GünAzTv: İran hakimiyyəti Azərbaycana qarşı təxribatçı addımlarını genişləndirir. Fevralda Azərbaycanın Tehrandakı səfirliyi və Təbrizdəki konsulluğu qarşısında milli bayrağımızın yandırılmasını təşkil edən Tehran rejimi indi də Ermənistanla diplomatik əlaqələri genişləndirir. Xəbər verildiyi kimi, İranın xarici işlər nazirinin müavini Qaşqavi Ermənistanın Təbrizdə konsulluq açmasına dair ilkin razılığın əldə edildiyini söyləyib. Rəsmi İrəvanın qənaətincə, Təbrizdə Ermənistan konsulluğunun açılması Tehranla İrəvan arasında əlaqələrin inkişafı üçün yaxşı şərait yaradacaq.Xatırladaq ki, 2007-ci ilin dekabrda İran hakimiyyəti ilə Ermənistan arasında bu istiqamətdə danışıqlar aparılıb. Həmin qərardan sonra ermənilər Güney Azərbaycana axışmağa başlayıb. Bunun əsas səbəblərindən biri kimi Tehran hakimiyyətinin onlar üçün yaratdığı şərait göstərilir.Azərbaycanın İrandakı sabiq səfiri, şərqşünas alim Əlyar Səfərli isə hesab edir ki, İran Təbrizdə Ermənistan konsulluğunu açmaqla Azərbaycana qarşı pis əməllərindən əl çəkmədiyini göstərir: "Erməniləri Güney Azərbaycanın sərhədlərində yerləşdirmə siyasəti həyata keçirilir. İranın bir sıra yerlərindən, o cümlədən Tehrandan, İsfahandan erməniləri gətirib Təbrizdə məskunlaşdırırlar, xüsusilə də Muğanda erməni qəsəbələrinin salınması planlı şəkildə həyata keçirilir. Eyni zamanda, Təbriz ilə Xoy arasında bir "Qarakilsə"si var. O qondarma kilsədir, ermənilərin adına çıxılır. Ermənilər hər il iyunun 24-də "Qarakilsə"ni ziyarətə gəlirlər. Bəlli olur ki, bu əslində siyasi bir ziyarətdir. Onlar bu ad altında Güney Azərbaycanla Quzey Azərbaycan arasında əlaqələri zəiflətmək üçün planlar cızır, çıxışlar edir, Naxçıvanla bağlı iddialarını dilə gətirirlər. Elə bunların nəticəsi olaraq, indi Təbrizdə erməni konsulluğunun açılması məsələsi gündəmə gətirilir. Görünür, bu konsulluğun açılması təklifi farslarla ermənilərin ittifaqının məntiqi nəticəsidir. Fars siyasəti çox hiyləgər bir siyasətdir. Qarabağ müharibəsi zamanı İran ermənilərə hər cür yardım göstərirdi. Mən özüm görmüşəm, Araz çayının üzərindəki Meğri körpüsündən maşın karvanlarıyla İrandan Qarabağdakı ermənilərə ərzaq, yanacaq, silah daşınırdı. Bu İranın siyasətinin mahiyyətidir. Dünya erməniləri Güney Azərbaycana kütləvi şəkildə səfərlər edirlər. İranda ermənilərə tam sərbəstlik verilir və Qarabağ olan iddialarına dair Təbrizdəki, İsfahandakı, Tehrandakı erməni kilsələri böyük tədbirlər həyata keçirir. Azərbaycan xalqına qarşı xəyanət tədbirləri həyata keçirmək üçün farslarla ermənilər birləşir. Təbrizdə Ermənistan konsulluğunun açılması isə Azərbaycana qarşı təxribatdır. Çünki belə bir konsulluğun açılmasına da heç bir ehtiyac yoxdur. Ermənistanın Tehranda səfirliyi var, ermənilər İrana tam sərbəst gəlib-gedirlər. Ermənilərdən viza da tələb olunmur. Bu Azərbaycana qarşı həm də təzyiqdir. İran Ermənistanla birlikdə Azərbaycan sərhəddində iki su elektrik stansiyası tikib, artıq fəaliyyət göstərir, Bakı-Şərur dəmiryolu xətti su dəryaçasının altında qalıb. Ermənistanla-İran dəmir yolunun inşası layihəsi üzərində işlənilir. Yəni çalışırlar ki, Güney və Quzey Azərbaycan arasında sərhədlər get-gedə daralsın. Bunlar hamısı Azərbaycan əleyhinə yönəlib. Çalışırlar ki, həmin ərazilərdə erməniləri yerləşdirsinlər. Onu da deyim ki, İranda ən çox ermənilər İsfahanda yaşayır. Bu məntiqlə Ermənistanın konsulluğu Təbrizdə deyil, İsfahanda açılmalıdır. Amma əvvəl qeyd etdiyim kimi, konsulluğun Təbrizdə açılması Azərbaycan xalqına qarşı siyasi oyundur". xalqcebhesi