Türk ölkələri vətəndaşlarının Azərbaycan ordusunda xidmət   göstərməsi mümkündürmü?

GünAzTv: Xəbər verildiyi kimi, Rusiya Silahlı Qüvvələrində Müstəqil Dövlətlər Birliyi ölkələrinin 300-dən artıq vətəndaşı xidmət edir. Rusiya kimi böyük ölkə üçün bu, bəlkə elə də böyük rəqəm deyil. Ancaq hər halda fakt faktlığında qalır. Maraqlıdır, görəsən analoji metodu bir qədər fərqli formada Azərbaycanda tətbiq etmək olarmı? Çünki Azərbaycan uzun illərdir Ermənistanla müharibə şəraitindədir. Məsələn, Azərbaycan ordusunda türk ölkələrinin vətəndaşlarının xidmət etməsinə şəraitin yaradılması müəyyən yenilikləri özündə ehtiva edə bilər. O baxımdan, bu nə dərəcədə doğru və məqsədəuyğun olardı?

 Hərbi ekspert Mehdi Mehdiyev hesab edir ki, hərbi sfera spesifik sahə olduğundan bu məsələdə bir qədər ehtiyatlı olmaq lazımdır: "Hər bir dövlətin vətəndaşları öz dövlətinin qanunlarına uyğun olaraq xidmət edir və həmin qanunlarla məsuliyyətə cəlb olunur. Məsələn, hərbi sirri özündə əks etdirən sahələrdə başqa dövlətin vətəndaşlarının iştirakını təmin etsək, burada müəyyən risqlər ortaya çıxacaq. Yəni hərbi sirrin qorunmasına bu və ya digər dərəcədə ziyan vurula bilər. Bu baxımdan yanaşanda, məncə, olmaz. Ancaq müxtəlif formalarda onlar üçün proqram tətbiq etmək olar ki, həmin proqram çərçivəsində verilən məlumatlar dövlət sirrilə ziddiyyət təşkil etməsin. Fikrimcə, bu məsələdə bir qədər ehtiyatlı və həm də diqqətli olmaq lazımdır. Elə məqamlar var ki, onu öz əsgər və zabitimizdən başqa digər ölkənin vətəndaşına öyrədə bilmərik. Heç bir dövlət başqa bir ölkənin vətəndaşının tamamilə öz hərb sahəsinin incəliklərinə bələd olmasına imkan vermir. Bunu nə Rusiyada, nə Türkiyədə, nə də başqa ölkələrdə edirlər. Yəni bu məsələlər müəyyən çərçivə daxilində olur".    Silahlı Qüvvələrə Demokratik Vətəndaş Nəzarəti Azərbaycan Mərkəzinin direktoru Ələkbər Məmmədov bu fikirlə prinsip etibarilə razı olduğunu və burada qorxulu bir şeyin olmadığını bildirdi: "Burada eyibli, qorxulu məsələ və yaxud da hansısa qanun pozuntusu yoxdur. Çünki dünya praktikasında bu təcrübə mövcuddur. Avropanın orta göbəyi hesab olunan Fransada belə, orduda dünyanın hər yerindən istənilən şəxs gəlib muzdlu əsaslarla xidmət göstərə bilər. MDB ölkələrindən olanların Rusiya ordusunda xidmət etməsinə gəldikdə, onları daha çox iqtisadi vəziyyət buna məcbur edir. Azərbaycanda türk ölkələrinin vətəndaşlarının orduda xidmət göstərməsinə sadəcə istək lazımdır. Eyni zamanda, buna bir türk qeyrəti lazımdır ki, bu qərara gəlsinlər. Bizim hökumət müəyyən şərtləri qəbul etsə, qanunvericiliyə bəzi əlavə və düzəlişlər edib maliyyə vəsaiti ayırsa, bunu tətbiq etmək olar. Əsas məsələ odur ki, bu əsaslarla xidmət edənlərə yaxşı maliyyə vəsaiti ayrılsın". Baki-xəbər