Türk ordusu PKK-nı vurmaq üçün Dağlıq Qarabağa girə bilərmi?

GünAzTv: Türkiyə münasibətlərini normallaşdırmağa çalışdığı Ermənistandan daha bir zərbə ala bilər ki, bu da PKK ilə bağlıdır. Artıq qəzetimizin yazdığı kimi, ABŞ-ın (Amerika Birləşmiş Ştatları)  Ankaraya təzyiq göstərərək onu Ermənistanla sərhədlərini açmağa məcbur etməyə çalışdığı bir vaxtda İrəvanın PKK ilə məxfi əlaqələrinə dair yeni faktlar ortaya çıxıb. Türkiyə mətbuatı ölkənin hərbi kəşfiyyatına istinadən xəbər verir ki, Ermənistan hazırda PKK-nın əsas logistik mərkəzinə çevrilib. Terror təşkilatının yüksək rütbəli mənsubları hətta Ermənistan pasportları ilə təchiz edilir və sərbəst şəkildə istədikləri yerə gedə bilir.

PKK-nın silahlı qanadının liderləri də müntəzəm olaraq işğalçı ölkəyə baş çəkir, onların telefonlarına da Ermənistanın telekommunikasiya şəbəkəsi xidmət edir.Qeyd edək ki, PKK-nın Ermənistanla əlaqələri və Şimali İraqdakı PKK-çıların Ermənistana, oradan da işğal altındakı Dağlıq Qarabağa üz tutması, burada hərbi bazalar yaratması barədə əvvəllər də məlumatlar olub. Türkiyənin ayrı-ayrı siyasət adamları Ankaranın Azərbaycanla birgə PKK-ya qarşı müştərək əməliyyatlara başlaması zərurətindən bəhs etmişdilər.Yeni informasiyalar işğal olunmuş Azərbaycan ərazilərində PKK dayaqlarının məhv edilməsi zərurətini növbəti dəfə gündəmə gətirib. Düzdür, Türkiyə hökuməti İrəvanla danışıqlar apararkən bu məsələni qaldırmayıb və Ermənistan PKK-ya dəstəyini kəsmədiyi halda Ərdoğan hökuməti protokolları imzalayıb. Ancaq son məlumata görə, Ərdoğan Azərbaycan Prezident Administrasiyasının rəhbəri Ramiz Mehdiyev vasitəsilə prezident İlham Əliyevə PKK-nın terror təşkilatı kimi rəsmən tanınması barədə müraciət edib. Rəsmi Bakı isə bu istiqamətdə addım atmağa tələsmir.Bununla belə, şərhçilər PKK-ya qarşı birgə əməliyyatı zəruri sayır. Sabiq dövlət müşaviri Vəfa Quluzadə deyir ki, əgər Türkiyə Azərbaycanla Dağlıq Qarabağda PKK-ya qarşı hərbi əməliyyatlar keçirsə, bu, çox gözəl iş olardı. Ancaq politoloqa görə, bunun üçün öncə Türkiyə və Azərbaycan Rusiya ilə Ermənistanın imzaladığı müttəfiqlik sənədinə tam uyğun olan sənəd imzalamalıdır: “Həmin sənəddə göstərilməlidir ki, əgər Ermənistan Azərbaycana hücum etsə, Türkiyə Azərbaycanın tərəfində döyüşəcək. Ondan sonra PKK-ya qarşı əməliyyatları da keçirmək olar”.V.Quluzadə hesab edir ki, Ermənistan və ya Dağlıq Qarabağda PKK-çıların mövcudluğu barədə faktlar məhz Türkiyə kəşfiyyatı tərəfindən qoyulmalıdır: “Türkiyə böyük dövlətdir və onun kəşfiyyatı da güclüdür. Ona görə də faktları Türkiyə tapmalıdır”.Politoloq digər bir məsələnin də həllini zəruri sayır: “Biz PKK-nı terrorçu təşkilat kimi tanımamışıq. Ona görə də Azərbaycan parlamenti gərək əvvəlcə PKK-nı terrorçu təşkilat kimi tanısın ki, Türkiyə ilə bərabər terrorçu təşkilat əleyhinə antiterror əməliyyatı keçirsin”.