GünAzTv: Strasburqda Avropa Şurası Parlament Assambleyasının (AŞ PA) yaz sessiyası davam edir. Azərbaycan nümayəndə heyətinin üzvü Qənirə Paşayeva Finlandiyadan olan deputat Kristina Kiurunun “Avropada həll olunmamış münaqişələrin qarşısının alınması və nizamlanmasına qadınların cəlb edilməsi” adlı məruzəsi ətrafında müzakirələrdə çıxış edib.

15 ildən artıqdır ki, öz evlərinə dönə bilməyən yüz minlərlə azərbaycanlı qadın qaçqın və məcburi köçkünlərdən danışan deputat bildirib ki, bütün Avropa məkanında bunun bənzəri yoxdur: “100 minlərlə qadın üzünü sizə tutaraq onların Ermənistan tərəfindən pozulan insan haqlarının müdafiəsini gözləyir. 15 ildən artıqdır ki, yüzlərlə Azərbaycanlı Ermənistanda əsir saxlanılır. İndi həmin insanların analarının, bacılarının, həyat yoldaşlarının, qızlarının çəkdiyi əziyyətləri düşünün. 15 ildən artıqdır ki, Ermənistanda əsir və girov saxlanılan və zorakılığa məruz qalan azərbaycanlı qadın və qızlar sizdən onların pozulan haqlarının müdafiəsini gözləyir. Onlar arasında bütün bu zorakılıqlara dözərək sağ qalanlar sizdən evlərinə dönmək üçün kömək gözləyir”. Azərbaycanın Ermənistanla sərhəd bölgəsini təmsil etdiyini diqqətə çatdıran deputat bildirib ki, Ermənistan silahlı qüvvələri bu gün işğal etdiyi Azərbaycan torpaqlarında qurduqları mövqelərindən Azərbaycan kəndlərini atəşə tutaraq öz həyətində, tarlasında işləyən qadınları yaralayır, qətlə yetirirlər: “Bir neçə gün əvvəl bir müəllimə dərsə gedərkən Ermənistan silahlı qüvvələrinin snayperləri onu güllə ilə vuraraq ağır yaralayıb. Mən bir çox ölkələrin səfirlərini sizə danışdığım hadisələrin baş verdiyi kəndlərə dəvət etmişəm və onlar gördüklərindən dəhşətə gəliblər. İşğal edilmiş torpaqlarda azərbaycanlılara məxsus qəbiristanlıqlar dağıdılır. Sizcə bir qadın, bir ana üçün bundan dəhşətli nə mənzərə ola bilər?”Qeyd edək ki, AŞ PA-dakı Azərbaycan və Ermənistan nümayəndə heyətlərinin rəhbərləri aprelin 28-də Strasburqda bir araya gələrək Dağlıq Qarabağ münaqişəsi haqda müzakirələr aparıblar. Görüşdə AŞ PA prezidenti Mövlud Çavuşoğlu, assambleyanın baş katibi Matyas Sorinas da iştirak ediblər. Azərbaycan nümayəndə heyətinin sədri Səməd Seyidovun açıqlamasına görə, AŞ PA-nın iyun sessiyasında Ermənistan təmsilçiləri ilə daha bir görüş olacaq. Həmin görüşdə AŞ PA-da Azərbaycan və Ermənistan müxalifətini təmsil edən şəxslər də iştirak edəcək. Dağlıq Qarabağ üzrə Alt Komitənin fəaliyyətinin bərpa edilməsinə gəldikdə, Səməd Seyidov prosesin yeni başladığını və davam etdiriləcəyini bildirib. musavat