Əhmədinejad yenə asır-kəsir

SON XƏBƏRLƏR

Əhmədinejad yenə asır-kəsir

2021.10.20, 07:36

Gunaz.tv

GünAzTv: İran Prezidenti Mahmud Əhmədinejad nüvə yanacağının idarə olunması ilə bağlı BMT planının reallaşmasında Braziliyanın vasitəçiliyinə razılaşıb. Cənab Əhmədinejadın İnternet səhifəsində deyilir ki, o, Braziliyanın planını Venesuela prezidenti Uqo Çaveslə telefon danışığı zamanı müzakirə edib. BMT planına görə, dünya gücləri İranın aşağı səviyyədə zəngləşdirilmiş uranını alacaq və əvəzində ona tədqiqat reaktorunda istifadə etməsi üçün nüvə yanacağı göndərəcək. Ancaq Mahmud Əhmədinejad hər iki materialın İranın sərhədləri daxilində eyni zamanda dəyişdirilməsinə israr etdikdən sonra plan təxirə salınıb. Kütləvi qırğın silahlarının yayılmamasına dair müqavilənin müzakirəsi üçün hazırda Nyu-Yorkda olan Əhmədinejad deyib ki, İranın yeni sanksiyalara tab gətirməsi mümkündür, lakin Vaşinqton və Tehran arasında münasibətlər heç vaxt düzəlməyə bilər. Bu mövqeyi ilə Əhmədinejad öz ölkəsinə qarşı yeni sanksiyalardan çəkinmədiyini nümayiş etdirib. Məlumatlara görə, növbəti iki ay ərzində İrana qarşı yeni BMT sanksiyalarının Təhlükəsizlik Şurasında səsə qoyulacağı ehtimal olunur. Lakin hətta diplomatların özləri də şəxsi söhbətlərində bildirirlər ki, yeni sanksiyaların İranı yola gətirəcəyinə inanmırlar. Odur ki, yeni sanksiyaların müzakirə mərhələsində olduğu bir vaxtda cənab Əhmədinejad dəyişməyən mövqeyini bir daha dilə gətirib. Nyu-Yorkda keçirilən mətbuat konfransında o deyib ki, İranb yeni sanksiyalara da sinə gərə bilər. O əlavə edib ki, lakin bu sanksiyalar qəbul edilər isə, nə vaxtsa İran-Amerika münasibətlərinin bərpa oluna biləcəyi ehtimalına son qoyula bilər. Bununla belə o bildirib ki, İran kütləvi qırğın silahlarına dair müqavilədən çıxmayacaq. Bu, İrana qarşı sanksiyaların əks nəticə verə biləcəyindən ehtiyat edənlər üçün bir növ təsəllidir. Bundan başqa, İran istənilən hərbi müdaxiləyə hazır olduğunu da açıq bildirir. Bunun sübutlarından biri kimi İranın hərbi-dəniz donanmasının Fars Körfəzi və Oman dənizində səkkiz günlük hərbi təlimlərə başlaması göstərilir. "Əl-Əlam" dövlət televiziyasına verdiyi müsahibədə İranın ordu komandiri Həbibulla Səyari deyib ki, hərbi hava və sualtı qüvvələrin də iştirak etdiyi təlimlər özünümüdafiə məqsədilə keçirilir. Bu təlimlər İranın İnqilab Qvardiyasının Körfəz, Oman dənizi və Hörmüz boğazında keçirdiyi təlimlərdən iki həftə sonraya təsadüf edir.

GUNAZ.TV

SON XƏBƏRLƏR