İqtidar təmsilçilərinin rəsmi Bakının PKK-nı terrorçu təşkilat kimi tanıyacağı halda kürd və erməni terrorçularının Azərbaycan əleyhinə birləşəcəyi barədə arqumentlərinə gəldikdə isə V.Quluzadə bu fikri bölüşmədi: “Bu fikrin heç bir əsası yoxdur. PKK-ya lazım olsa ki, ermənilərlə bərabər Azərbaycanda əməliyyat keçirsin, heç kimdən soruşmayıb keçirərlər. Azərbaycanın bu təşkilatı terrorçu kimi tanıyıb-tanımamasının dəxli yoxdur. Amma əgər Azərbaycan Türkiyə ilə müttəfiqlik sazişi imzalasa, PKK heç vaxt cürət edib burada əməliyyat keçirə bilməz. Çünki o zaman Türkiyə də PKK-nın əleyhinə burada əməliyyatlara başlayar. İndiki məqamda bizim qarşımızda duran əsas vəzifə PKK-nın terrorçu təşkilat kimi tanınması, Türkiyə ilə müttəfiqlik sazişinin imzalanması və viza rejiminin ləğv olunmasıdır. Rusiya da Türkiyə ilə viza rejimini ləğv edir. Biz nədənsə qorxuruq”.Azərbaycan Milli Strateji Təhqiqatlar Mərkəzinin sədri Natiq Miri isə bildirir ki, Türkiyə hərbi kəşfiyyatının PKK terror təşkilatının Ermənistanda logistik mərkəzinin olması ilə bağlı verdiyi məlumat əslində yeni deyil: “Ermənistanın PKK-ya dəstək verdiyi və terrorçuların Quzey İraq düşərgələrindəki hər 10 PKK-çıdan 3-4 nəfərinin erməni millətinə məxsusluğu da bəlli olan həqiqətlərdəndir. Burada informasiyanın dövriyyəyə buraxılmasının zamanına diqqət çəkmək lazımdır. İnformasiyanın məhz Türkiyənin baş naziri Ərdoğanın ABŞ-a kritik səfəri öncəsi buraxılması ABŞ-la bazarlıqlarda türk tərəfinin əlini gücləndirmək üçün ortaya atıldığı qənaətindəyəm. Çünki terrorla mübarizədə ABŞ Türkiyəyə gərəkən dəstəyi verməzsə, bu, Türkiyəyə antiterror əməliyyatlarının keçirilməsinə hüquqi zəmin yarada bilər”.N.Mirinin sözlərinə görə, belə bir praktika Türkiyədə var və dəfələrlə Böyük Millət Məclisinin qərarı ilə ölkə sərhədlərindən kənarda antiterror əməliyyatları keçirib: “ABŞ məhz bu ”çətir" altında hərbi varlığını təsbit etmək üçün müsəlman dünyasında girmədiyi məkan qalmayıb. Rusiya da ölkə xaricində hərbi əməliyyatların keçirilməsini qanuniləşdirən qərar qəbul etdi. Ona görə də qlobal səviyyədə Türkiyəni dayandırmağa yönəlik ssenarilər kritik həddə çatarsa, təbii ki, Türkiyə Ermənistanda və terror yuvası olan Dağlıq Qarabağda hərbi əməliyyatlar keçirə bilər. Dağlıq Qarabağ Azərbaycan ərazisi olduğu üçün Azərbaycanın razılığı ilə birgə hərbi əməliyyatların keçirilməsi də mümkündür. İnformasiyanın buraxılması da müəyyən güc mərkəzlərinə “işinizi buna görə əyarlayın” mesajı kimi də qəbul edilə bilər. Yəni “ya Ermənistanı durdurun, ya da biz bunun çarəsinə baxmağı bilirik” deyə izah oluna bilər".