GünAzTv: İngiltərədə təhsil alan İrəli İçtimai Birliyinin üzvü, fəal Azərbaycan diasporunun fəal gənclərindən olan Soltan Bayramovun GünAz.tv Mətbuat Xidmətinə müsahibəsi:

 

-Soltan bəy, İngiltərədə fəaliyyət göstərən Azərbaycan diasporunun fəaliyyəti haqqında oxucularımıza məlumat vermənizi istərdik:

 

- Əvvəla xaricdə yaşayan soydaşlarımızı hər zaman diqqətdə saxladığınız ücün sizə dərin minnətdarlığımı bildirmək istəyirəm. İngiltərədəki icmamızın fəaliyyətinə gəldikdə isə, təbii ki hər şey ideal olmasa belə, Avropanın digər ölkələri ilə müqayisədə Britaniyada diasporamızın daha komplektləşmiş vəziyyətdə olduğunu əminliklə qeyd ede bilərəm. Həm Londonda, həm də digər şəhərlərdə xüsusən tələbələrimizin təşəbbüsü ilə fəaliyyət göstərən bir çox təşkilatlarımız öz regionlarında həmyerlilərimizin şəbəkəsinin qurulmasında, ölkəmiz adına müxtəlif tədbirlərin keçirilməsində əllərindən gələni əsirgəmirlər. Böyük Britaniyada Azərbaycanla bağli söz sahibləri ilə, xüsusən parlament üzvləri ilə iş aparmaq üzrə ixtisaslaşan "Avropa-Azərbaycan" cəmiyyəti isə bu sahədəki boşluqların aradan qaldırılması üçün böyük əmək sərf edir ki, bu gün erməni diasporasının dünyada at oynatdığı bir dövrdə mən bunu cox mühum bir fəaliyyət kimi qiymətləndirirəm və yaxın gələcəkdə aparılan işlərin öz müsbət nəticələrini verəcəyinə əminəm.

 

- Bugün İngiltərədə Azərbaycan haqqında təsəvvürlər nədən ibarətdir. İngiltərə insanından Azərbaycan adı soruşulan ilk öncə göz qabağına nələr gəlir?

 

- Qeyd etmək lazımdır ki, Azərbaycanın tanınması baxımından vəziyyət o qədər də ürəkacan deyildir. 90-ci illərin əvvəllərində müstəqillik qazanmış digər keçmiş Sovet ölkələri kimi, Azərbaycanı da yalnız yaxşı təhsil görmüş sıravi ingilislər tanıyır, digərləri ölkəmiz haqda o qədər də məlumatlı deyildir. Amma təbii ki, ölkəmizin Avropaya ilə əlaqələri gücləndikcə britaniyalılarda da ölkəmiz haqqında daha çox məlumat olacaqdır. Bu arada onu da qeyd edim ki, bu baxımdan ötən il "Eurovision" mahnı müsabiqəsinin ölkəmizin reklamı sarıdan rolu böyük oldu.

 

-Bildiyiniz kimi avropda fəaliyyət göstərən Azərbaycan diaspor qurumları arasında həmişə problemlər yaşanıb. Çox arzu olunan haldır ki, İngiltərədə fəaliyyət göstərən diaspor daha mütəşəkkil və sistemli fəaliyyət göstərir. Bunun səbəblərini deyə bilərsinizmi?

 

- Doğrudan da çox doğru vurğulamisiz ki, mütəşəkkillik baxımından Böyük Britaniyada vəziyyət digər Avropa ölkələri ilə müqayisədə daha arzuolunan səviyyədədir. Adicə sizə bir misal deyim, bu il fevral ayının 26-da Xocalı soyqırımının ildönümü səbəbilə İngiltərə parlamentinin qarşısında bir qrup azərbaycanlı gənclərin təşəbbüsü ilə gözəl bir aksiya keçirdik və bununla bağli bütün təskilatlarımızı məlumatlandırdıq. Sevindirici haldır ki, istər digər şəhərlərdə fəaliyyət göstərən təşkilatlarımızın üzvləri, istər Londonda təhsil alan və yaşayan gənclərimiz, hətta Cənubi Azərbaycan təşkilatından belə tədbirimizdə iştirak üçün gələnlər oldu. Bu bir daha bütün təşkilatlarımız arasında mövcud olan qarşılıqlı dostluq və qardaşlığın göstəricisi idi. Bu nə qədər fərəhləndirici fakt olsa belə, diaspor baxımından mənfur düsmənlərimiz qədər effektiv olmaq üçün hələ çox işlərin görülməsinin lazım olduğunu burada təhsil alan hər bir fəal gəncimiz yaxşı dərk edir və bu yöndə durmadan fəaliyyətlərini genişləndirməkdədirlər.

 

-Soltan bəy suallarımızı cavablandırdığınıza görə, Sizə öz təşəkkürümü bildirirəm.

 

- Mən də şərait yaratdığınız üçün sizə öz dərin təşəkkürümü bildirirəm.

 

Elnur Eltürk