzi çaylardan qısamüddətli daşqın və sel keçəcəyi ehtimal olunur. Mayın 16-sı gündüzdən havanın nisbətən sabitləşməsi, mayın 17-də də, əsasən yağmursuz keçməsinə baxmayaraq, yüksək dağlıq ərazilərdə qar örtüyünün əriməsi hesabına çaylarda yüksək sululuq davam edəcək, lakin ötən günlərlə müqayisədə sululuğun nisbətən azalması, tədricən ongünlük normasına yaxınlaşması gözlənilir.    Saatlı xilas oldu?!    Mayın 12-də Saatlı rayonu ərazisindəki Sarısu gölü daşıb və su axını Mil-Muğan kollektoruna yönəlib. Beləliklə, rayonun Nərimankənd kəndi, Nərimankənd əarzisində yeni salınmış məcburi köçkünlərin qəsəbəsi, Hacı Qasımlı, Məzrəli və Kamallı kəndləri təhlükə altında qalıb. Məcburi köçkünlərin qəsəbəsi, Nərimankənd kəndinin sakinləri köçürülüb, digər kəndlərin sakinlərinin isə bir çoxu evlərini tərk edib.    Saatlı rayon sakini Şamil Hacıyev "Turan"a bildirib ki, Fövqəladə Hallar Nazirliyinin, Daxili Qoşunların əsgərlərinin, yerli əhalinin fədakarlığı nəticəsində gölün daşmasının qarşısı alınıb və su məcrasına yönəldilib.    Rayonun Novruzlu kəndi istiqamətində təhlükəli vəziyyət var. "Əgər kəndin ətrafındakı bənd yarılsa, kənd suyun altında qala bilər. Uşaqlar, qadınlar və qocalar kənddən çıxarılıb. Kənddə əsasən kişilər qalıb".    Saatlı Rayon İcra Hakimiyyəti başçısının birinci müavini, Fövqəladə Hallar Komissiyasının sədri İlham Quliyev isə APA-ya bildirib ki, Saatlıda bəndin dağılması və kəndləri subasması ilə bağlı yayılan xəbərlər əsassızdır: "Əksinə, suyun səviyyəsi bir qədər də aşağı düşüb".    "Meliorasiya və Su Təsərrüfatı" ASC-nin prezidenti Əhməd Əhmədzadə isə jurnalistlərə Saatlıdakı Sarısu gölündə suyun səviyyəsinin qalxması ilə bağlı ciddi təhlükə olmadığını deyib. Onun sözlərinə görə, hazırda göldən axan su kollektor vasitəsi ilə yönləndirilir. Gölün ətrafına əlavə texnika və canlı qüvvə cəlb olunub.    Ə.Əhmədzadə onu da deyib ki, Şirvan şəhərinin Bayramlı qəsəbəsi və Sabirabad rayonunun Mürsəlli kəndində bənd bərkitmə işləri intensiv şəkildə davam etdirilir.    Mingəçevir anbarında suyun səviyyəsi qalxır    Son bir sutka ərzində Mingəçevir su anbarında suyun səviyyəsi 5 sm qalxaraq 82,42 m təşkil edib. Anbarda maksimal səviyyə 83 m olduğundan bu həddə çatmağa 58 sm qalıb. Bunu isə APA-ya Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeorologiya Mərkəzinin direktoru Elnar Sultanov bildirib. Onun sözlərinə görə, Mingəçevir su anbarından 745 kubmetr/saniyə su axıdılır.    Kürün səviyyəsinin qalxması ilə bağlı yaranan daşqınlar nəticəsində su basmış ərazilərdə köməksiz vəziyyətdə qalan 37 nəfər isə Fövqəladə Hallar Nazirliyinin dalğıc-xilasediciləri tərəfindən xilas olunub. Bu barədə FHN-nin internet saytında bildirilib.    