Ankara ilə İrəvan arasında qapalı təmaslar başlayıb

GünAzTv: Türkiyə ilə Ermənistan arasında ABŞ-ın (Amerika Birləşmiş Ştatları) patronajlı altında Azərbaycan üçün də kritik əhəmiyyət kəsb edən Vaşinqton danışıqları ərəfəsində Ankara-İrəvan qapalı təmasları başlayıb. Dünən elan olunub ki, Türkiyə baş naziri Rəcəb Tayyib Ərdoğanın xüsusi elçisi, xarici işlər nazirinin birinci müavini Firudin Sinirlioğlunun rəhbərlik etdiyi nümayəndə heyəti İrəvanda səfərdədir.

Bu barədə jurnalistlərə açıqlamasında Ermənistan xarici işlər naziri Edvard Nalbəndyan məlumat verib. “Türkiyə baş nazirinin xüsusi elçisi bu gün Ermənistan prezidenti Serj Sərkisyan və xarici işlər naziri ilə görüşəcək”, deyə Ermənistan Xarici İşlər Nazirliyindən bildirilib. Sinirlioğlu indiyədək Ermənistana səfər edən ən yüksək rütbəli diplomatdır. O, XİN-də Ermənistanla danışıqları kurasiya edir və bundan əvvəl Ermənistan Konstitusiya Məhkəməsinin Sürix protokolları ilə bağlı qərarından sonra ortaya çıxan durumu müzakirə etmək üçün Rusiya, İsveçrə və ABŞ-da təmaslarda olub. Sinirlioğlunun  qəflətən İrəvana ezam edilməsinin məqsədi açıqlanmır. Türkiyə mənbələri bildirir ki, diplomat baş nazir Rəcəb Tayyib Ərdoğanla Ermənistan prezidenti Serj Sərkisyan arasında Vaşinqtonda keçiriləcək nüvə təhlükəsizliyi sammiti zamanı baş tutacaq görüşlə bağlı hazırlıqlar aparmaq üçün göndərilə bilər. Bu görüşün olacağı artıq təsdiqlənib. Türkiyənin diplomatik çevrələrindən bildirilir ki, Vaşinqtonda Ərdoğanla Sərkisyan arasında ikitərəfli görüş razılaşdırılıb. Digər məlumata görə, Sinirlioğlu ABŞ tərəfindən hazırlanan və Ermənistan-Türkiyə protokollarının ratifikasiyası üçün atılacaq addımların vaxtını müəyyən edən “yol xəritəsi” ilə bağlı İrəvana gedib. Neçə gündür ABŞ-ın Vaşinqtonda erməni və türk tərəflərinin imzalaması üçün nəzərdə tutulan “yol xəritəsi” hazırladığı, bu sənədin gizli saxlanılacağı haqda Vaşinqton və Ankaradakı mənbələrdən xəbərlər yayılır. Bildirilir ki, ABŞ administrasiyası Azərbaycanı Türkiyə-Ermənistan yaxınlaşması prosesindən kənarlaşdırmaq üçün oyun qurub. ABŞ-ın hazırladığı sənədin Türkiyə tərəfinə bir gün əvvəl təqdim edildiyi bildirilir, ehtimal olunur ki, Sinirlioğlu sənədi erməni tərəfi ilə müzakirə edib. Türkiyə mənbələri həmçinin onu xəbər veriblər ki, diplomat Ərdoğanın adından Sərkisyana məktub aparıb.

Obama Sərkisyanla görüşəcək, Ərdoğanın adı niyə siyahıda yoxdur?

Bu arada Ağ Evin mətbuat katibi Robert Gibbs bəyan edib ki, prezident Barak Obama aprelin 12-13-də Vaşinqtonda keçiriləcək nüvə təhlükəsizliyi sammiti çərçivəsində Ermənistan prezidenti Serj Sərkisyanla görüşəcək. Gibbs sammit zamanı ABŞ prezidentinin bir sıra ikitərəfli görüşlər keçirəcəyini bildirib: “Prezident bir sıra ikitərəfli görüşlər keçirməyi planlaşdırır: Çin Xalq Respublikasının rəhbəri Xu Tszintao, Almaniya kansleri Angela Merkel, Hindistanın baş naziri Manmohan Sinqh, İordaniya kralı II Abdulla, Malayziyanın baş naziri Nəcib Razak, Pakistanın baş naziri Yusuf Gilani, CAR prezidenti Ceykob Zuma və Qazaxıstan prezidenti Nursultan Nazarbayev və Ermənistan prezidenti Serj Sərkisyanla”. Göründüyü kimi, Ərdoğanın adı Obamanın ikitərəfli görüş keçirəcəyi liderlərin siyahısında yer almır. Bundan əvvəl isə Türkiyə mənbələri Obamanın Ərdoğanla da görüşəcəyi haqda xəbər yaymışdı. Həmçinin sammit çərçivəsində Obama, Ərdoğan və Sərkisyan arasında üçtərəfli görüşün keçiriləcəyi də ehtimal edilir. Bu görüşün təklikdə deyil, sammit çərçivəsində ayaqüstü ola biləcəyi də gözlənilir. Ona görə də təxmin edilir ki,  Ərdoğan Obamanın ayaqüstü görüşəcəyi liderlər arasında yer aldığından onun adı Ağ Evdən açıqlanan siyahıda yoxdur.

