Ərdoğandan Qarabağla bağlı gözlənilməz aşıqlama...

GünAzTv: Türkiyənin baş naziri Rəcəb Tayyib Ərdoğan ABŞ (Amerika Birləşmiş Ştatları) səfərindən sonra Ankarada keçirdiyi mətbuat konfransında sensasion açıqlama verib. Onun sözlərinə görə, ermənilər işğal etdikləri Ağdam və Füzuli rayonlarından çəkiləcəkləri halda Azərbaycan Ermənistanla sərhədləri açmağa razıdır. Yada salaq ki, bundan əvvəl nəqliyyat kommunikasiyalarının keçdiyi rayonların qaytarılması əvəzində rəsmi Bakının Ermənistanla sərhədləri açmağa razı olduğu barədə də məlumatlar yayılmışdı. Ancaq sonradan belə açıqlamalar verildi ki, təklif Ermənistanda heç bir maraq oyatmayıb. Onu da deyək ki, belə xəbərin üzə çıxmasını təxribat və ya informasiya müharibəsinin bir hissəsi də saymaq mümkündür.Ağdam və Füzuli rayonlarının qaytarılması müqabilində sərhdlərin açılması isə yeni təklifdir və Azərbaycanda kifayət qədər maraq doğurub. Azərbaycan Ermənistanla sərhədləri nəyinsə müqabilində açırsa, bu, avtomatik olaraq o deməkdir ki, ölkə rəhbərliyi problemin həllindəki irəliləyişdən sonra Türkiyənin Ermənistanla sərhədlərinin açılmasına da razıdır. Qarabağ Azadlıq Təşkilatının sədri Akif Nağı deyir ki, Qarabağ məsələsilə bağlı Türkiyənin rəsmi şəxsləri dəfələrlə müxtəlif mövqelər sərgiləyib: "Türkiyə rəhbərliyi indiyədək daha çox bu mövqedən çıxış edir ki, Qarabağ probleminin həllində müəyyən irəliləyiş olduqdan sonra Türkiyə ilə Ermənistan arasındakı protokllar təsdiq oluna bilər. Biz isə həmişə bunun əleyhinə olmuşuq və hesab edirik ki, bu Azərbaycanın maraqlarına cavab vermir. İndi əsasən beş rayonun işğaldan azad edilməsilə bağlı müzakirələr gedir. Ancaq beş rayonun azad olunması müqabilində Ermənistanla sərhədlərin açılmasını qəti qəbul edə bilmərik. Eyni zamanda, beş rayonun azad edilməsilə Türkiyə-Ermənistan münasibətlərinin normallaşması Qarabağın taleyinə çox pis, mənfi təsir göstərə bilər. Bütün bunlar faktiki olaraq Azərbaycan üçün qurulmuş tələdir. Ermənilər münaqişənin əvvəlində öz niyyətlərini gizlətmirdilər və deyirdilər ki, onlar əvvəlcə Dağlıq Qarabağı, sonra isə ətraf rayonları götürəcəklər. Daha sonra danışıqlarda Dağlıq Qarabağın ətrafındakı rayonları siyasi alver obyekti kimi istifadə edəcəklər. Onların planı belədir ki, sonda ətraf rayonları qaytarsınlar, Dağlıq Qarabağı özlərində saxlasınlar. Dediyim kimi bu erməni planıdır. Bu gün ortada olan həll planı, yenilənmiş "Madrid prinsipləri" münaqişənin belə formada həllinə yönəlib. Təəssüf ki, həmsədrlər bu planı Azərbaycana qəbul etdirməyə çalışırlar. Biz Azərbaycanın bu prinsiplərlə razılaşmasından böyük təəssüf hissi keçiririk. Sözügedən prinsiplərlə razılaşmaq Azərbaycanın mövqeyinə ciddi zərbədir. Azərbaycan əgər beş və yaxud iki rayonun qaytarılmasına razı olursa, mütləq nəzərə almalıdır ki, Dağlıq Qarabağ geri qaytarılmayacaq. "Madrid prinsipləri" ilə razılaşmaq Dağlıq Qarabağın həmişəlik itirilməsi deməkdir. Tələ deyəndə mən bax bunu nəzərdə tuturam. Acınacaqlı haldır ki, Türkiyə də bu prosesə qoşulub və dəfələrlə buna bənzər mövqelər nümayiş etdirib. Yeri gəlmişkən, bir məqama da diqqət yetirək. Ərdoğan ABŞ səfəri öncəsi bəyanat verdi ki, Dağlıq Qarabağ işğal olunub. Ermənilər Dağlıq Qarabağdan çıxandan sonra Ermənistan Türkiyə münasibətləri normallaşa bilər. Biz bu bəyanatı tədqir etdik və bildirdik ki, Türkiyə Qarabağla bağlı artıq aydın mövqe ortaya qoyub. ABŞ səfərindən sonra Ərdoğanın köhnə mövqeyinə qayıtdığını görürük. İki rayon azad edilməsindən sonra sərhədlərin açılması məsələsinin qabardılması da mövqenin dəyişməsinin göstəricisi sayıla bilər". xalqcebhesi