İranda həbsdə olan Azərbaycanlı alimin azad olunması üçün Qardaş Ölkəyə müraciət olunub

SON XƏBƏRLƏR

İranda həbsdə olan Azərbaycanlı alimin azad olunması üçün Qardaş Ölkəyə müraciət olunub

2021.10.20, 07:36

Gunaz.tv

İranda həbsdə olan Azərbaycanlı alimin azad olunması üçün Qardaş Ölkəyə müraciət olunub

GünAzTv: İranda həbsdə olan azərbaycanlı alim Rəşid Əliyevin azad olunması üçün Türkiyə hökumətinə müraciət ünvanlanıb. Bu barədə APA-ya Rəşid Əliyevin Hüquqlarının Müdafiə Komitəsinin sədri, "Lazer" Elmi Texniki Mərkəzin direktoru Soltanhəmid Məlikov məlumat verib. Komitə sədrinin bildirdiyinə görə, Milli Məclis üzvləri, alim və ziyalılar tərəfindən hazırlanan müraciət artıq Türkiyənin Azərbaycandakı səfirliyinə təqdim olunub. Müraciətdə Türkiyə hökumətindən İranda həbsdə olan azərbaycanlı alim R.Əliyevin həbsdən buraxılması istiqamətində yardım göstərilməsi xahiş olunur. Türkiyə-İran münasibətlərinin yüksələn səviyyəsinə diqqət çəkən S.Məlikov iki ölkə arasında qarşılıqlı hüquqi anlaşma olduğunu da qeyd edib: "Məhz buna görə biz ümid edirik ki, Türkiyə hökuməti buna əl qoyarsa, Rəşid Əliyevin azad olunması şansı artar. Ümid edirik ki, qardaş Türkiyə hökumətinin rəhbərliyi bu istiqamətdə lazımı tədbirlər görəcək. Rəşid Əliyev təkcə Azərbaycanın deyil, bütün türk dünyasının alimidir". Qeyd edək ki, Bakı Dövlət Universitetinin Fizika problemləri Elmi Tədqiqat İnstitutunun "Bioloji sistemlər fizikası" laboratoriyasının aparıcı elmi işçisi Rəşid Əliyev iki il əvvəl İran İslam Respublikasında həbs edilib. Rəşid Əliyev İranın "Sazan Electronics İndustry Company" şirkətinin dəvətilə, Bakı Dövlət Universitetinin rəhbərliyinin razılığı əsasında bağlanmış əməkdaşlıq müqaviləsi çərçivəsində Semnan şəhərinə gedib və 2006-2008-ci illərdə adıçəkilən şirkətlə əməkdaşlıq edib. Bu müddət ərzində onun rəhbərliyi altında şirkətdə ilk dəfə olaraq proqramla idarə edilən texnoloji lazer sistemlərinin qurulması və işə salınması, müasir lazer sistemləri üçün mükəmməl təcrübə və sınaq stendinin hazırlanması həyata keçirilib. Şirkətin rəhbərliyi R.Əliyevə İranda daimi qalıb işləməsilə bağlı dəfələrlə təklif ünvanlasalar da, o bu təklifi qəbul etməyib və Azərbaycana qayıdıb. Şirkətin direktoru Abbas Eftexarinin təkidli xahişindən sonra Rəşid Əliyev sonuncu dəfə ötən il oktyabrın 5-də İrana qısamüddətli səfərə gedib. Bir gün sonra isə polis, viza problemi olduğunu bəhanə gətirərək, onu həbs edib. R.Əliyev lazer texnologiyası ilə bağlı məlumatları və elektron sxemləri Azərbaycana göndərməkdə ittiham olunur.

GUNAZ.TV

SON XƏBƏRLƏR