GünAzTv: Bu sənəd qonşu ölkələri təhdid etdiyi qədər Rusiyanın özü üçün də olduqca böyük təhlükə törədir.

Azərbaycan Təhlükəsizlik və Müdafiə Ictimai Assosiasiyası (ATMIA) “Rusiya hərbi doktrinasının Xəzərətrafı regiona təsiri” mövzusanda keçirilən dəyirmi masada Rusiyanın hərbi doktrinasına münasibət birmənalı olmayıb. Tədbir iştirakçıları doktrinada Azərbaycan üçün təhlükə törədə biləcək məqamlara toxunmaqla onları təhlil ediblər. Ümumi rəy bundan ibarət olub ki, Azərbaycan NATO-ya üzvlük istiqamətində ciddi addımlar atarsa, bu, Rusiyanın kəskin reaksiyasına səbəb ola bilər. Rusiyanın yeni doktrinasına görə dünyanın istənilən ölkəsində rus vətəndaşının hüquqları ciddi şəkildə pozularsa, Rusiya hökuməti vətəndaşlarının müdafiəsi üçün həmin ərazidə hərbi əməliyyat keçirə bilər. Əslində Rusiyanın belə bir məzmunda sənəd qəbul etməsində təəccüblü heç nə yoxdur. Çünki Kreml hələ də aqressiv imperiya kimi qaldığını hər addımı ilə göstərir. SSRI dağıldıqdan sonra Rusiyada qısa müddətə də olsa, demokratiya rüşeymləri əmələ gəldi, amma sonradan bu tendensiya tezliklə aradan qaldırıldı. Nəticə isə göz önündədir. Bir çox ekspertlərin fikrincə, hazırda qəbul olunan hərbi doktrina qonşu ölkələri təhdid etdiyi qədər Rusiya üçün də olduqca böyük təhlükə törədir. Çünki bu hərbi doktrina ilə Rusiya özünün uzun müddətdir ört-basdır etdiyi imperialist planlarını açmış oldu. Rusiyanın bu doktrinada əksini tapan ideyalarını reallaşdırmaq üçün iqtisadi, hərbi potensialının çatıb-çatmayacağı isə ayrı mövzunun müzakirə predmetidir. NATO-nun getdikcə Rusiyanın sərhədinə yaxınlaşması Rusiyanın qıcığına səbəb olsa da, Moskvanın bu prosesə müqavimət göstərmək imkanları olduqca məhduddur. Amma atılan addımlardan hiss olunur ki, NATO Rusiyanın əsəblərini tam tarıma çəkmək istəməsə də, istər Cənubi Qafqaz, istərsə də Şərqi Avropa ilə bağlı siyasətini yürütməkdədir. Artıq Gürcüstanın NATO-ya üzvlüyü, bir çox ekspertlərin fikrincə, vaxt məsələsidir. Bu baxımdan Gürcüstanın NATO-ya üzvlüyünün Azərbaycanın da maraqlarına uyğun sayanlar az deyil və belə hesab olunur ki, Gürcüstandan sonra NATO-ya üzvlük sırası Azərbaycana çatacaq. Amma o da vurğulanmalıdır ki, Azərbaycan hakimiyyətinin NATO-ya üzvlüyə can atdığı hiss olunmur.Konfliktoloq Arif Yunusun fikrincə, Rusiyanın Gürcüstana 2008-ci ildə göstərdiyi hərbi təzyiq Kremlin regionda baş verənlərə münasibətinin göstəricisidir. Bu baxımdan A.Yunus Azərbaycanın da NATO-ya sıx inteqrasiya kursunu tutacağı təqdirdə bu cür münasibətlə üzləşəcəyini istisna etmir: “Azərbaycanın NATO-ya üzvlüyünün Rusiyanın ciddi təzyiqi ilə üzləşəcəyi şübhəsizdir. Amma bu təzyiqin hansı formada təzahür edəcəyi mübahisəlidir. Bu, ya Qarabağ münaqişəsinin yenidən alovlanması, ya da başqa formalarda ola bilər. Əslində Rusiyanın belə bir doktrina qəbul etməsi bütün postsovet məkanına xəbərdarlıqdır”.Azərbaycanın öz ərazilərini hərbi yolla qaytarmağa çalışacağı təqdirdə Rusiyanın reaksiyasına gəlincə, A.Yunus hesab edir ki, Rusiya birbaşa buna reaksiya verməsə də, rus hərbçilərinin münaqişədə erməni tərəfində iştirakı gözləniləndir.