Erməni hiyləgərliyi: Sərkisyan ABŞ-a yola düşən kimi parlament protokolları müzakirə edəcək

O da məlum olub ki, Sərkisyanın ABŞ-da səfərdə olduğu bir vaxtda Ermənistan parlamenti protokolları müzakirəyə çıxaracaq. “Ermənistan parlamenti yaxın vaxtlarda erməni-türk protokollarını müzakirə etmək niyyətindədir”. Bu barədə parlamentin spikeri Ovik Abramyan sessiya zamanı bildirib. Ermənistan parlamenti Ermənistan-Türkiyə protokollarının qarşıdan gələn dörd günlük parlament həftəsində nəzərdən keçirilməsinin “lehinə” səs verib. “İrs” müxalifət fraksiyasının nümayəndələri isə protokolların parlamentin gündəliyinə daxil edilməsinin əleyhinə çıxış ediblər. İrs Partiyasının üzvləri bildiriblər ki, Ermənistan-Türkiyə protokolları “həyati əhəmiyyətli milli maraqlara aid olan məsələlərdə güzəştlər hesabına daxili hakimiyyətin möhkəmləndirilməsinə” istiqamətlənib. Ermənistan-Türkiyə protokollarının respublika parlamentinin gündəliyinə çıxarılacağı gün mitinq keçirməyə hazırlaşan İrs bütün erməniləri bu aksiyaya qatılmağa səsləyib. Bu addımla erməni tərəfi nümayiş etdirməyə çalışır ki, Türkiyə tərəfindən fərqli olaraq protokolların ratifikasiyasında konkret addımlar atır. Deməli, ABŞ prosesi irəli aparmaq üçün Türkiyəyə təzyiq etməlidir.

Rəsmi Bakıdan Ankaraya şərtlər var

Rusiyanın “Regnum” agentliyi isə Türkiyədəki diplomatik mənbələrə istinadən məlumat verib ki, rəsmi Bakı Ankaraya bəzi şərtlər irəli sürüb. Bu şərtlərə görə, Azərbaycan Türkiyə ilə qaz anlaşmasını və viza rejiminin ləğvinə dair sazişi Vaşinqton danışıqlarının nəticələrindən asılı olaraq imzalayacaq. Məlumata görə, Bakı əmin olmaq istəyir ki, Türkiyə Vaşinqton danışıqlarında Azərbaycanı Qarabağ məsələsində tək qoyan hansısa sövdələşməyə getməyəcək. “Bakıda ehtiyat edirlər ki, Ankara Vaşinqtonun təzyiqlərinə davam gətirməyərək, Ermənistanla protokolları həyata keçirə bilər. Ona görə də Azərbaycan Ərdoğanın Vaşinqton səfəri diqqətlə izləyəcək” deyə, mənbə bildirib. Gözlənilir ki, hər şey yolunda getsə qaz anlaşması və viza rejiminin ləğvinə dair saziş prezident Abdulla Gülün may ayında Bakıya gözlənilən səfəri, yaxud prezident İlham Əliyevin iyunda İstanbulda keçiriləcək beynəlxalq sammit üçün Türkiyəyə səfəri zamanı imzalana bilər. Xatırladaq ki, aprelin əvvəlində Prezident Administrasiyasının rəhbəri Ramiz Mehdiyev Ankarada səfərdə olub. Türkiyə mənbələrinə görə, Ərdoğan onun vasitəsilə Əliyevə üç mesaj göndərib: PKK terror təşkilatı kimi tanınsın, viza rejimi ləğv edilsin və Şəhidlər Xiyabanındakı türk bayraqlarının hamısı yerinə qaytarılsın. musavat