GünAzTv: Fars olmayanlar milli-mədəni, qanuni haqlarını tələb edəndə, İran İslam Respublikası rəhbərliyindəki bütün vəzifə sahibələri onları şovinizmdə suçlayır, müxtəlif ittihamarla cinayət işi açır, həbs edirlər.

Amma uzun illərdir ki, tarixi mənbələrdə Kəngər adlanan körfəzin "Fars körfəzi" kimi təqdim olunması üçün Tehran hakimiyyəti az qala bütün ərəb və müsəlman dünyası ilə savaşır.

Şanxay Əməkdaşlıq Təşkilatı mədəniyyət nazirlərinin toplantısında iştirak etmək üçün Çində səfərdə olan İranın islam irşadı və mədəniyyət naziri Məhəmməd Hüseyni adı çəkilən körfəzin KİV-də "Fars körfəzi" adlandırılmasının daha "doğru" olduğunu vurğulayıb. O, bunu təsdiqləyən "çoxsaylı tarixi sənədlərin" mövcudluğunu da söyləyib.

Lent.az-ın İRİB-ə istinadən məlumatına görə, o, Çinin Sinya şəhərindəki muzeydə saxlanılan qədim bir xəritədə körfəzin məhz belə adlandığını söyləyib. Nazir həmin muzeydə olub, orada Xatirə Kitabına imza atarkən bunun "qanunauyğunluğunu" bir daha vurğulayıb.

Xatırladaq ki, bu günlərdə İran prezidenti Mahmud Əhmədinijat Press TV-yə müsahibəsində məsələyə toxunaraq, demişdi: "Fars körfəzinin adı o dərəcədə mübahisəsizdir ki, müzakirəyə belə ehtiyac duyulmur. Bəzi iddialar hüquqi və siyasi baxımdan mənasızdır. Başqalarının təzyiqi ilə bununla bağlı bəyanat verirlər".

BMT-nin 1994-cü il avqustun 18-də yayılmış Bəyannaməsində məsələ müzakirə edilmədən körfəz "Fars körfəzi" adlandırılıb.

Yeri gəlmişkən, bu ilin yazında "İslam həmrəyliyi idman oyunları"nın keçiriləcəyi gözlənilirdi. "Associated Press"in məlumatına görə, bu tədbir İran İslam Respublikasının ucbatından təxirə salınıb. İslam Ölkələri Həmrəylik Oyunları Federasiyasından bildiriblər ki, İran yarışmaların loqosunda "Fars körfəzi" yazılması iddiası ilə çıxış edib.

Tehran hakimiyyəti ərəb ölkələrinin "Ərəb körfəzi" adlandırdığı yerin "Fars körfəzi" adlandırılmasında israr olduğunu bildirib. Səudiyyə Ərəbistanının təmsilçiləri medalların və mükafatların üzərindən "Fars körfəzi" ifadəsinin yığışdırılmasını tələb etmiş, əlavə olaraq bildirmişdi ki, onun yerinə ya "Ərəb körfəzi", ya da sadəcə, "Körfəz" yazılmalıdır.

Qeyd edək ki, "İslam ölkələri həmrəylik idman oyunları"ının keçirilməsi ilə bağlı İslam Konfransı Təşkilatı 2001-ci ildə qərar qəbul edib. İlk oyunlar 2005-ci ildə Səudiyyə Ərəbistanında keçirilib. Həmin vaxt Özbəkistan, Albaniya və Toqo istisna olmaqla, 53 müsəlman ölkəsindən 6500 idmançı həmrəylik yarışmasına qatılmışdı. Bu ilin yazında keçirilməsi planlaşdırılan yarış əslində, ötən ilin oktyabrında baş tutmalı idi.  Sədrəddin Soltan