GünAzTv: Kür çayında suyun səviyyəsinin bir qədər də qalxması Kürqırağı rayonlarda vəziyyəti dahada gərgünləşdirib. Son məlumlara görə, dünən səhər saatlarında Kür bəndləri yararaq Şirvan şəhərinin Bayramlı qəsəbəsində, Sabirabad rayon mərkəzinədə xeyli ərazini basıb. Salyanda da Kürün səviyyəsi 6-7 sm qalxıb.

Dünən səhər saatlarında Kür çayı Şirvanın Bayramlı qəsəbəsinin hər iki qoruyucu bəndini yararaq qəsəbəni basıb. Vəziyyətin gərgin olduğunu görən rayon rəsmiləri əhalinin təcili evakuasiyasını həyata keçirməyə başlayıb.

Problemlə əlaqədar dünən Prezident İlham Əliyevin sədrliyi ilə müşavirə keçirilib. Müşavirədə fövqəladə hallar naziri Kəmaləddin Heydərov, səhiyyə naziri Oqtay Şirəliyev, nəqliyyat naziri Ziya Məmmədov, kənd təsərrüfatı naziri İsmət Abasov, ekologiya və təbii ehtiyatlar naziri Hüseyn Bağırov Kürdə suyun səviyyəsinin qalxması ilə bağlı real vəziyyət və təbii fəlakətin nəticələrinin aradan qaldırılması ilə əlaqədar dövlət başçısına ətraflı məlumat veriblər.

Prezident İlham Əliyev təbii fəlakətin nəticələrinin aradan qaldırılması ilə bağlı tədbirlərin gücləndirilməsini və kompleks tədbirlər planın hazırlanmasının sürətləndirilməsini tapşırıb. Bundan başqa Prezident İlham Əliyev yaxın 2 il üçün kompleks tədbirlər planı hazırlanması və tezliklə əlavə texnikaların alınması barədə də tapşırıq verib. Dövlət başçısı təbii fəlakətdən ziyan çəkən əhaliyə müvafiq kompensasiya ödəniləcəyini, onlara hərtərəfli kömək göstəriləcəyini və həmin şəxslərin sosial problemlərinin həll olunacağını bildirib.

Şirvan şəhər Fövqəladə Hallar Komissiyasının sədri Samit Abıyev açıqlamasında bildirib ki, Bayramlı qəsəbəsində 510 ev su altında qalıb. Həmin ərazidən 510 ailə, təxminən 3000 nəfər sakin evakuasiya olunub. Qəsəbə əhalisinin bir qismi suyun əhatəsində qalıb. Son məlumata görə, Bayramlı qəsəbəsi ərazisində Kürün səviyyəsi artmaqda davam edir. Verilən məlumata görə, Bayramlı qəsəbəsi ilə həmsərhəd olan Sabirabadın Minbaşı kəndi də eyni aqibəti yaşayıb. Sabirabad Rayon İcra Hakimiyyətinin müavini Yaqub Heydərov bildirib ki, bütün çətinliklərə baxmayaraq bəndləmə işləri aparılır. “Azərbaycan Dəmir Yolları” (ADY) QSC-nin mətbuat xidmətinin rəhbəri Nadir Əzməmmədov selin Bakı - Horadiz dəmir yolunun Şirvan-Osmanlı mənzilində dəmir yolunu basma təhlükəsi yaratdığını bildirib.

Salyan rayonunda da vəziyyət gərgin olaraq qalır. Dünən suyun səviyyəsi daha 6 sm artıb. Salyan Rayon İcra Hakimiyyətinin Salyan şəhəri üzrə nümayəndəsi Əlipaşa Abdullayev deyib ki, Kürdə suyun səviyyəsinin maksimal həddi 6 metr 68 santimetrə çatıb.

“Operativ tədbirlər həyata keçirilir”

“Son dövrlər yağan yağışlar, eyni zamanda, Kür və Araz çaylarında bolsululuğun müşahidə olunması ilə əlaqədar olaraq respublikanın ayrı-ayrı şəhər və rayonlarında mürəkkəb vəziyyət yaranıb. Bir sıra ərazilərdə qrunt və yağış sularının yaratdığı fəsadların aradan qaldırılması üçün nazirliyin 800-dən yuxarı şəxsi heyəti 186 ədəd texnika, 57 ədəd motopompa, 63 ədəd su nasosu vasitəsilə, həmçinin, rayon icra hakimiyyətlərinin müvafiq qüvvələri ilə birgə hadisə bölgələrində yaranmış vəziyyətin aradan qaldırılması üçün operativ tədbirlər həyata keçirilir. Bu barədə Fövqəladə Hallar Nazirliyi məlumat yayıb. 

Təhsil naziri Misir Mərdanov vəziyyətlə bağlı Ağcabədidə 40 məktəbdə dərslərin dayandırıldığını bildirib: “Salyanda da çoxlu sayda məktəbdə dərslər aparılmır. Lakin belə hallar o qədər də kütləvi deyil”.

Son məlumata görə, ölkədə 40 rayonun ərazisində subasma halları baş verib, 20 min ev su altında qalıb, 300-dən çox ev uçub, 2000 ev qəzalıdır, 50 min hektar əkin və örüş sahəsini su basıb. zaman