Gəmiricilər və ilanlar    sahibsiz evlərə dolur    Kür və Araz çaylarının daşdığı ərazilərdə su altında qalan evlərdə çoxsaylı gəmiricilər, sürünənlər, o cümlədən ilanlar özlərinə sığınacaq tapıb. Yerli sakinlərin dediyinə görə, hətta gəmiricilərin və ilanların üzərək, evlərin su altında qalmayan hündürlüklərinə sığındıqlarını hər an müşahidə etmək mümkündür.    Eyni zamanda, qrunt sularının toplandığı həyətlər və çökəkliklərdə ağcaqanad dumanlıqları da açıq seyr edilir. Bu isə müxtəlif xəstəliklərin yaranmasına yol açır. Bununla yanaşı, insanlar sel suları çəkildikdən sonra evlərinə qayıdarkən zəhərli ilanlarla rastlaşmalı olacaqlar.    Səhiyyə Nazirliyi sel sularının yaratdığı səhiyyə problemlərinin aradan qaldırılması üçün təxirəsalınmaz Tədbirlər Planı hazırlayıb. Səhiyyə Nazirliyinin Sanitar Epidemioloji Nəzarət bölməsinin müdiri Viktor Qasımovun sözlərinə görə, sel suları çəkilən kimi ərazidə dezinfeksiya işləri başlanacaq: "Dezinfeksiyaedici dərman ehtiyatı yaradılıb, dezinfeksiya maşınları və tibbi heyətlər Kür və Araz çayı boyunca yerləşən rayonlara ezam edilib".    Kənd Təsəsrrüfatı Nazirliyi yanında Dövlət Baytarlıq Xidməti də tədbirlər planı hazırlayıb. Xidmətin mətbuat xidmətinin rəhbəri Yolçu Xanvəli "Turan"a deyib ki, sel suları çəkilən kimi ərazidə ölmüş heyvanların cəsədlərinin zərərsizləşdirilməsi işləri başlanacaq. "Dövlət Baytarlıq Xidməti Kür və Araz boyu ərazilər üzrə tədbirlər planı hazırlayıb. Dezinfeksiyaedici dərman ehtiyatı var və dezinfeksiyaedici maşınlar hazır vəziyyətdədir", - deyə o qeyd edib.    Yollar bərpa edilir    Nəqliyyat Nazirliyinin müvafiq qurumları isə sel sularının yaratdığı fəsadları aradan qaldırmaq üçün gücləndirilmiş, üçnövbəli iş rejimində işləyir. Şirvan, İmişli, Sabirabad rayonları ərazisində həm yaxın ərazilərin Yol-İstismar İdarələri, həm də Bakıdan göndərilmiş texnika və işçi qüvvəsinin köməkliyi ilə su altında qalmış, sıradan çıxmış avtomobil yolları təmir edilir, alternativ yollar salınır. Bu barədə Nəqliyyat Nazirliyinin məlumatında bildirilir.    Nazirlik bildirir ki, Padar istiqamətində yeni salınmış 19 km-lik yolda avtomobillərin hərəkətinin bərpa edilməsi üçün işlər davam etdirilir. Digər istiqamətlərdə də intensiv surətdə işlər aparılır. Belə ki, Sabirabad rayonu ərazisində 12 km-lik Həşimxanlı-Qaratəpə yolunun gediş-gəliş üçün normal vəziyyətə gətirilməsi gözlənilir və işlərin sürətləndirilməsi məqsədilə əlavə olaraq Bakıdan hər gün təxminən 15-20 maşın yük aparılır.    Məlumatda deyilir ki, Saatlı rayonu ərazisində 16 km-lik Musalı-Məzrəli avtomobil yolunun 6 km-i artıq bərpa edilib. Eyni zamanda, Hacıqabul-Bəhramtəpə yolunun 68-ci km-də yerləşən körpü, avtomobillərin və insanların intensiv hərəkətini nəzərə alaraq, həmçinin yüklərin daşınmasını təmin etmək məqsədilə müvəqqəti olaraq açılıb. Express. A.Camal