GünAzTv: Azərbaycan və Türkiyəyə qarşı əsassız ərazi iddiaları irəli sürən ermənilər Gürcüstana qarşı da analoji kampaniyaya başlayıb. Ermənilər Samsxe-Cavaxetiya bölgəsinin Gürcüstandan ayrılmasını tələb edib.GünAzTv mətbuat mərkəzinin “Anspress”-ə istinadən yaydığı məlumata görə, İrəvanda Gürcüstanın Ermənistandakı səfirliyi qarşısında aksiya keçirilib. Aksiya iştirakçıları Gürcüstana qarşı ərazi iddiaları irəli sürərək, Samsxe-Cavaxetiya bölgəsinin Gürcüstandan ayrılaraq müstəqil olmasını tələb edib.Ermənistanın “Yeni Mühafizəkarlar Hərəkatı”nın təşkil etdiyi aksiyada əsasən gənclər üstünlük təşkil edib. Onlar hərəkat adından bəyanat səsləndirib. Gürcüstana qarşı ərazi iddialarının əks olunduğu bəyanatı hərəkat üzvləri Gürcüstanın Ermənistandakı səfirinə təqdim etmək istəyib. Bu niyyət baş tutmadığından sənəd səfirliyin mühafizəsini həyata keçirən polislərə verilib. Səfirlikdən onların qarşısına heç kimin çıxmamasını aksiyaya rəhbərlik edən hərəkat təmsilçisi Eduard Abramyan diplomatik etiketə uyğun olmayan addım adlandırıb. Aksiya zamanı polis mitinqin gedişinə müdaxilə etməyib. Halbuki, adətən polis İrəvanda kütləvi aksiyaların qarşısını dərhal alır. Bu isə onu göstərir ki, Gürcüstana qarşı ərazi iddiaları şüarları altında keçirilən aksiya rəsmi qurumlarla razılaşdırılıb.

Cavaxetiya məsələsinin yenidən gündəmə gətirilməsi Gürcüstanda böyük narahatlıqla qarşılanıb.

Gürcüstanın İrəvandakı səfirliyi qarşısında keçirilən aksiyada ermənilərin Gürcüstanın Samsxe-Cavaxetiya bölgəsinin ayrılaraq müstəqil olması tələbləri ilə çıxış etməsi Gürcüstan ictimaiyyəti və ziyalıları arasında narahatlıqla qarşılanıb. Gürcüstan Elmlər Akademiyasının akademiki Mixail Kurdiani ANS TV-nin Gürcüstan bürosuna müsahibəsində bildirib ki, ermənilər tarixin son 70 ilində vaxtaşırı olaraq Gürcüstana qarşı torpaq iddiaları ilə çıxış edib və erməni əhalisinin məskunlaşdırıldığı Cavaxetiya ərazisinin guya tarixən onlara məxsusluğu barədə sərsəm bəyanatlar yayıb: “Təəssüf ki, bununla erməni milləti həm öz təcavüzkarlığını nümayiş etdirir, həm də böyük dövlətlərin Cənubi Qafqazdakı maraqlarının həyata keçirilməsində qonşularına qarşı xəyanətkar cəbhədə dayanır. Buna başqa ad vermək olmaz, çünki ermənilərin ərazi iddialarının heç bir tarixi əsası yoxdur. Cavaxetiya erməniləri həmin torpaqlara Rusiya tərəfindən XIX əsrin ortalarında köçürülüb”. Gürcü və erməni dillərini, habelə başqa dilləri yaxşı bildiyini deyən Kurdiani bu günədək Cavaxetiyanın ermənilərə məxsusluğunu təsdiqləyən tarixi fakta rast gəlmədiyini bildirib. “O yerin adı çox qədimdir. Cavaxetiya və ya Cavaxın hələ qədim Misir səlnamələrində də adı çəkilib”,- deyə Kurdiani vurğulayıb. Mixail Kurdiani bildirib ki, Qafqazda Azərbaycan və Gürcüstan torpaqları hesabına özlərinə dövlət qurmuş ermənilər bu tələbləri ilə Qarabağda baş verənləri indi də Cavaxetiyada təkrarlamaq istəyir. Fakt budur ki, həqiqətən də Cavaxetiya ermənilərinə müstəqillik verilməsi tələbləri ilə son 20 ildə Ermənistan tərəfindən bir neçə dəfə cəhdlər göstərilib və təsadüfi deyil ki, bunun nümayişkəranə şəkildə ifadəsi 20-ci əsrin 90-ci illərində ortaya çıxıb. Müstəqil Gürcüstanın ilk prezidenti Zviad Qamsaxurdiyanın 1991-ci ilin sonlarında Ermənistan rəhbərliyinə Cavaxetiyada yaranmış vəziyyətə görə xəbərdarlıq etməsi də buna sübutdur və bu, ermənilərin indi həyata keçirdiyi kampaniyanın əsasının da məhz həmin dövrdən qaynaqlandığına işarədir. Gürcüstanın indiki siyasətçiləri də Ermənistan dövlətinin separatçılıq siyasətini bu ölkənin iflas perspektivi kimi dəyərləndirir. Parlamentin vitse-spikeri Levan Vepxadze bəyan edib ki, ermənilər bu cür tələblərlə çıxış etməklə, iki qonşu ölkə arasındakı münasibətlərə ziyan gətirəcək. Onun sözlərinə görə, rəsmi İrəvan tərəfindən belə bir addım dəstəklənsə, bu sonda Ermənistanın tamamilə blokada vəziyyətinə düşməsi ilə nəticələnəcək: “Bunu edən insanlar Gürcüstana təzyiq etmək istəyən və Ermənistanda öz siyasi karyerasını qurmaq istəyən insanlardır. Təəssüflər olsun ki, onlar Gürcüstanda yaşayan ermənilərdən də istifadə edir. İrəvanda anlamalıdırlar ki, Gürcüstanla normal münasibətlər olmadan Ermənistan daha da pis vəziyyətə düşə bilər. Çünki onların artıq Azərbaycanla Dağlıq Qarabağ kimi münaqişəsi mövcuddur. Bunu edən insalar əgər çalışırlarsa ki, Gürcüstanla da münasibətlərin korlanmasına nail olsunlar, onda bu, Ermənistanın izolyasiya olunmasına gətirib çıxaracaq. Məncə, bu, Ermənistana fayda verməyəcək”. Gürcüstanın Xarici İşlər Nazirliyi isə hələlik bu məsələ ilə bağlı mövqe ortaya qoymayıb.