GünAzTv: Xarici mətbuatda ABŞ-ın (Amerika Birləşmiş Ştatları) İrana qarşı müharibə hazırlıqları apardığına dair yeni iddialar yer alıb. Pakistanın ingilisdilli “Pakistan Times” qəzetinin dərc etdiyi məqalədə bildirilir ki, 2010-cu ilin iyul ayı İrana qarşı hərbi əməliyyatların başlanması üçün həlledici olacaq. Paralel olaraq ABŞ Pakistanda da “cərrahi müdaxilə” həyata keçirəcək. Qəzetin yazdığına görə, Birləşmiş Ştatlar son bir neçə ay ərzində Qətərdə, Birləşmiş Ərəb Əmirliklərində, Küveytdə, Bəhreyndə və Səudiyyə Ərəbistanında “Petriot” zenit-raket sistemləri yerləşdirib.

Bu sistemlər İsraildə yerləşdirilmiş vahid mərkəzdən idarə olunur. Eyni zamanda ABŞ Fars körfəzində ballistik raketlərdən müdafiə sistemləri ilə təchiz edilmiş azı dörd kreyser göndərib. Gözlənilir ki, iyul ayına qədər Birləşmiş Ştatların bölgədəki 5-ci donanması daha da gücləndiriləcək, həmin vaxta qədər bölgəyə 5 təyyarədaşıyan gəminin göndərilməsi də nəzərdə tutulur. Özü də bu gəmilər Fars körfəzinə gizli şəkildə, xəbərdarlıq edilmədən hərəkət edə bilər.Qəzet İranla bağlı situasiyanın necə inkişaf edəcəyi barədə Vaşinqtondan və Moskvadan olan ekspertlərlə məsləhətləşib. Onlar İrana qarşı hərbi əməliyyatların başlaması üçün iyul ayının həlledici olacağını təsdiqləyirlər. Onların fikrincə, iyula qədər İrana qarşı hərbi əməliyyatlar üçün lazım olan komponentlər tamamlanacaq. Ekspertlər deyiblər ki, bölgə ölkələrində “Petriot” sistemlərinin yerləşdirilməsinin məqsədi İranın İsrailə cavab zərbələrinin qarşısını almaqdır. Çünki “Petriot” sistemlərinin bir təyinatı var: zərbə endirdikdən sonra cavab zərbələrindən müdafiə olunmaq.Moskvadakı ekspertlər qeyd ediblər ki, ABŞ Yaxın Şərqdəki müttəfiqlərini İranın raket zərbələrindən müdafiə etmək üçün “Petriot”lara arxalana bilər, ancaq İranla qonşuluqda yerləşən Türkmənistan və Azərbaycana bu sistemləri yerləşdirməkdə çətinliklər mövcuddur. Bununla belə, Birləşmiş Ştatların bölgədəki gəmilərində yerləşdirilmiş ballistik raketlər əleyhinə “Aegis” sistemləri İranın “Şahab” raketlərini atmosferin yuxarı qatlarında vurmağa qadirdir. Həmçinin bu sistemlər eyni anda 100-ə yaxın hava hədəfini izləyə bilir, paralel olaraq “Aegis”lər yerüstü və quru hədəflərini də izləmək qabiliyyətindədir. 2008-ci ildə bu sistem Pentaqon tərəfindən Yer ətrafında dövr edən köhnəlmiş hərbi peyki vurub salmaq üçün istifadə edilib.ABŞ-ın İrana qarşı mümkün hərbi əməliyyatları zamanı taktiki nüvə silahından istifadə ehtimalı da nəzərdən keçirilir. Qəzetin yazdığına görə, ABŞ-da taktiki nüvə başlıqlarının yeni nəsli ilk dəfə 2012-ci ildə hazır olacaq, lakin belə məlumatlar var ki, bu başlıqların bir neçəsinin 2010-cu ilin iyuluna qədər hazırlanması tapşırılıb. Bu başlıqlar çox güman ki, sualtı qayıqlarda, “Traydent” raketlərində yerləşdiriləcək. Əgər nüvə başlığı tətbiq olunmasa belə, ABŞ-ın İranın nüvə obyektlərinə GBU-57A/B tipli nəhəng bunkerdağıdan bomba atacağı şübhə doğurmur. Vaşinqtondakı mənbələr bildiriblər ki, bu bombaların ilk partiyasının da 2010-cu ilin iyuluna qədər hazırlanması tapşırılıb. Həmin vaxta qədər azı 10 belə bombanın hazır olacağı gözlənilir.Lakin ABŞ İrana qarşı bombardmanlardan əvvəl bütün kommunikasiya vasitələrini sıradan çıxaran elektron bomba da tətbiq edə bilər. Həmin bomba İranın bütün telekommunikasiya sistemini sıradan çıxarmaqla bərabər bu ölkənin informasiya məkanı üzərində nəzarəti ələ almağa və dezinformasiya xarakterli məlumatlar yaymağa imkan verəcək. Bildirilir ki, Amerikanın elektron müharibə üzrə mütəxəssisləri iyul ayına qədər Fars körfəzində olacaq. Həmin vaxta qədər Pentaqonun bölgəyə “Virginiya” tipli atom sualtı qayıqlarını da yola salacağı gözlənilir. Həmin gəmilərin funksiyasına məxfi izləmə, kəşfiyyat və düşmən hədəflərinə qəfil zərbələr endirmək daxildir. Qeyd edək ki, bundan əvvəl ərəb və Qərb mənbələri də ABŞ-ın İrana qarşı müharibə hazırlıqları içərisində olduğuna dair xəbərlər yayıblar. Bu günlərdə isə müdafiə naziri Robert Geytsin prezident Barak Obamaya təqdim etdiyi məxfi hesabat mətbuata sızdırılıb. Orada deyilir ki, İrana qarşı diplomatik və iqtisadi sanksiyalar nəticəsiz qalır, bu səbəbdən hərbi variant qaçılmaz ola bilər. İrana qarşı İsrailin də qəfil hərbi əməliyyatlara başlayacağı təhlükəsi var. “The Wall Street Journal” qəzeti yazır ki, İsrail rəhbərliyi hazırda İrana qarşı hərbi əməliyyatların mümkün nəticələrini ölçüb-biçir. Yəhudi dövlətinin rəhbərliyində hesab edirlər ki, ABŞ-ın iqtisadi sanksiyaları nəticəsiz qalır və İranın nüvə dövlətinə çevrilməsinə yol verməmək üçün hərbi əməliyyatlar yeganə yol olacaq. musavat